Izekiiele 47 - O Mikanda Ikola

O ngiji ia menha ma bhuisa o dixidilu

¹ Kia bhiti imʼiii, ua ngi vutukisa bhu muelu ua Tembulu, mu kutala nga mono menha ala kutunda bhu kikota kia muelu ua Tembulu, a kungulukila ku tundila o dikumbi; mukonda o inzu iene ue ia lungila ku thunda, o menha a kexile mu kufuáfua koxi, ku mbandu ia kadilu iaʼnzu, o mbandu ia uombe ia Kalatódio.

² Muene hé u ngi bheka ku muelu ua kexile ku mbandu ia Kusuku, anga u ngi kondoluesa bhu kanga, katé ku dibhitu dia kanga, dia talela ku mutundila-kumbi; ngi tala menha ia a kunguluka ku mbandu ia kadilu.

³ O muthu muenhó u tunda, ua lungu ku mutundila-kumbi, o bhu maku ua kuata lungoji lua kuzongela; anga u zonga hulukaji ia jikóvadu, anga u ngi bhangesa kuvuua mu menha, menha a ngi suku mu zuatelu dia musanga.

⁴ Hé u zonga dingi hulukaji ia kamukuá, anga u ngi bhangesa kuvuua mu menha, menha a ngi suku mu jiphuna; inga u zonga dingi hulukaji, hé u ngi vuuisa mu menha a ngi sukila mu miongo.

⁵ O kia zonga dingi midi, mueza kiá ngiji i nga lémbua o ikuzáuka, mukonda o menha mê ma zongo kiá, a fuama kiá ngoho ku a zauka ni kuzoua, kuma ngiji kiá ki i xikina dingi ku i bhita.

⁶ Anga u ngʼila, uixi: Eie, monʼa diiala, ua mono? Bhenhobho ua ngʼambata, hé u ngi bheka dingi ku kibumu kia ngiji.

⁷ O ki nga vutuka, nga mono ku kibumu, sámbua ni sámbua, kuezala ndumba dia miẋi ia lebha.

⁸ Bhenhobho-phe u ngʼambela, uixi: O menha iá a mu kungulukila ku mbandu ia thunda, hé a kulumuka mu musanza ua Kalunga ka di Fuila; o kia zubha o kubhiẋila momo, menha ma kalunga ma iuka kiá.

⁹ Hé ki kala-phe kuma, kima kioso-kioso kiá kia di bhange ni muenhu, kienda dízula, kia kà kola muenhu kuoso-kuoso kiá ku bhita o ngiji iii, anga kua kà kala nzungule ia jimbiji; o kuoso ku di texila o menha iá a kà toualesa o menha a kalunga; o muoso kiá mu bhita o ngiji iii, ima ioso i kola o muenhu.

¹⁰ O mu jimbandu jê mua ká kala atona; tundé bhu Engedi katé Enenglaíme, bhua kà kala ni kididi kia kuanekena o manda; o mbiji iê, ku idifua-idifua, ni mu kuvula kinéne, ia kʼèla kala ia musanza ua Kalunga ka Dikota.

¹¹ Maji o izanga iê, ia malôua ni izakazaka iê, ki ia kà di sanza, kana; a kà i xisa kienhókio, mbé o môngua.

¹² O ku mbanduʼa honga, ku kibumu kiê, ku sámbua ni sámbua, ku sabhuka ídifua ioso ia miẋi i bhana o ibundu ia kúdia; o dífue diê ki di lela, o kibundu kiê ki kiene dingi mu ku kamba; o bhu jimbeji ja tokala, i lukula jinga ibundu ia ubhe, mukonda o menha mê a mu tunda muene bhu dibhezelu; o ibundu iê ia kà uabhela ku i dia, o mafe mê milôngo.

O jimbambe ja ixi ia Izalaiele

¹³ O Jihova Nzambi uambe kiki: O iii iene o mbambe mu mi uanena o ixi mu ulundudi uenu, kala kioso kiá kiala o kuinhi dia miji ni kiiadi ia Izalaiele. O Zuze u kala ni makânda aiadi.

¹⁴ Mu i uana ni kusokelela kuoso mu maundundu bhu kaxi ka muiji ni ua mukuá; mbata o ku thandu diaʼxi iii, nga zanguila-ku o lukuaku luami, eme nga loka, ngixi, ngii bhana ku jitata jenu; kala kiki o ixi ienhiʼii, ia-nda ku kituka ienu, ia undundu.

¹⁵ O mbambe iaʼxi, ku mbandu ia Kusuku, ienhiʼii: tundé ku musanza ua Kalunga ka Dikota, ku njila ia Hetelone katé bhu dibokuenu dia Zedade.

¹⁶ Ni Hamate, ni Belota, ni Xibalaíme, ala bhuʼaxaxe ni mbambe ia Damasku, ni ia Hamate, katé Hazele-Hatikome, ua zukamena ku mbambe ia Haulane.

¹⁷ Kala kiki o mbambe i kala tundé ku musanza ua kalunga katé Hazale-Inono, mu mbambe ia Damasku, o ki u lunga Kusuku kuene kuala o mbambe ia Hamate; iii-phe iene o mbambe ia mbandu ia Kusuku.

¹⁸ O mbambe ia mutundila-kumbi, bhu kaxi ni Haulane, ni Damasku ni Ngiliade, mʼoxi ia Izalaiele, i kala kiá o ngiji ia Njolodá iene; tundé kiá bhua sukila o mbambe ku mutundila-kumbi.

¹⁹ O mbandu ia uombe mbambe iê i kala tundé bhu Tamale katé bhu menha a jimvunda bhu Kadexi, bhua zukama ni Honga ia Ijitu katé ku musanza ua Kalunga ka Dikota; iii i kala iene o mbambe ku mbandu ia uombe.

²⁰ O ku mbandu-phe ia mufuilakumbi, o Kalunga ka Dikota kene kiá o mbambe iê, tundé bhua suku o mbambe ia Sulu katé bhu dibokuenu dia Hamate; iii-phe i kala iene o mbambe ia luiji ku mufuila-kumbi.

²¹ O ixi-phe, mua kà i uana mudienu, kala kioso kiá kiala o miji ia Izalaiele.

²² Kia kà kala-phe kuila, mu ku i lundula, mu i tela muondona, phala ene ni athu engi a mu nhunganena muʼaxaxe kenu, hé a vualela ana mu kaxi kene; ene ue a kà mi kala kala athu òvuale ku anʼa Izalaiele; a kà bokuena kumoxi ni enu mu undundu, muʼaxaxe ka miji ia Izalaiele.

²³ Anga-phe mua kʼèla, o muthu uengi, muoso kiá mu muiji muala kunhunganena, muene mua kà mu bhana o dikànda dia undundu uê, Jihova Nzambi ua ki tange.