Izekiiele 24 - O Mikanda Ikola

O kifika kia ímbia

¹ O kizuelu kia Jihova anga kiza kokuami, mu muvu ua kávua, ku mbeji iakakuinhi, mu kizuua kia kakuinhi, kiexi:

² Monʼa iala soneka o dijina dia kizuuʼiki, o kizuua kienhiki muene; mukonda o sobha ia Babilonha iú zukama ku Jeluzaleme, mu kizuua kienhiki muene.

³ O dibhata didi dia kuẋinuka, tela-diu kifika, u di ambele, kuma: O Jihova Nzambi uambe, kiki: Ta ímbia bhu jiku, o ki u i ta, u ta-mu menha.

⁴ U bhongoluela-mu iẋinhi iambote, o iẋinhi ioso muene iambote, ni matabela ni iphenza; u izalesa ue ni ifuba iòtungule.

⁵ Kuata ue o kibhaku kia beta kota mu kilunga, o ifuba iê u i bhange jihuinhi bhoxi dia ímbia; u i bhangese kufuluka kiambote nda o ifuba iala moxi diê i tene kúbhia.

⁶ Kala kiki, o Jihova Nzambi uambe kiki, uixi: Kokolo dia mbonge i kala kijibhanganga ni ímbia i fuáfua kifulu, o kifulu kiene ki ki tundu momuʼê! u zanze mʼombia kiẋimbuʼé-kiẋimbu, o muene kana ku mu xinda dikanda;

⁷ mukonda o manhinga mê ala muʼaxaxe kê, ua ma tula ku thanduʼa ditadi dia kabhuetete; ka ma zunzila bhoxi, kana, phala ka a vungine ni mavu.

⁸ O manhinga mê anga ma tula bhu ditadi diedi bhuetete, phala ka ma vungine, mbé o kuzangumuna o njinda, ni kuvutula o phonzo.

⁹ Uila kiki, o Jihova Nzambi uambe, uixi: Lamba dia mbanza i kala kijibhanganga! Eme uami nga-nda ku uika dijiku dia dikota.

¹⁰ Bhongolola jihuinhi ja ndumba! Uika túbhia; lamba o xitu, ximbula o muzonge, tôua na-iu ni ima ia mazumba, o ifuba iende ni kuuama.

¹¹ Kienhokio-phe, o ímbia ua kà i tula hanji ia hatu ku makala a uama túbhia, phala i teme, o ngulele iê ioso i jokote, o ima ioso ia ufusa moxi diê i sangumuke, o kifulu kiê ki bhue-mu.

¹² Ua bhuila, o ukumbu ua mu-bhu; maji o ifulu iê ia vulu ki i tundu luua momué; o ku túbhia-phe o ifulu ienʼii ia kà tunda.

¹³ O mu ufusa ué ua ndumba, muene muala o kusembama kué, kuma eme nga mesenene ku ku zelesa, eie-phe ngué ku di zelesa; ki mungu dingi a kà ku sukula ku dixidilu dié, katé eme ki ngi bhanga kunhohesa o njinda iami ku thandu dié.

¹⁴ Eme, Jihova, nga ki tange: Kiene muene ki kia-nda kukala; nga-nda ku ki bhanga muene; ki nganda kuvutuka dingi kuema; ki nga-nda kukondeka ue mba ngó nga kà dielesa; kala kia di fu o jinjila jé ni ibhangelu ié, kiene ue kia kà ku fundisa; Jihova Nzambi ua ki tange.

O kúfua kua muhatu ʼa Izekiiele

¹⁵ Anga o kizuelu kia Jihova kiza kokuami, kuila:

¹⁶ Eie monʼa diiala, tala, kiókio kiene mu kuinda o mesuʼé nga-nda ku ku katula-kiu mu lumoxi ngó; maji kua-nda ku di tata, mba u dila, mba mu mesu mé mu tunda kisoxi.

¹⁷ Mikemu ié suikika-iu; o athu a fu ku a zuatele ndombe; kutila o dizamba dié ku mútue, o inama ié tá na-iu mu jisabhatu; o pholo ié kana ku i sueka, kua kà die ue o mbolo i ku tumikisa o athu.

¹⁸ Kienhiki anga athu ngʼa tangelakiu mu kimene, o kutula ku kiemba muhatuʼami uafu; mu ku bhixila mu kimene nga bhange muene kala kia ngi tendelesa.

¹⁹ O athu hé a ngʼambela, exi: Manhi ku tu ijidisa kioso kia lombolola o ima i ua mu bhangʼiii?

²⁰ Eme-phe nga ambela, ngixi: O kizuelu kia Jihova kieza kokuami, kuila:

²¹ Tangela o diembu dia Izalaiele, uixi: O Jihova Nzambi uambe kiki: Talenduze, kuma eme o dibhezelu diami nganda ku di buakulula ene o matunda a mbonge ienu, o kima kiene mu kuinda o mesu menu, o disangulukilu dia miẋima ienu; o anʼenu a mala ni anʼenu a ahetu, u mua xisa, a kà tenuka ku xibhata.

²² Anga mua kà bhanga uila ki nga bhange eme: Ki mua kà di vunga jipholo mba mua kà dia mbolo i mi tumikisa athu.

²³ Hé mua kà kala ni mazamba menu ku mítue, o jisabhatu jenu ja kà kala ue ku inama ienu; ki mua-nda kua kà di tata mba mua kà dila, maji mua kà hohela mu ikuma ienu hé mua kʼàia ni kukema mudienu, iá kuku, iá koko.

²⁴ Kienhiki-phe o Izekiiele ua kà mi kala muene o kijimbuete; kala kiá ioso ia bhange muene, enu uenu kiene ki mua kà bhanga; kioso o imʼiii ki ia kà mi bhita, kiene ki mua kà kʼijiia kuila eme-muène ngi Jihova Nzambi.

²⁵ O ku mbandu ié-phe, eie monʼa diiala, kia-nda kua kà bhita, kuila, mu kizuua eme ki nga-nda ku a katula o mbonge iâ, o matunda a makembu mâ, kiene mu kuinda o mesu mâ, kia didila o miẋima iâ, o anʼâ a mala ni anʼâ a ahetu,

²⁶ mu kizuua kienhokio ki kuanda kua kʼèza muthu ua subhuka-ku phala ku kuivisa na-kiu mu mátui mé?

²⁷ Mu kizuua kienhokio-phe, kiene kiua kia-nda kua ku jikula o dikanu dié, mu kuambela ió ua subhuka-ku; anga ua kà kuata kuzuela, kua-nda kua kà kala dingi u dibubu mu kithangana kia dikota; kienhokio eie ua kà di bhanga u kijimbuete kia isunji ni madiuanu phala ene, nda a kà tene ku kʼijiia kuila ememuène ngi Jihova.