Izekiiele 40 - O Mikanda Ikola

O kutungulula o Tembulu: O imbaka ni jimbalanda

¹ Mu muvu ua makuinhi aiadi ni kitanu a uhutuile uetu, ku muandeku ua muvu, mu kizuua kia kakuinhi ku mbeji, kuila bhua bhiti kiá kuinhi dia muvu ni kiuana, hanji kia kuama o mbonge, mu kienhókio muene o lukuaku lua Jihova ki lueza kokuami, lú lua ngʼambata ʼte kuenhoko,

² mu isuma ia Nzambi, lua ngʼambata katé mu ixi ia Izalaiele, lú lua ngi tula ku mulundu ua di leka kinéne, o kuenhoko kua kexile kima kiedi kala mbanza iòtunge, ku mbandu ia Sulu.

³ O kia ngi bheka muenhomo, tala, nga mono muthu o kidifua kiê ua di fu ni Kobidi, ua kuata ka mukolo ka linhu bhu maku ni lumbungu lua kuzongela, iú uemana bhu muelu.

⁴ O muthu muenhú hé u ngʼambela, uixi: Eie monʼa diiala, tala ni mesu mé, uívue ni mátui mé, o ioso i ngi ku muesa ta-iu muene ku muẋima ué; mukonda kiene kia ku bhekela bhabha, mbé o ku ku londekeza; o ioso-phe i u mona, tangela-iu o muiji ua Izalaiele.

⁵ Anga ku kala kimbaka ku kanga, kia kondoloka o inzu; o bhu lukuaku lua iala muenhú, ua kuata lumbungu lua kuzongela, lua kóvadu jisamanu, jedi ue kala kóvadu imoxi iala ni kóvadu ni kànda dia lukuaku, anga u zonga o kuzanza kua inzu, mbungu lumoxi, o kitala kia inzu ue mbungu lumoxi.

⁶ Kienhókio, hé uiza bhu dibhitu dia talela ku njila ia mutundila-kumbi, u bandela ku masumbatu mé; anga u zonga o mulambu ua dibhitu, lumbungu lua muvimba mu kuzanza, hé u zonga o mulambu ua mukuá, lumbungu lua muvimba mu kuzanza.

⁷ Kala xilu dimoxi dia kexile ni lumbungu bhu mulebhelela, lumoxi bhu kuzanza, o bhu kaxi ka dixilu ni dixilu bhua kexile ni kóvadu jitanu; o mukangalu ua dibhitu, bhu mbanduʼa mbalanda ia muelu, moxi diê, ua kexile lumbungu lua muvimba.

⁸ Anga u zonga ue o mbalanda ia muelu, moxi diê, ia tena lumbungu lua muvimba.

⁹ Anga-phe u zonga kiá o kitélembe kia mukuá kia muelu, kia kexile ni nake dia kóvadu, ni jiphiladi jê, kóvadu jiiadi, ni mbalanda ia muelu moxi, ia talela ku kanga.

¹⁰ O muelu ua talela ku mutundila-kumbi, uedile ku mbandʼuku maxilu a tatu, o ku mbandʼuku maxilu a tatu, o mu ku a zonga, a sokelela oso kumoxi; o jiphiladi ue ja mbandu iii ni ja mbandu ia mukuá, ja sokelela kumoxi mu ku ji zonga.

¹¹ Hé u zonga dingi o kuzanza kua muelu, bhu dibhitu, kua kexile ni kuinhi dia kóvadu; o dibhitu kulebha kuê kuinhi dia kóvadu ni kitatu.

¹² O bhu kanga dia dixilu, ku pholo, kuzanza kuê kua kóvadu imoxi, o ku dima diê, ku mbandu ia mukuá, o kuzanza kuê ue kua kóvadu imoxi; kala dixilu dia kexile ni kóvadu jisamanu ku mbandʼuku, ni kóvadu jisamanu ku mbandu ia mukuá.

¹³ Kienhókio anga uzonga o dibhitu tundé bhu hongo ia ʼxilu didi katé bhu hongo ia ʼxilu dia mukuá, bhua tena makuinhi aiadi a kóvadu ni kitanu o kuzanza kuê, bhu kaxi ka dibhitu ni dibhitu dia mukuá.

¹⁴ Anga u zonga ue o dikanga katé ku jiphiladi, makuinhi a samanu a kóvadu, o lumbu hé lu di tandeleka katé ku jiphiladi ja kondoloka o muelu.

¹⁵ Tundé kiabhu ku pholo ia muelu ua dibokuenu, katé ku pholo ia mbalanda ia muelu ua moxi, bhua kexile makuinhi a tanu a kóvadu.

¹⁶ Ku maxilu ua bhange-ku ue jinjanena ja kujika-jika, ni ku jiphiladi jê, moxiʼa mabhitu mu jimbandu, kiene ue kimoxi ni mu jimbalanda; o jinjanena hé ji kondoloka o mbandu ia moxi, o ku jiphiladi a seta-ku máie.

¹⁷ Muene anga u ngi bheka mu lumbu lua kanga; ki nga tale, muala maxilu, o dikanga mu lumbu diòludike kiambote ku mbandu joso; o dikanga didi a di kondoloka kuala makuinhi a tatu a maxilu osuʼâ.

¹⁸ O dikanga dia kexile ku mbandu ia mielu, dia sokele kumoxi ni mulebhelela ua mabhitu; maji o dikanga dia kexile dingi bhoxi.

¹⁹ Anga u zonga o kuzanza kua dikanga diala ku pholo dia lumbu lua moxi, ku kanga diê, dia tena hama ia kóvadu, tunde ku mbandu ia mutundila-kumbi ʻté kusuku.

²⁰ O kuiza ku muelu ua talela ku njila ia Kusuku mu lumbu lua kanga, muene ue ua zongo-mo o kulebha kuê ni kuzanza kuê.

²¹ Ni maxiluʼê, edi ku mbandʼuku a tatu, ku mbandʼuku a tatu, ni jiphiladi jê, ni jimbalanda jê, mu ku ji zonga ja sokelela ni ja muelu ua dianga; makuinhi a tanu a kóvadu, kuene o kulebha kuê, o kuzanza kuê makuinhi a iadi a kóvadu ni kitanu.

²² O jinjanena jâ, ni jimbalanda jê, ni máie mê, o midila iê iene imoxi ni ia muelu ua talela ku njila ia mutundila-kumbi; o kuia bhu muelu, a sambelela jinga ku disumbatu dia sambuadi dia matala, o mbalanda iê ia kexilile ku pholo.

²³ O muelu ua lumbu lua moxi ua di lulamene ni muelu ua kusuku ni ua Mutundila-kumbi; o kia zongo bhu muelu ni muelu ua mukuá, bhua tena hamʼa kóvadu.

²⁴ O ku tunda bhobho, u ngʼambata ku njila ia Sulu, tala, kua kexile ue muelu ua lungila ku njila ia Sulu, hé u zonga o jiphiladi jê ni jimbalanda jê, kala kiabhu o nzôngo jenhiji.

²⁵ O mu jimbandu ja jimbalanda mua kondoloka ue jinjanena, kala o jinjanena ja mukuá; makuinhi a tanu a kóvadu bhu mulebhelela ni makuinhi aiadi a kóvadu ni kitanu bhu kuzanza.

²⁶ O masumbatuʼê a kexile ni sambuadi dia matala, o jimbalanda jê ja kexile ku pholo; kua kexile ue ni máie ku jiphiladi, dimoxi ku mbandu kuku, o dia mukuá ku mbandu ia mukuá.

²⁷ Kua kexile ue muelu ku lumbu lua moxi, ua talela ku Sulu; anga u zonga bhu muelu ni muelu ua kamukuá, ia talela ku Sulu, bhua uanunuka hamʼa kóvadu.

²⁸ Kinhókio anga u ngi bokuesa mu lumbu lua moxi bhu muelu ua Sulu; anga u zonga ue o muelu ua Sulu, mu izongelu ienhiʼii kiá.

²⁹ Ni maxiluʼê, ni jiphiladi jê, ni jimbalanda jê, ja sokelela mu midila ienhiʼii; o jimbalanda jê ja kexile ue ni jinjanena ja kondoloka mu jimbandu; o mulebhelela ua kexile ua makuinhi a tanu a kóvadu, o kuzanza kuê kua makuinhi aiadi a kóvadu ni kitanu.

³⁰ Anga kukala ue jimbalanda ja kondoloka mu jimbandu; o kulebha kuê kua makuinhi aiadi a kóvadu ni kitanu, o kuzanza kuê kua kóvadu jitanu.

³¹ O jimbalanda jê ja lungila ni lumbu lua kanga, o ku jiphiladi jê kua kexile máie; o masambelelu mê a kexile ni nake dia ditala.

³² Anga u ngi bheka dingi mu lumbu lua moxi, ku mbandu ia mutundila-kumbi, anga u zonga ue o muelu kala kia mu bhanga mu izongelu ienhiʼii.

³³ Ua zongo ue o maxilu mê, ni jiphiladi jê, ni jimbalanda jê, o nzòngo jê jene jimoxi jenhʼiji; kua kexile ue o jinjanena ja kondoloka o jimbalanda mu jimbandu; o muelu kulebha kuê kua makuinhi a tanu a kóvadu, o kuzanza kuê kua makuinhi aiadi ni kitanu.

³⁴ O jimbalanda jê ja kexile ku lumbu lua kanga; kua kexile ue máie ku jiphiladi jê, ku tale ku mbandu iii uixi ku mbandu ia mukuá; o masambelelu ê a kexile ni nake dia ditala.

³⁵ Kienhókio anga u ngi bheka-phe dingi ku muelu ua Kusuku, hé u zonga dingi kala kiá o nzôngo jene jimoxi jenhiji.

³⁶ Ni maxilu ê, ni jiphiladi jê, ni jimbalanda jê; kua kexile ue ni jinjanena mu jimbandu; o mulebhelela uê ua kexile ua makuinhi a tanu a kóvadu, o kuzanza kuê kua makuinhi aiadi ni kitanu kia kóvadu.

³⁷ O jiphiladi jê ja kexile mu lumbu lua kanga; o ku jiphiladi jê kua kexile ue ni máie, ku mbandʼuku ni ku mbandu ia mukuá; o masambelelu mê ma nake dia ditala.

³⁸ O xilu diê ni muelu uê, ua kexilile bhu mbanduʼa jiphiladi ja mielu ia kexile mu ku sukuila o sata ia kuoha.

³⁹ O mu mbalanda ia muelu, muedile ku mbandʼuku meza aiadi, ku mbandʼuku meza aiadi, phala kuenda ni kubatuila-ku o xingu ia kibhaku kia sata ia kuoha, ni sata ia kituxi, ni ia kuêla.

⁴⁰ O ku mbandu ia kanga ue, bhu disambelelu dia kubokuena bhu muelu ua talela Kusuku, bhua kexile meza aiadi; o ku mbandu ia mukuá ue mu mbalanda ia muelu, mua kexile meza aiadi.

⁴¹ Meza a uana ku mbandʼuku, meza a uana ku mbandu ia mukuá; mu jimbandu ja muelu mua kexile nake dia meza, o ku thandu diê kuene kua kexi mu kujibhila o ibhaku.

⁴² O meza a uana phala o sata ia kuoha, a kexile a matadi a kuseta; o kulebha kuê kua kóvadu imoxi ni kaxaxe; o ku thandu diê kuene kua tula jinga o iselengenhe ia kubatula-na-iu o xingu ia ibhaku ia sata ia kuoha ni sata ia ujitu kua Nzambi.

⁴³ O jingouele jê, kulebha kuê kua ʼkanda dia lukuaku, jʼokondoluese mʼonzo ioso, o ku thandu dia jimeza kua kexile xitu ia sata.

⁴⁴ O ku kanga dia muelu ua moxi, kuene kua kexile o maxilu a jingimba, mu lumbu lua moxi, lua kexile ku mbandu ia muelu ua Kusuku, lú lua talela ku njila ia uombe; xilu dia mukuá dia kexile ku mbandu ia muelu ua thunda, di dia talela ku njila ia Kusuku.

⁴⁵ O muene hé u ngʼambela, uixi: O xilu didi, dia talela ku njila ia uombe, dia jinganga ala ni kilangidilu kia Tembulu.

⁴⁶ Maji o xilu dia talela ku njila ia Kusuku, dia jinganga jala ni kilangidilu kia Kalatódio; iá-phe ene anʼa Zadoko, mu kilunga kia anʼa Levi, a mu bhixila kua Jihova, phala ku mu bhikila.

⁴⁷ Anga u zonga o lumbu; luene luala mu jikuádulu, kuma o kulebha kuê hamʼa kóvadu, o kuzanza kuê hamʼa kóvadu; o Kalatódio ka kexile ku pholo ia Tembulu.

⁴⁸ Kienhokio-phe anga u ngi bheka mu lumbu lua Tembulu, anga u zonga o jiphiladi ja mbalanda, mu imoxi-imoxi, kóvuadu jitanu ku mbandʼuku, kóvadu jitanu ku mbandu ia mukuá; o kuzanza kua muelu, kua kóvadu jitatu ku mbandʼuku, kóvadu jitatu ku mbandu ia kamukuá.

⁴⁹ O kulebha kua mbalanda kua kexile kua makuinhi aiadi a kóvadu, o kuzanza kuê kua kuinhi dia kóvadu ni kamoxi, o kubanda a bandela jinga ku matala; anga ku kala ngunji ja makota bhu mbandu ia jiphiladi, imoxi ku mbandu kuku o ia mukuá ku mbandu ia kamukuá.