Izekiiele 31 - O Mikanda Ikola

O muzambu ua mukuá ua kuzoka ni Falaó, sobha ia Ijitu

¹ Anga ki bita mu muvu ua kakuinhi ni umoxi, bhu mbeji ia katatu, mu kizuua kia dianga ku mbeji, kiene kieza o kizuelu kia Jihova kokuami, kuila:

² Eʼmonʼa diiala, tangela Falaó, sobha ia Ijitu, ni mundu uê, uixi: Eie ua soko ni nanhi mu unéne ué?

³ Tala-ze, kuila Asídia ua kexile musédulu mu Libano, uala ni jithangu ja iuka, ua di zandela kinéne iú ua lebha kiavulu, o zoko-zoko diê dia kexile ku jithangu ja di zandela kiavulu.

⁴ O menha ene a mu bhangesa o kukula, o kidikungu kiene kia mu zangeleka; o hungulule jê ja kexile mu ku kunguluka mu jimbandu ja ixina iê, o muene iú ua tumikisa jinga o tungiji ku miẋi ioso ia mukáu.

⁵ Kiene-phe kia mu bhangesa kuila o kitala kiê kia beta kota mu kelebha, o miẋi ioso ia ditutu iala ndenge, o jithangu jê ji ja di sokolola, o miẋi iê ii ia lebhelela, mukonda dia nzungule ia menha ia kexile mu ku mu tumikisa.

⁶ O jinjila joso ja diulu, ja ta jinga o ikalanga iâ mu jithangu jê; o iama ioso ia mukáu ia vualela jinga moxi dia isasa iê, o miji ioso ia makota ia xikama jinga mu kilembeketa kiê-muène.

⁷ Mu kienhiki muene ua uabhele kiavulu mu unéne uê, ni mu kuzanza kua jithangu jê, mukonda o lundanji luê lua kexile bhu mbanduʼa menha a vulu.

⁸ O misédulu, mu díbhia dia Nzambi, ki i tenene ku mu vungina; o mifaia ki itenene kusoka ni jithangu jê; o mikaxtanhelu ki idile kala o indemvuna iê; o mu díbhia dia Nzambi ki mu kexile muẋi ua di fuanganene ni muene mu kuuabha kuê.

⁹ Ki nga mu bhange, ua uabha muene ni ndumba dia jithangu jê; o miẋi ioso ia Edene, ia kexile mu díbhia dia Nzambi, ia mu kexile ni luimbi.

¹⁰ Kala kiki, o Ngana Nzambi uambe, uixi: Mukonda eie ua di zangula mu kitala kié, o dizoko-zoko dié di dia zangumuka mu, axaxe ka jithangu jé ja di zandela, mukonda dia kitala kié, muẋima ué iú ua di zangeleka.

¹¹ Eme ue nga-nda ku ku bhakula bhu lukuaku lua muiji ua beta o kusuína o miji ioso ndenge, muene ua kà ku bhana kioso kia fuama o ku ku bhanga; mukonda dia ikuma iê nga-nda ku mu texi bhu kanga.

¹² O iiala ia tundu kuengi, ió muene a kuata o uoma muʼaxaxe ka akua jixi, ene a mu batula iá a mu xisa; o jithangu jê ji ja sonokena ku milundu ni mu makôlo, o jisuásua jê jòbukujule kuala o jihungulule joso ja ngongo; o ifuẋi ioso mu ngongo, mu kilembeketa kiê ia tundu-mu, iá a mu xisa.

¹³ O jinjila joso ja diulu jeza mu kutunga mu ngùndu iê, o iama ioso ia mukáu ia diʼongoluela mʼoxiʼa jithangu jê;

¹⁴ mbebhu o miẋi ioso bhu mbanduʼa menha ki i zangalale mukonda dia kitala kiâ, mba i zangula o dizoko-zoko diâ muʼaxaxe ka jithangu ja vundu, mba o ioio ia mu nuâ o menha i di dielela kiá ngoho iene, mukonda dia kitala kiâ; kuma iene ioso a i bhakula muene ku kalunga-ngombe, katé ni ixi ia beta o kutunuka, muʼaxaxe ka anʼa athu a i bhakula ue kumoxi ni afi oso ió a tuluka mu kina.

¹⁵ O Jihova Nzambi uambe kiki, uixi: O kizuua kia tuluka muene mu ifélunu, nga bhangesa kuila ku kale lutu; nga bhangesa kuila o mukiukuluku a u vungina mukonda diê-muene, eme nga kondela o jihungulule jê, o jene ji jemana; o muxitu ua Libano nga u vungu ndombe mukonda diê-muene, o miẋi ioso ia ditutu ia lela mukonda diê-muene.

¹⁶ O miji ioso nga i teketesa ni muxindu ua kibhalu kiê, kioso ki nga mu tuluila mu ifélunu kumoxi ni ió a tuluka mu kina; o miẋi ioso ia Edene, o itulu ni kioso kia beta o kuuabha mu muxitu ua Libano, ni miẋi ioso i nua o menha, ia kexile mu ku di kondela-na-iu o malamba mu ixi ia beta o kuboloka.

¹⁷ Enhá ue a kà tuluka muene muʼalunga mu ku di bunda kumoxi ni iá a a tubula ku xibhata; xi, kua ió a mu kexile ene o lukuaku luê, a xikamene mu kilembeketa muʼaxaxi ka akua jixi.

¹⁸ O ku miẋi ia Edene, nanhi-phe ua di fu-nê ku matunda ni kijingo? Sumbale kiene, maji-phe ua-nda kuselumuka kumoxi ni miẋi ia Edene mu ixi ia beta o kuboloka; ua-nda kuila suualá mu kaxi ka akua mabôlo kumoxi ni iá a a kubujula ni xibhata; muenhú-phe muene Falaó ni mundu uê uoso, Ngana Nzambi ua ki zuela.