Izekiiele 34 - O Mikanda Ikola

Muzambu ua kuzoka ni abidi a Izalaiele a kambe o kitongola

¹ Anga o kizuelu kia Jihova kiza kokuami, kiexi:

² Eʼ monʼa muthu, tá muzambu ua kuzoka ni abidi a Izalaiele; zambula, u tangele abidi, uixi: O Jihova Nzambi, uambe kiki: Lamba dia abidi a Izalaiele a mu dʼingâ ngoho ene! Manhi o abidi kène mu kuinga o jimbudi?

³ O maji a jimbudi mu dia, o kindemba kiê mu zuata; o iòbhange mu i batula o xingu; maji mua tokoka o kuinga jimbudi.

⁴ Ia buila ki mu i suinisa, o ia kate ki mu i tumbu, ia bukuka mua lémbua ku i ta mu kitanda, o ia bhambuka mu akuá ki mu tona ku i bheka mu kilunga, o ia jimbila né ngó ku i sota; maji mu jiza mu ku ji tumina ni kutema ni nguzu.

⁵ Kienhiki ji ja muangana, mukonda dia kukamba o kabhila, ji ja xalèla kiá kudia kua ngene kua iama ioso ia mukáu, kuma ja di muange kiá.

⁶ O mbudi jami jì ja mu bunganena ngó mu milundu ioso, ni mu tuthuthulundu tuoso tua di leka; xi, kiene muene! O mbudi jami joso ja muanganena ngoho mu tumbu ni ngongo, ki ji moneka uoso u ji sota, mba uoso u ji takana (ku ja di texiʼoko).

⁷ Kala kiki, enu tufunga, tata, ivenu o kizuelu kia Jihova:

⁸ Jihova Nzambi uixi: Eme ngi laia! Ki kiedi kuma o jimbudi jami a ji bhakula ku uiii, o jimbudi jami jì ja di-bhange kúdia kua iama ioso ia mukáu, mukonda dia kukamba o kabhila, o tubhila tuami nguâ-uâ kusota o jimbudi jami, mbata a mu dʼingâ kiâ ngó ene-muène, iá a tokoka o kuinga o jimbudi jami;

⁹ kala kiki, enu mu abidi, tata, ivuenu o kizuelu kia Jihova:

¹⁰ O Jihova Nzambi, uambe kiki: Talesa-ze, eme ngi zoka ni abidi, o jimbudi jami nga-nda ku jʼibhudisa bhu lukuaku luâ, ene uâ hé eha kiá o kuinga o jimbudi, ka-nda kutena ue dingi ku dʼinga eneʼâ; anga o jimbudi jami nga kà ji bhulula mu kanu diâ, ki ja-nda kua kà kituka dingi huta iâ.

¹¹ Mukonda o Jihova Nzambi uambe kiki, uixi: Tala-ze, kuma eme, ememuène muene, nga-nda kusota o mbudi jami, inga ngi ji takana.

¹² Mukuâ ni mubidi kia kenga o kilunga kiê, bhu kizuua muene kia kala muʼaxaxi ka jimbudi jê ja di muange, kiene ue eme ki nga-nda kukenga o jimbudi jami; anga ngi ji takana mu ididi ioso mu ja di muangena, bhu kizuua kia dituta ni kia kitombe.

¹³ O mu ifuẋi anga ngi ji katula-mu, anga ngi ji tundisa mu jixi ja vula matelu, anga ngiza na-ju mu ixi iâ, hé nga kà jʼingila mu milundu ia Izalaiele, bhu mbanduʼa jibungulule ja menha, ni mu mabhata oso aʼxi.

¹⁴ Mu sabhelela ia mbote, muene mu nga-nda ku ji disila, o mu milundu ia di leka ia Izalaiele muene mu kala o kibhanga kiâ; muenhomo ja kà zeka mu kibhanga kia mbote, hé ja kʼènda ni kudila mu makèla a nete, mu milundu ia Izalaiele.

¹⁵ Eme-muène-muene, nga kà disa o jimbudi jami, anga nga kà ji nhohesa, kiene kiambe Jihova Nzambi.

¹⁶ Ioso ia jimbila ngi i kenga, o ia di texi ngiza na-iu dingi, o ia bukula kinama ngi i tá mu kitanda, o ia kate ngi i tumba; maji o ia nete, ni iii ia vulu o nguzu ngi i jimisa o mbutu; kuma nga-nda ku jʼinga ni kilunji.

¹⁷ Ku mbandu ienuʼenu, mu jimbudi jami, o Jihova Nzambi phe uambe kiki: Talesenu kuma eme nga-nda kufundisa o ibhaku iòfele bhu kaxi ni ibhaku iòfele, o ilumbe ia jimbudi bhu kaxi ni isutu ia jihombo.

¹⁸ Manhi ki ki mi soko o kudia sabhelela iambote, mbé mu táku dingi o kudiota-diotela bhoxi o sabhelela ienu ia mi subhuka-ku ni ikoto ienu? Ni kunua ue o menha a zele kiambote, manhi a mi subhuka-ku mu a vunza-vunza dingi ni mikônzo ienu?

¹⁹ Ki kia bhingi kuila o jimbudi jami jidia o sabhelela i mua titidila ni ikoto ienu, hé ji-nua o mavunze u mua vunzulula ni mikônzo ienu.

²⁰ Kiene kia bhekesa Jihova Nzambi ku a ambela, uixi: Talesenu, kuma eme, eme-muène-muene, nga kà fundisa bhu kaxi ni ibhaku ia nete ni ibhaku ia bhele.

²¹ Mukonda enu, mua muia ni ku lundujula ni isuxi ienu ni mbanji jenu, o jimbinga jenu jene ji mulua-na-ju o jimbudi joso ja kambe o nguzu, katé ki mu ji muangena ku kanga.

²² Eme-phe o jimbudi jami nga-nda ku ji bhulula, mbé ki ji kale dingi ja kuenda ni kunhanʼé ngoho, hé nga kà fundisa o tuibhaku tuofele bhu kaxi ni tuibhaku tuofele.

²³ Anga nga kà jʼimikina mubidi umoxi ngó u kala ku thandu diâ, muene hé ua kà jʼinga; o mubhikʼami Davidi muene ua-nda kua kà jʼinga; muene ua-nda kukituka kafunga kâ.

²⁴ O eme-phe, ngi Jihova, nga kà kala ngi Nzambi iâ, o mubhikʼami Davidi muene ua kà kala o kilamba muʼaxaxe kâ; kuma eme ngi Jihova nga ki tange.

²⁵ Hé nga kà ta na-ju kikutu kia paze, o iama iaiibha mu ngongo nga kà i zubha-mu, o jene hé ja kà tunga ni kukondama mu kikangalakata, hé ja kà zekʼé muene mu matutu.

²⁶ O jene nga kà ji kitula dibesá kumoxi ni ididi ia mulundu uami ukôla; o mvula hé nga kà i tuma kusonoka bhu thembu iê; ia kà kala mvula ia kizediuise.

²⁷ O miẋi ia mukáu ia kà lukula o ibundu iê, mavu a-nda kubhana o idima iâ, anga ja kà kala ni kukondama mu ixi iâ; hé a kà kʼijiia kuila eme ngi Jihova, kioso eme ki nga-nda kubukula o jimbangala ja a bhikisa jinga na-ju, anga ngi ji bhulula bhu lukuaku lua iá a kexile mu ku a bhikisa.

²⁸ Ki ja-nda kukituka dingi mbole ia uiii ua akua matumbu, mba ji diua dingi ku iama ia ngongo; hé ja kà tunga ni kutululuka kua soko, ki bhu kala dingi muthu u ji sasumuisa.

²⁹ Anga nga kà ji kunina kidima kia dijina, ki mungu dingi ja kà fua ku nzala mu tumbu ni ngongo, mba ue ja kà kala dingi ni môndo ua akua matumbu ku thandu diâ.

³⁰ Mukonda-phe, ene a kʼejiia kuila, eme ngi Jihova Nzambi iâ, ngala-nâ kumoxi, ni kuila, o jene, ene o mundu uami o dibhata dia Izalaiele, Jihova ua ki tange.

³¹ Enu-phe, tata, mu jimbudi jami, jimbudi ja dikèla diami, muala ngó mu athu, maji emeʼeme ngi Nzambi ienu, kiene kia tange Jihova.