Izekiiele 23 - O Mikanda Ikola

Ohola ni Oholiba, o idianzunga iiadi

¹ O kizuelu kia Jihova anga kiza dingi kokuami, kixi:

² Monʼa iala, tata, kua kexile ahatu kiiadi, anʼa kamama.

³ Enhá anga a di bhanga iuaia mu Ijitu; a kituka idianzunga mu undenge uâ; mu Ijitu muene mua a bubatela o Jithulu jâ, muenhomo muene mua a xaxatela ku mele, kiala hanji mizeletete, ni ku a xaxata o mele a uzeletete uâ.

⁴ O majina mâ enhá: Ohola, o dikota, ni Oholiba, dia ndenge; ene-phe a kexile ami, anga a vuala anʼa mala ni anʼa ahetu; o mu kulombolola o majina mâ, Samádia muene Ohola, o Jeluzaleme Oholiba.

⁵ Ohola hé u di bhanga kidianzunga kioso kiala hanji uami; anga u di uabhela ni jisaii jê, o akua Asídia, a zukamene na-u.

⁶ A zuata jinga izuatu ia azulu, a tolomoka kiambote, jinguvulu, minzangala i kuata luimbi, makuenze a sambela ku jikabalu.

⁷ Kienhiki, muene, ene a bhange na-u o undumbu, mukonda a di bhangele ene kiá a suku-ku ku ungana ni kuiuka mu ana oso a akua Asídia, o muene ue enhó ene a mu uabhelele o ku kuata-nâ o usaii; o iteka iâ ioso hé u di kasanesa na-iu.

⁸ O ufusa uê-phe, ua tundu na-u ku Ijitu, nguê ku ueha; mukonda ene a mu zeka jinga tundé mu undenge uê, ia a mu xaxata ni ku mu kuata-kuata o jithulu ja uzeletete uê, ia a mu lunduluila jinga o ima iâ ia bolo.

⁹ Kala kiki, eme ue nga mu bhakula kiá bhu lukuaku lua jisaii jê, bhu lukuaku lua anʼa akua Asídia, muene a uabhelele o ku kuatanâ usai.

¹⁰ O ene ia a mu zula tuxi-a-athakala, o anʼê a mala ni a ahatu a mu ambata-nâ, maji o muene a mu jibha ni xibhata; iú ua fumana muʼaxaxe ka ahetu hi akuâ, iá a mu te mu mimbu.

¹¹ O ndengʼiê Oholiba kia ki mono, ua beta dingi o kuvudisa o huiii ia uhabhu uê, o kota diê ndenge, o uuaia uê anga u beta o kuvula ua phangʼiê ndenge.

¹² Anga u di uabhela kinéne ni anʼa akua Asídia, o ilamba, ni atumini, ni iá a zukamene na-u a kexi mu zuata ni utoko uoso, o makuenze akua kusambela ku jikabalu, ene oso minzangala i bheka luimbi.

¹³ Anga ngi mona kuila ua di kasanesa muene; ene kiiadi kiâ o njila iâ iene imoxi.

¹⁴ Hé o maufusa mê u ma vudisa dingi, mukonda ua mono ifikula ia mala, iòsete ku mutôto uaʼnzu, ifikula ia mala ma akua Kaldeia a i teka ni husu;

¹⁵ a di kutu jiphonda bhu inhonga ni imazamba ia makota ku mítue, ene oso a di-fu jikabhitango, edi kala anʼa Babilonha, ala mu Kaldeia, mu ixi iâ mua a vualela.

¹⁶ O muene kia edi suií, a mu touo mu mesu, anga u tuma jiphunga ku Kaldeia mu kuʼexana.

¹⁷ Bhenhobho, ana mu Babilonha, hé eza kua muene, bhu hama iê ia jihenda ja usai, anga a mu kasanesa ni maufusa mâ; o muene ue hé u di kasanesa-nâ; o kia zubha ku di kasanesa-nâ, muene ue fokoso ia mu kuata anga u a xa.

¹⁸ Mu kubhanga kiki, ua tukulula o maundumbu mê moso, ua di zula tuxi-a-thakala, bhenhobho, ki nga ki mono muẋima uami kokuê ua tundu-ku, kala ue ki ua tundu kiá kua kota diê.

¹⁹ O muene-phe ua vudisa dingi o mauhabhu mê, kiʼaia ni kuxinganeka o izuua ia unzangala uê, kioso kia kituka kiuaia mʼoxi ia Ijitu.

²⁰ Hé u di uabhela ni jisai jê, edi o jixitu kala jixitu ja jibulu, aia ni kubhubha o ima kala ioio i bhubha ku jikabalu.

²¹ Mu kubhanga kienhiki, eie ua bhekesa dingi o kubanza o kusaluka kua unzangala ué, kioso akua Ijitu kia kexi mu ku kuxaxata o mele mé ni kukuata-kuata o jithulu ja unzangala ué.

²² Kala kiki, eie Oholiba, Jihova Nzambi uambe, kuma: Tala, hádia nganda kufunhisa o jisai jé, ji ua kuatelele o fokoso eie ua di kumu-nâ, anga ene oso ngʼa bhongolola nʼa kuendela ku mbandu joso mu kuzoka nʼeie.

²³ Ene ana a akua Babilonha, ni akua Kaldeia oso, a tokala mu Pekode, ni mu Soua, ni mu Koua, ni ana oso a Asídia ejila-nâ kumoxi, o minzangala i bheka luimbi, o ilamba ni atumini oso, ni tubhitango ni athu a fuma, ene oso a sambela ku tubalu.

²⁴ Anga a kʼèza mu ku kúlua ni makalu, ni matènda ni malola ni ndumba dia mundu; hé a di zeleka mu jimbandu, mu ku kúlua, a zakela jingubu ni kadiakonda ni jikapasete; hé nga kà a bhana o kutena kua kufundisa, ene anga a kà ku fundisa mu ufundixilu ua jingonge jâ ene.

²⁵ Mu kuzoka nʼeie nga kà ku kuatela difuba, ene anga a kà ku fundisa ni njinda; a kà ku kumbuna o dizulu ni mátui, o kioso kia kà ku subhuka-bhu kia kà di bhala ku xibhata; o anʼé a mala ni anʼé a ahetu, a kà ku tambula na-u, o uoso hanji ua kà ku subhuka-ku à ka muoha mu túbhia.

²⁶ Eie ue o izuatu ié a kà ku zula-iu, o ima ié ia makembu a kà ku tambula-na-iu.

²⁷ Hé nga kà zumbula kienhiki o phulu ioso momué, ni maufusa é oso, u ua tundu-nâ mʼoxi ia Ijitu; o mesu mé ku ma zambula dingi kua ene, mba ua kà xinganeka dingi ku Ijitu.

²⁸ Mbata Jihova Nzambi uambe, kiki: Tala-phe, eme nga-nda ku ku bhakula bhu maku ma ió oso a ku ibhila eie, bhu maku ma ió oso u ua xile, kia ku kuatele o fokoso.

²⁹ Ene-phe a-nda ku ku vutuila ni luma, hé kikalakalu kié kioso a kà ki ambata, eie a ku xá tuxi-a-thakala, ua zuluka muene; anga o jisonhi ja undumbu ué ji tukuluka, ni maufusa mé ni uhabhu ué.

³⁰ O ima ienhiʼii iene muene ia-nda kuà ku bhanga, mukonda eie ua bhange undumbu mu ku kaiela o matumbu, eie ua di kasanesa ni mahamba mâ.

³¹ Uendela jinga mu njila ia kota dié; kala kiki o kopho iê-muène eie ue nga-nda ku ku bhana-iu bhu kuaku lué.

³² Mukonda o Jihova Nzambi, uambe kiki: O nganza ia kota dié, ia zongo i ia zanze, eie ue ua-nda ku i nua muene; ua kà kituka jingolela ni muôndo; o iene, mu ku i zonga, iambata nzungule.

³³ Ua-nda kuizala uhôlua ni misusu; o nganza ia phangʼié Samádia ia kimbuua ni kibuika.

³⁴ Eie-phe uanda ku i nua muene anga u i zunzumuna, katé ni ituetu iê ua-nda kua kà i kunha, o mele mé ua-nda ku ma vuza; mukonda eme Jihova Nzambi nga ki zuela.

³⁵ Kala kiki, O Jihova Nzambi uambe, kuma: Mukonda eie ua ngi jimbi, eie ua ngi takuila kuema dié, kuabhu-phe, ua-nda kuambata ue ni phulu ié ni maundumbu mé.

³⁶ O Jihova anga u ngambela, uixi: Eie monʼa diiala ua-nda kufundisa muene Ohola ni Oholiba? A londekese-phe o maufusa mâ.

³⁷ Kuma a te jiphanda, ala ni manhinga ku maku mâ; a te muene jiphanda ni iteka iâ, katé ni anʼâ a vuala nʼeme, a a bhitisa muene mu túbhia, phala ku a buikisa.

³⁸ Iá a te-ku dingi o ku ngi bhanga kiki: O kididi kiami kia dibhezelu a ki kasanesa mu kizuua kiene kimoxi, o jisabhalu jami a ji sebulula.

³⁹ Mbata o anʼâ kioso kia a satela jinga ku iteka iâ, mu kizuua kienhokio muene, eza jinga ue dingi mu dibhezelu diami phala ku di kasanesa; tala, kienhiki muene kia bhange muʼaxaxe ka dibhata diami.

⁴⁰ O kia di té-ku dingi, o mala a a tuma jinga ku a takana muene ku makanga; a a tumikisa muene phunga, o kiki ene a bhixila kiá; o ki ua a mono, henda ja kuiza kiá, eie ua zouo, ua di uaie mu mesu, eie ua zakela makembu.

⁴¹ Eie ua xikama ku hama, ia iuka kiambote, ia kijingu, ia kexile bhua lulama ni meza òzale; o ku thandu dia mesa eie ua tula-ku o uasu uami ua dizumba ni majiʼami.

⁴² O muene ua kexile kumoxi ni dízui dia kilungutu kia mundu ua tana, mu athu a kambe o majina muejila ue ni jihôlua ja kikangalakata; ia a te ue o malenge mu maku mâ ni itundu ia ungana ku mítue iâ.

⁴³ Bhenhobho nga zuela kua iú ua kukila kiá mu jiphanda, ngixi: Kindala a-nda ku di kasanesa kiavulu ni muene, o muene ue ua-nda ku di kasanesa-nâ kiavulu.

⁴⁴ Ene anga a mu bokona, kala muthu ua mu bokona ku kidianzunga; Kienhiki muene kia bokona jinga kua Ohola ni kua Oholiba, o ahetu a sembama ni uuaia!

⁴⁵ Kala kiki, a kà a fundisa kuala athu aiuka, a kà a fundisa muene kala kia fundisa ahatu a ta o jiphanda, mukua ni kia fundisa o ijibhanganga; mukonda ene ala ati-a-jiphanda, o ku maku mâ kuala manhinga.

⁴⁶ Mukonda o Jihova Nzambi, uambe kiki: Nga-nda kubhangesa kuila kifuẋi kia dikota ki banda mu kuzokanâ, hé ngʼa bhakula mu ku a bhanga ufe ni ku a bhûnda.

⁴⁷ O kifuẋi anga kia kà a bûba ni matadi, a kà a toma-toma ni xibhata jâ; o anʼâ a mala ni anʼâ a ahetu a kà a jibhila-nâ, o jinzu jâ a kà ji ta mu túbhia.

⁴⁸ Mu kubhanga kiki, nga kà zumbula o kusembama kua ʼxi, mbé ahatu oso a a sake nʼa tambule-ku phangu, phala ka bhange dingi kala ki mua sembama enu ni uuaiʼiki.

⁴⁹ Anga o kusembama kuenu mua kʼenda na-ku ku thandu dienu, o ituxi ia iteka ienu mua kʼaia na-iu; kiene ki mua-nda ku kʼijiia kuila eme ngi Jihova Nzambi.