Izekiiele 32 - O Mikanda Ikola

Madidilu kua Falaó, sobha ia Ijitu

¹ Anga ki bhita kuila, mu muvu ua kuinhi ni kiiadi, bhu mbeji ia kuinhi ni kiiadi, mu kizuua kia dianga, o kizuelu kia Jihova kieza kokuami, kuila:

² Eʼmonʼa diiala, tá nzongo ia kudila Falaó, sobha ia Ijitu, u muʼambele, uixi: Eie ua di bhangele mukuâ ni kamona ka hoji, muʼaxaxe ka ifuẋi, eie uedile kala u kimudikixi muʼalunga, ua nemeka jinga o jingiji jé, o menha ua a vunza-vunza jinga ni inama ié, o jingiji jé ua jʼizalesa jinga divunze.

³ O Jihova Nzambi uambe kiki, uixi: Kala kiki, o ku thandu dié nga-nda kuzala-ku uanda ni dibhongolokelu dia mundu uavulu, hé a kà ku bandesa mu uanda uami.

⁴ Kienhokio-phe, hé nga kà kuxa ku mavu a kukuta; nga kà ku texila muene ku mukáu ua hatu, anga nga kà bhangesa kuila o jinjila joso ja diulu ji tunga ku thandu dié; o iama ioso mu ngongo ia kà dia kokué anga ikula.

⁵ O jixitu jié hé nga kà ji tula ku thanduʼa milundu, o makôlo nga kà ezalesa ni kulebha kua kitala kié.

⁶ O ixi i ua mu kuenda ni kuzouela nga-nda ku i betesa ni mahaxi mé, katé ni ku milundu; o jihungulule anga ja kʼezala ni manhinga mé-èie.

⁷ Kioso eme ki nga-nda ku ku jimuna, o diulu nga kà di vungina, o jithéthembua jê nga kà ji vungina ni dituta, o mbeji ki ia kʼèhela mukengeji uê ku muika.

⁸ Nga kà bhangesa kuila o mikengeji ioso ibenha ku diulu diakadiaka, ia kà ku vundila, anga o ku thandu dia ixi ié nga kà bheka-ku kitombe, Ngana Nzambi ua ki tange.

⁹ O muẋima ua mundu uavulu nganda kua kà u tatesa, kioso eme ki nganda kubheka o kibuika kié-eie muʼaxaxe ka miji, ku jixi eie ku jʼijiia.

¹⁰ Uila kiki, eie-phe, monʼa muthu, o muiji ua Izalaiele ambela-na-u, uixi: Enu mua mu zuela kiki, muexi: Abha-phe, se o itondalu ietu ni ituxi ietu ia tu sambela kiá ku thandu, etuʼetu tua bulukutila kiá muenhomo, tua-nda kukola-phe dingi kiebhi o muenhu?

¹¹ Mukonda, o Ngana Nzambi uambe, uixi: O xibhata ia sobha ia Babilónha ii iza kokué.

¹² O mundu ué uoso nga-nda ku u buisa ni xibhata ja mazonda, ene kiá a beta o uluami muʼaxaxe ka athu; ene a-nda kujikinisa o izala ia Ijitu, o mundu uê uoso ua-nda kua kà di bota.

¹³ O iama iê ioso ku thandu dia menha avulu nga-nda ku i jima o mbutu, o menha ka kà a vunzulula dingi kuala kinama kia muthu mba ikoto ia iama.

¹⁴ Kienhokio-phe o menha mê nga-nda kua kà a xikika, o jingiji jê nga kà ji bhangesa ku kunguluka kala maji, Ngana Nzambi ua ki tange.

¹⁵ Kioso eme o ixi ia Ijitu ki nga-nda ku i bilula jingùndu, anga o ixi iosololo mu kutenena kuê kuoso i kituka jingûndu, o kioso ki nga-nda kunemeka ene oso a tungu-mu, kuabhu-phe, kiene kiua kia í kà kʼijiia kuila emiʼeme ngi Ngana.

¹⁶ O iá ene o madidilu a-nda kua kà dila-nâ; anʼa ahatu mu jixi a kà mu dila; kienhiki muene kiá-nda kua kà dila Ijitu ni mundu uê uoso, Ngana Nzambi muene ua ki zuela.

Ijitu a mu dila

¹⁷ Anga ki bhita, ku muvu ua kuinhi ni kiiadi, mu kizuua kia kuinhi ni kitanu ku mbeji, o kizuelu kia Jihova kieza kokuami, kuamba:

¹⁸ ʼE monʼa diiala, o mundu ua Ijitu tela-u jingololo, u u bhangese o kutuluka, ni uene ni anʼa ilumba ia akua jixi ja makembu, aie mu ixi iala bhoxi kinéne, kua ió ene mu kutuluka mu kina.

¹⁹ Eie, o ua mu tundu mu kuuabha, nanhi? Tuluka, nda u zeke kumoxi ni akua mabôlo.

²⁰ O ió, imazonda ia beta o nguzu, ia-nda ku mu zuelela tundé mu kaxi diʼalunga, kumoxi ni ió ala mu ku mu banda; a tuluka, iá ala muʼaxaxe ka akua mabôlo a a tubujula ni xibhata.

²¹ O iá, imazonda ia beta o nguzu, ianda ku mu zuelela tundé mu kaxi diʼalunga, kumoxi ni ió ala mu ku mu banda; a tuluka, iá ala muʼaxaxe ka akua mabôlo a a tubujula ni xibhata.

²² Muenhomo muene muala Asule ni mundu uê uoso; o jimbila jâ ene ja mu kondoloka; ene oso muene a a kubujula ia a di bhale ku xibhata.

²³ O jimbila jâ a ji te dingi ku holiʼèlele ia dikungu, o mundu uê ia a kondoloka o mbila iê; ene oso a a kubujula ia a tenuka ku xibhata, enhó muene a di uanesa jinga kulu dia mundu kua tunga o athu a muenhu.

²⁴ Muenhomo muene muala Elame ni mundu uê uoso ala mu jimbandu ja mbila iê; ene oso a a kubujula ia a di bhale ku xibhata; ene-phe a seiela ni inhunga iâ mu ididi ia beta o kuzonga bhoxi dia mavu; a kuatesa jinga uôma kulu dia mundu kua tunga athu a muenhu, o sonhi jâ ia aii na-ju kumoxi ni iá a tuluka mu kina.

²⁵ O mu kaxi kà ia a a kubujula, muene mua mu tudila o muanza uê, muʼaxaxe ka mundu uê uoso; o mu jimbandu jê, muene muala o jimbila jâ; ene oso muene akua inhunga a a kubujula ku xibhata; mbata a kuatesa jinga uôma mu ngongo ia athu a muenhu, o jisonhi jâ ia aii na-ju kumoxi ni iá a seiela mu kina; a mu tula mu kaxi ka ia a a kubujula.

²⁶ Muenhomo muene muala Meseke ni Tubale ni mundu uâ uoso; o mu jimbandu jâ muene muala o jimbila ja ene; ene oso muene akua mabôlo a a kubujula ku xibhata, kuma a bhanga jinga ima i kuatesa uôma mu ngongo ia athu a muenhu.

²⁷ Ene ka kà a sanga kumoxi ni mazonda ió a tenuka kua akua mabôlo, ia a tuluka mu mbila ni mata mâ ma ita, ia a bhetuila o jixibhata jâ; o ikuma iâ i iala ku thandu dia ifuba iâ, mukonda a a kuata jinga uôma kuala o mazonda mu ngongo ia athu a muenhu.

²⁸ O eie ue a-nda ku ku bukuila muʼaxaxe ka akua mabôlo, hé ua kà tandelela kumoxi ni ia a a kubujula ku xibhata.

²⁹ Muenhomo muene muala Idomo, ni josobha jê ni ilamba iê ioso, ió mu kutena kuê a a te kumoxi ni iá a a kubujula ku xibhata; enhá ue a tandelela kumoxi ni akua jinzevu ni kumoxi ni iá a seiela mu kina.

³⁰ Muenhomo muene muala o ilamba ia kusuku, iene ioso muene, ni akua Sidone oso, a seiela kumoxi ni iá a a tubujula, sonhi ja a kuata mukonda dia uôma ua kuatesa jinga mu kusuína ni kutena kuâ; ia a tandelela ni mabôlo mâ kumoxi ni iá a a kubujula ku xibhata, o jisonhi jâ a ji ambata kumoxi ni iá a kulumuka mu kina.

³¹ Falaó ua kà a mona, hé ua kà di konda o malamba kumoxi ni mundu uê uoso; xi, Falaó mueniʼèlele, ni kilômbo kiê kioso, a a kubujula ku xibhata, Ngana Nzambi muene ua ki tange.

³² Mukonda eme ue nga te o kidiuanu kiami, kulu dia mundu kuala o athu a muenhu; kala kiki, o Falaó ni mundu uê uoso, ua kà zendalela muʼaxaxe ka akua mabôlo, kumoxi ni iá a a tubujula ku xibhata, Jihova Nzambi ua ki tange.