Izekiiele 22 - O Mikanda Ikola

O maufusa a Jeluzaleme

¹ Anga o kizuelu kia Jihova kiza kokuami, kuamba:

² Eie-phe, monʼa diiala, ua kà fundisa, ua kà fundisa o mbanza ia kijibhanganga? O maufusa mê moso-phe, muʼijidise na-u muene.

³ U zuele, uixi: Jihova Nzambi uambe kiki: Lamba dia mbanza ioso iia ni kulunduluila o manhinga muʼaxaxe kê-muène, phala o kithangana kiê ni kiza-bhu! Uia ni ku di bhangela o iteka i mu bhanga, i mu bhanga o phulu, phala ku di kasanesa!

⁴ Mu manhinga mé, mu ua lundulula, ua di bhange u mukua mulonga; o mu iteka ié i ua di songela, ua di kasanesa; eie ua bhekesa o izuua ié ku bhixila, ueza-phe kiá bhu dizubhilu dia mivu ié; kiene-phe ue ki nga ku bhangela u dilebhu dia ifuẋi, a ku ta muôndo mu jixi joso.

⁵ O miji ioso ia ku kala bhua butu, ni ia ku kala dikanga, ia kʼènda ni ku ku ta muôndo, eie uene ni fuma ia ibha, uezala ni kikenene.

⁶ Tala-ze, o ilamba ioso ia Izalaiele, kala muthu kia mu soko o nguzu iê, a ku tumina jinga, mbé o kuẋamuna o manhinga.

⁷ Ni tata ni mama a di tunina jinga na-u momué; o ngenji a mu bhondelekela jinga momué; o hukunhu ni mutudi momué a a talesela-mu hadi.

⁸ O imbamba iami ikôla ua i buakulula, o jisabhalu jami ua ji sebulula.

⁹ O iiala ia hame ue ia kexile momué, phala kuzunza manhinga; momué muene mua dila jinga ku milundu; muʼaxaxi kê muene mua bhangela jinga o phulu.

¹⁰ Tata a i zudila momué (Katé o jisonhi jê kia ji mono ku tuana); o muhatu uala mu ijila a mu tela jiphanda momué.

¹¹ Iú ua bhange ufusa ni muhatuʼa mukuá momué; o ió ua kasanesa kiá muene mukaji a monʼê; o mukuá dingi ua te jiphanda, muʼaxaxi kê-eie, ni phangiʼê ia muhatu, monʼa tatʼâ.

¹² Mu kaxi kê eie a tambuila-mu ue ni nduta ia kuzunza o manhinga; dikongo ua di vualesa ni kuvudisa o kitadi ku uenji, iene o ima i ua tambula, eie uemina mukuenu ni ku mu tatesa; maji eme ua ngi jimbi, eme ngi Jihova.

¹³ Eme nga beta ku maku mami mu ku zoka ni unjenje ué, u ua bhange, ni mukonda dia kihaxi kia manhinga kia bhiti momué.

¹⁴ Mbé o muẋima ué uanda kua kà di fikidila muene? Manhi o makuʼé a-nda kua kà kala muene ni nguzu mu makumbi u nga-nda kua kà ta o maka ni eie? Eme ngi Jihova nga ki tange, nga-nda kua kà ki bhanga muene.

¹⁵ Nga-nda ku ku muangena mu ifuẋi, nga-nda ku ku muangena mu jixi, anga o ufusa ué ngi u bhuisa-ku.

¹⁶ Momué eʼmuene, muene-muène mua kà ku sebuluila bhu mesu a ifuẋi ia mundu, anga ua kà kʼijiia kuila eme ngi Jihova.

¹⁷ Anga o kizuelu kia Jihova kʼiza kokumai, kuila:

¹⁸ Monʼa diiala, tata, o muiji ua Izalaiele, phalʼeme, ua di bhange dixidilu; ene oso a di bhange ngòndo, edi kala utenda-utadi ni ximbu iala mu kaxi ka dijiku; a kituka kiá ngoho tuji tua zunzumuka ku phalata.

¹⁹ Kala kiki, o Jihova Nzambi uambe, uixi: O kiki-phe enuʼoso mua di bhange mu makololo, talenu eme nga-nda ku mi bhongoluela mu kaxi ka Jeluzaleme.

²⁰ Mukua ni kia bhongoluela o phalata, ni ngòndo, ni felu, ni ximbu, ni xitanhu, bhu kaxi ka dijiku, phala ku i zukutila katé ki i di zunza kumoxi, kiene ue ki nga-nda ku mi bhongolola mu njinda iami ni kutema kuami, anga ngi mi xá bhenhobho hé ngi mi zunza.

²¹ Nga-nda ku mi bhongolola, hé ngi bhuselela ku thandu dienu o túbhia tua njinda iami; anga tu mi zunza mu kaẋí kê.

²² Kala kia zunza o phalata mu kaxi ka dijiku dia túbhia, kiene ue kiá-nda ku mi zunza enu mu kaxi kê; anga mua kà kʼijiia, kuila, eme ngi Jihova, kioso ki j nga kà lundulula o njinda iami ku thandu dienu.

²³ O kizuelu kia Jihova, anga kʼiza kokuami, kuila:

²⁴ Eie monʼa diiala, mu tangele, kuila: Eie u ixi ia xidi, ia kambe o mvula, bhu kizuua kia njinda.

²⁵ O kikutu kia ufe, kia jipolofeta jê, kiala mu kaxi kê; mukua ni hoji ia mu zuma, ia lundama o mbole; ene uâ a dia o mienhu; o jimbongo ni ima iate kiavulu a i ambata, a vudisa nzungule ia atudi mu kaxi kê.

²⁶ O jinganga jâ, aia ni kutondala o kitumu kiami, o imbamba iami ikôla, a i kasanesa; o muthu ua iuka ni mukua phulu ene ka mu tungula, mba a tongolola iú ua xidi ni iú ua zele; o jisabhalu jami, ka xikina ku ji tala mesu, kienhiki ia a ngi sebulula mu kaxi kâ.

²⁷ O adiakime, mu kaxi kâ, edi kala imbùngu ia xikamena ku kuata mbole, mbé kuzunzumuna o manhinga, phala kusengulula mienhu, ni kukaiejela o unjenge.

²⁸ O misesedi iâ, ene mu ku a bebela ni hâla ki iòtoue, aia ni kumona kingoho, a zumbula makutu, exi: O Jihova Nzambi ua zuela kiki; manhi o Jihova muene ka zuela kima.

²⁹ A bhondeleka muene kiavulu o mundu uala mu ixi, enda ni kunhana, a bhanga kusuina ku phulungu ni iú ua tate, o ua tundu dikanga a mu bhondeleka muene, sè kikuma.

³⁰ Eme nga sota muthu mu kaxi kâ u tena o kuxita o kimbaka nʼa kale bhu kaxi kami ni dizungu dia budika ku kimbaka mu ixi iii, phala eme ki ngi i jikinise; maji nga mu lémbua.

³¹ Kiene-phe ki nga lunduluila o njinda iami ku thandu diâ; eme nga a jimi o mbutu ni túbhia tua kutema kuami; o jinjila jâ eme nga ji bhangesa muene kusonokena ku thandu dia mítue iâ, Jihova Nzambi ua ki tange.