Izekiiele 30 - O Mikanda Ikola

O muzambu ua mukuá ua kuzoka ni Ijitu ni kuzoka ni Falaó

¹ Anga o kizuelu kia Jihova kiza kokuami, kiexi:

² Monʼa diiala, zambula, u zuele kuma; O Jihova Nzambi uambe kiki: Kemenu, muexi: Uá! O kizuuʼokio!

³ Mukonda o kizuua kia zukama, xi, kia zukama o kizuua kia Jihova, kia mufumbeji kiʼanda kukala kiene o kithangana kia akua matumbu.

⁴ O Ijitu a-nda ku mu endela kuala o xibhata, hé kua kà kala misusu ia vulu mu Itiiópia, kioso kia-nda kutenuka oso a a tubujula mu Ijitu; o mundu uê hé a kà u ambata ku ubhika, o maxikikilu ê a kà bukujuka.

⁵ Ni Itiiópia, ni Pute ni Ludi, ni difungisa dia athu oso kiá, ni Kube, ni ana a jixi ja te kikutu ni Ijitu, a kà tenuka ku xibhata kumoxi ni ene.

⁶ O Jihova uambe kiki: Oso a a fikidila ue kuala Ijitu, a-nda kua kà di bhala, o ku di zangeleka kua kutena kuê kua-nda kua kà tunuka; tundé kiá bhu Mingidole katé bhu katôndo ka Sevene, bhene bhua-nda kua kà fila ku xibhata, Jihova ua ki tange.

⁷ Ijitu hé ua kà di bhanga ngùndu muʼaxaxe ka jixi jala jingùndu; o jisanzala jê ja kà kala sanzala ja budika ja kambe athu muʼaxaxe ka jisanzala ja kambe athu.

⁸ Anga a kà kʼijiia kuila emeʼeme ngi Jihova, kioso o Ijitu ki nga-nda ku mu ta o túbhia, anga a kà jikinina ene oso a kexile mu ku mu kuatekesa.

⁹ Mu kizuuʼomo o jiphunga a kʼèndela mu jinaviiu, a mu tunda bhu pholo iami phala kuia mu kusasumuisa na Itiiópia ua di jimbi, anga momuʼâ mua kà kala misusu ia dikota kala bhu kumbi dia Ijitu; kuma, tala-ze, ki kʼiza kiá.

¹⁰ O Jihova Nzambi phe uambe kiki, uixi: Eme, mundu ua Ijitu, nganda ku u buikixila ku lukuaku lua Nabukodonozolo, sobha ia Babilonha.

¹¹ Ni muene ni mundu uê kumoxi, ió kene ni kiáxi mu akua jixi, ene a-nda ku ambata, phala nʼa kà sengulula o ixi; hé a kà fomona o jixibhata jâ mu kuzoka ni Ijitu, anga o ixi a kà izalesa ni athu òʼkubule.

¹² O jingiji nga kà ji kukutisa, anga ixi nga kà i sumbisa, ni ku i bhana bhu maku ma athu a bhukumuka, hé o ixi ni kuizala kuê kuoso nga kà i buikisila ku lukuaku lua athu engi; eme, ngi Jihova, nga ki tange.

¹³ O Jihova Nzambi uambe, kiki: O mahamba ue nga-nda kua kà a muanga-muanga, anga ngi zubha-ku o iteka ia Nofe; ki kua kà moneka dingi kilamba ua tokala mu ixi ia Ijitu; hé mʼoxi ia Ijitu nga kà tà-mu uôma.

¹⁴ Anga Pátulu nga kà mu sengulula, o Zouane nga kà mu ta túbhia, o mu Nôno muene mu nga kà bhangela o mabatuilu mami.

¹⁵ Anga o njinda iami nga kà i lunduluila mu Sine, ua di bhanga muene o nguzu ia Ijitu, o mundu uoso ua Nôno nga kà u buikisa.

¹⁶ Mu Ijitu nga kà uika-mu milengu ia túbhia; o Sine ua kà kala ni misusu ia ndumba, o Nôno ua kà baza, o Nofe ua kà kala ni dinhengena mu izuua ioso.

¹⁷ O minzangala ia mala mu Avene ni mu Pibezete ia kʼábua ku xibhata, hé o jimbanza jenhiji ja kà vubuka mu ubhika.

¹⁸ O mu Tafene kuma kua kà vunda, kioso eme ki nga kà bukula momo o jungu ia Ijitu, hé o ku di zangeleka kua nguzu iê kubhua-mu; dituta dia kà mu vungina, o anʼê a ahetu a kà kuzuka mu ubhika.

¹⁹ Kienhiki ki nga kà bhanga o mabatuilu mami mu Ijitu, hé a kà kʼijiia kuila emeʼeme ngi Jihova.

²⁰ Anga ki bhita kuila, ku muvu ua kakuinhi ni umoxi, bhu mbeji ia dianga, mu kizuua kia kasambuadi ku mbeji, o kizuelu kia Jihova kieza kokuami, kuamba:

²¹ Eʼmonʼa diiala, eme nga bukula o lukuaku lua Falaó, sobha ia Ijitu, maji, tala-ze, ka-nda ku lu ta milongo, mba a ku kuta bhu kitanda, mbé o ku lu suinisa, phala nʼa tene kukuata dingi xibhata.

²² Uila kiki, o Jihova Nzambi uambe, uixi: Tala-ze, eme o Falaó, sobha ia Ijitu, nga mu lungulukila muene, o maku mê nga-nda ku mu bukula-nâ, kutale lulu lua di sanze uixi loio lua bukuka kiá, anga ngi mu bhangesa o xibhata iê ku mu sonoka bhu maku.

²³ Anga, o akua Ijitu, nga kà a muangena mu ifuẋi, hé nga uanena mu jixi.

²⁴ O maku a sobha ia Babilonha nga kà a suinisa dingi, anga nga kà ta o xibhata iami bhu lukuaku luê; maji-phe, o Falaó nga kà mu bukujula o maku, hé ua kà kala mu ku kumba bhu pholo ia sobha ia Babilónha kala kiia ni ku kumba o muthu a mu tubula.

²⁵ Eme-phe, nga kà zangumuna o maku a sobha ia Babilonha, maji o maku a Falaó a kà laúka; hé a kà kʼijiia kuila eme ngi Ngana, kioso eme ki nga-nda kuta o xibhata iami bhu lukuaku lua sobha ia Babilonha, o muene hé ua kà i zengela ku thandu dia ixi ia Ijitu.

²⁶ Anga o akua Ijitu nga kà a muangena mu ifuẋi, hé nga kà a uanena mu jixi; o kiókio kiabhu kiene kia kà kʼijiia kuila ememuène ngi Jihova.