Izekiiele 26 - O Mikanda Ikola

O muzambu ua kuzoka ni Tilu

¹ Anga ki bhita ku muvu ua kakuinhi ni umoxi, bhu kizuua kia dianga ku mbeji, kizuelu kia Jihova kieza kokuʼami, kiexi:

² Monʼa diiala, mukonda kuma, o Tilu, ku mbandu ia Jeluzaleme uedi, uixi: Ua di bhé-kiu! O dibhitu dia ifuẋi dia budika! Kia ngi budikila kiá eme! eme nga-nda kuizala kioso muene kia muia kiá ni kubudikʼiki!

³ Kala kiki, o Jihova Nzambi, uambe kiki: Tala-ze, eme uami nga ku lungulukila, eie Tilu, nga-nda kubhangesa kuila miji iavulu a banda mu kuiza kuzoka nʼeie, mukuâ ni musanza ua kalunga ki u bandesa mabhuku mê.

⁴ Miji ienhoio ia-nda kua kà bula o imbaka ia Tilu, o tuthôndo tuê a kà tu lundumuina muene bhoxi; eme anga nga kà xixila o fufutila iê, hé nga kà i bhanga kiditadi kia dikota kila muene bhueteté!

⁵ Ki kala mu kaxi ka musanza ua kalunga, hé ki kituka dianekenu dia manda; mbata eme nga dianga o ku ki tula o njimbu, eme ngi Jihova; muene hé ua kà di bhanga mbole ia akua jixi.

⁶ O anʼê ahatu, ala ku mukáu, a kà a jibha ni xibhata; nda a kà kʼijiia kuila eme ngi Ngana.

⁷ Mukonda, o Jihova Nzambi uambe, kiki: Talenu, eme mu kuzoka ni Tilu, nga-nda ku mu bhekela Nabukodonozolo, sobha ia Babilonha, tundé kusuku, sobha ia jisobha u mu endela ni jikabalu, ni makalu, ni akua kusambela tubalu, ni masoladi, ni kifuẋi kia mundu uavulu.

⁸ O anʼê a ahatu, ala ku mukáu, muene ua kà a jibha ni xibhata, o mu kuzoka nʼeie ua kà ku kandeia jimbonge, u ku tungila imbaka, hè ua kà ku zengela o Kadia-konda.

⁹ O mu kuzoka nʼeie, a kitakula-matadi ua kà ku tudilanâ ku pholo ié, ni kupholo dia imbaka ié, o tuthôndo tué a kà tu bula ni makuua mâ.

¹⁰ O mukonda dia tubalu tuâ o kuvula, o mvindu iâ ia kà ku vungina, o imbaka ié ia-nda kua kà teketa ni kinuminu kia iá a mondala ku jikabalu, ni kia malola, ni kia makalu, kioso o muene kia-nda kua kà bokuena bhu mielu ié, kala kiene mu bokuena bhu mabokuenu ma mbonge iòbule kididi.

¹¹ Muene ua kà diota mu jinzunga jé joso ni ikoto ia tubalu tuê; o mundu ué muene ua kà u jibha ni xibhata, o jiphiladi ja mbonge ié, ja kà lundumukina bhoxi.

¹² Ene hé a kà nhana o umonhi ué, o ima ié ia uenji a kà i bhûnda, o imbaka ié a kà i lundumuina bhoxi, o jinzu jé ja iuka kinéne a kà ji sengulula; anga o matadi mé ni miẋi ié ni fufutila ié, a kà i lunduluila mu kaxi ka menha.

¹³ Hé nga kà zubhaku o kilungutu kia mimbu ié, o dízui dia tukoxi tué, ka kà dʼivua-ku dingi.

¹⁴ Eie-muène hé ngi ku kitula u ditadi dia kabhuetete; hé ua kà di bhanga u dianekenu dia manda ma atona, ki mungu dingi a kà ku tunga; mbata eme ngi Jihova nga ki zuela, Jihova muene ua ki tange.

¹⁵ O Jihova Nzambi ua tange kiki, kua Tilu; O ikolo ki ia-nda kua kà teketa ni muxindu ua kinuminu kia kibhalu kié, kioso athu a mu a toma ki aia ni kukumba, mu kuila a mu bhanga kijibha ki kuatesa uoma muʼaxaxe ké?

¹⁶ Ilamba ioso ku musanza a kà tuluka ku iandu iâ, hé a kà di vulumuna o mavunga mâ, o izuatu iâ ia kubolodala a kà i zula; a kà zuata kimbulambula a kà xikama mu mavu hé aia ni kuteketa ithangana ioso; anga a kà kakuka mukonda dié-eie.

¹⁷ Hé a kà ta mbùndu ia ku ku dila, ni kuila: Kia bhiti kiebhi o kujikinisa, eie, tata, ua tungile kiambote, u mbanza ia fumana, ua kexile u kindanda mu musanza ua kalunga; eie ni athuʼoso a tungile momué, mua kuatesa jinga uôma ku oso eza ku mi hindula a tunda o makanga!

¹⁸ O kiki-phe, o ikolo ia kà teketa, mu kizuua kia kibhalu kié; o ikolo (tuzanga) iala mu musanza ua kalunga ia kà teketa, ki ia kà mona o utundilu ué.

¹⁹ Mukonda o Jihova Nzambi uambe kiki, uixi: Kioso eme ki nga-nda ku ku bhanga ngùndu hé u kala u mbanza iòsengulule mukuá ni jimbanza ki ji xikina dingi ku tunga-mu, kioso ki nganda kubhanga kidikungu ku thandu dié, anga o ndumba ia menha i ku vungina,

²⁰ kuabhu-phe kienhókio nga-nda kuà ku tuluila kiá kumoxi ni iá a tuluka mu kina, ku makulu ni makombe, hé nga kà ku zekesa muene mu ididi ia seiela kinéne bhoxi mu ngongo, mu ididi iòkulu ia ikangalakata, kumoxi ni iá a tuluka mu kina, mbebhu ka ku tunge dingi; anga nga kà ta o matunda mu ngongo ia athu a muenhu.

²¹ Eie-phe nga-nda kuà ku bhanga kima ki di uanesa kinéne, mukonda kua kà moneka dingi, katé kiá ku hádia ni hádia, né a ku sota, kua kà moneka dingi, Jihova Nzambi ua ki tange.