Izekiiele 20 - O Mikanda Ikola

O maufusa a dibhata dia Izalaiele kioso kia tundu mu Ijitu

¹ Anga ki bhita kuila, mu muvu ua kasambuadi, bhu mbeji ia katanu, mu kizuua kia kakuinhi ku mbeji, kiene kieza kokuami o ikulakaji ia Izalaiele, phala kuibhula Jihova: anga a xikama bhu pholo iami.

² Kienhokio-phe o kizuelu kia Jihova kʼiza kokuami, kuila:

³ O Jihova Nzambi uambe kiki: Eʼ monʼa muthu, zuelela adiakime a Izalaiele, u a tangele, kuma: O Jihova Nzambi ua zuela, uixi: Enu mueza ku ngʼibhula eme? Nga di lokela muene, kuma enu ki mua-nda ku ngʼibhula, lémbue.

⁴ Eie monʼa muthu, tata, o iá ua-nda ku a fundisa, u a fundisa muene? ijidisa-u-phe o maufusa a jitata jâ;

⁵ ua ambela kuma: O Jihova Nzambi uambe kiki: Mu kizuua ki nga solele Izalaiele, nga zanguile o lukuaku luami ku luvualu lua Jakobo, eme nga di-tukuluila kua ene mu ixi ia Ijitu, hé ngi leka o lukuaku luami kua ene, ngixi: Eme Jihova Nzambi ienu.

⁶ Mu kizuua kienhokio, nga a zanguila o lukuaku luami, hé nga a lokela ngixi: nga-nda ku mi katula mʼoxi ia Ijitu ni ngi mi bheka mu ixi i nga dianga ku mi muena, ixi i zunzumuka lete ni uiki, i ia di-bhange iene o makembu a jixi joso.

⁷ Kienhokio-phe eme nga ambelele, ngixi: Muthu ni muthu a texi o maufusa ê oso a mu uabhela ku mesu-mê; ki mu di kasanese ni iteka ia Ijitu; Emiʼeme ngi Jihova Nzambi ienu.

⁸ Maji ene a ngi ẋinukina, nguâ ku ngʼivua; o maufusa oso a a uabhelele ku mesuʼâ ki bhu kexile ngó muthu uandalele ku a texi, mba kuxia o iteka ia Ijitu; bhenhobho-phe ngixi o njinda iami ngi i lundulula ku thandu diâ-ene, phala o kutema kuami ni kutenene kua ene mu kaxi ka oxi ia Ijitu.

⁹ O ki nga bhange-phe kiá, nga ki bhangela ngoho o henda i nga kuatela o dijina diami, mbé ka di kasanese bhu mesuʼa akua jixi, mua kexile ene, mu kaxi kâ, a mono kioso ki nga di tukulula kua ene, phala ku a katula mʼoxi ia Ijitu.

¹⁰ Eme nga a katula muene mʼoxi ia Ijitu, eme ngaii-nâ mu kikangalakata.

¹¹ Eme nga a bhana o jingonge jami ni ku a londekeza o mabatuilu ami, a bhingi kuila se o muthu u mʼaluka, muene mua muena o muenhu.

¹² Nga a bhana ue o jisabhalu jami, mbé ji kale kijimbuete bhu kaxi kami ni ene; phala a tene kuijiia kuila emiʼeme ngi Jihova ngi tena ku a zelesa.

¹³ Maji-phe o dibhata dia Izalaiele a ngi ẋinukina mu kikangalakata, hé a di tuna o kuenda mu jingonge jami, o mabatuilu mami a ma tènde, a bhingi se o muthu u aiuka, muene mua muena o muenhu; o jisabhalu jami a ji sebulula kinéne; anga ngiia ngixi: nga-nda ku lundulula o njinda iami ku thandu diâ mu kikangalakatʼumu, phala ku a jikinisa.

¹⁴ O ki nga bhange-phe, nga ki bhangela ngoho o henda i nga kuatela o dijina diami, phala ka di sebulule ku mesu a miji ioso a mono kioso eme ki nga a tundisa mu Ijitu.

¹⁵ Sumbala kiene, maji eme nga leka lukuaku luami kua ene mu kikangalakata, phala o ku a fudisa kubokona mu ixi i nga a bhele, ioio i kunguluka o lete ni uemba, ia di bhange iene o makembu a jixi joso;

¹⁶ kuma o mabatuiluʼami a a tènde, ia a fulu kuenda mu jingonge jami, o jisabhalu jami a ji sebulula; mukonda o muẋima uâ ua kexile mu kaiela o iteka iâ.

¹⁷ Né hanji-phe kienhokio, o diesu diami dia a loloka muene, phala ki ngʼa jimise o mbutu, mba ngʼa jikinisina mu ixi ia kisèkele.

¹⁸ Maji, o anʼâ, eme nga a tangelele mu ixi ia kisèkele, ngixi: Kana kuenda mu jingonge ja jitata jenu, mba muʼaluka o mabatuilu mâ, mba mu di kasanesa ni iteka iâ.

¹⁹ Kuma eme ngi Jihova Nzambi ienu; endelenu mu jingonge jami, muende ni kualuka o mabatuiluʼami, muie ni ku a bhanga.

²⁰ Endenu ni kukolesa o jisabhalu jami, mbé ji kale kijimbuete bhu kaxi kʼenu nʼEme, phala mu kʼijiie kuila Eme ngi Jihova, Nzambi ienu.

²¹ Maji, o ana ue, a ngi balukila, a fulu kuenda mu jingonge jami, a di tunu kualuka o mabatuilu mami, a bhingi kuila se o muthu u aiuka ni ku a tumaka, muene mua muena o muenhu; ene-phe o jisabhalu jami a ji sebulula; kiene-phe ki ngʼedila ngixi: o kutema kuami nga-nda ku ku lunduluila ku thandu diâ, phala o njinda iami i di kumbidile kokuʼê mu kikangalakata.

²² Maji nga sukamesa o lukuaku luami, nga ki bhangela o henda ia dijina diami, phala ki di bonge malebhu bhu mesuʼa akua jixi, a muene kioso ki nga a tundisa.

²³ O mu ixi ia kisèkele ue, nga a zengelele kiá o lukuaku luami phala ku a muangena mu kaxi ka miji iengi ni ku a sukumuina mu jixi;

²⁴ mbata o mabatuilu mami ka ma bhange, o ngonge jami a ji tènde, ia a sebulula o jisabhalu jami, o mesu mâ a ma lungisa mu ku kaiela o iteka ia mahamba ma jitata jâ.

²⁵ Kiene ue kia ngi bhekesa o ku a bhana o jingonge ki ja uabha, ni mabatuilu a bhingi kuila ene uâ ka tena ku-laiela-mu;

²⁶ eme nga a kasanesa mu maujitu ma ene-muène, ma kexile mu ku bhitisila mu túbhia ima ioso i jikula o divumu; phala o ku a jikinisa, mbé ejiie kuila eme ngi Jihova.

²⁷ Kala kiki, eie monʼa muthu, ambela o dibhata dia Izalaiele u a tangele, kuila: Kienhiki kiambe Jihova Nzambi, uixi: Hanji, mu imʼiii, jitata jenu a ngi lebhula, ia a ngi tondalela.

²⁸ Mukonda, kioso ki nga zubha o ku a bokuesa mu ixi i nga a lekelele o lukuaku luami, phala ku a bhana-iu, ene-phe bhenhobho a kengelela ku tumilundu tuoso tua di leka, ni ku miẋi ioso ia-di-zandela, ia a satela o jisata jâ ja mahamba kuenhoko, ia a lenguluisa o ku ngi lokalala o njinda iami ni kubhana o maujitu mâ kuenhoko, ni mazumba mâ ma mbote a ma tula ue kuenhoko, ni makunua mâ kuenhoko ue kua ma lunduluila.

²⁹ Emiʼeme nga a tangela, ngixi: Tala dia kidifua kiahi, kuene ku mua muiʼoko? O dijina diê muene Bamahe, té mu kizuua kia lelu.

³⁰ Kala kiki, o dibhata dia Izalaiele ambela-diu, uixi: O Jihova Nzambi uambe kiki: Mua muia ni ku di kasanesa enuʼenu, kala kia jitata jenu? Enu mua mu di bhanga mu jindumbu ni isunji iâ ene?

³¹ O kioso enu ki mua mu bhakula o maujitu menu, anga mu bhitisa anʼenu mu túbhia, ki kidi kiene kuila enu ue mua di kasanesa ni iteka ienu ioso, katé mu kizuua kia lelu? Enu tata, mu dibhata dia Izalaiele, hádia mu ngʼibhula? Jihova Nzambi uixi: Kikola! Enu hádia ki mua-nda ku ngʼibhula dingi.

³² O kia mʼiza ku muẋima uenu, ki mungu kia-nda kubhita, ki mua mu kuila muexi: Tua mesena kukala mukuâ ni akua jixi jengi, kala o miji mu ngongo, a mu bhikila o miẋi ni matadi.

³³ Kikola! Eme ngi Jihova Nzambi! Kuma ni lukuaku lua nguzu, ni lukuaku luòlama, ni ku mi lunduluila o njinda, nga-nda ku mi tumina muene.

³⁴ Anga nga kà mi katula mu kaxi ka ifuẋi, hé ku jixi joso ku mua di muangena ngi mi bhongolola-ku ni lukuaku lua nguzu, ni ʼkuaku luòlama ni ku mi lunduluila o njinda.

³⁵ Hé nga kà mi bheka mu kikangalakata kia akua jixi; muenhomo muene mu nga-nda kua kà funda ni enu, pholo ni pholo.

³⁶ Jihova Nzambi uixi; Kala ki nga di tele mu kufunda ni jitata jenu, mu kikangalakata kia ixi ia Ijitu, kiene ue hádia ki ngi di ta mu kufunda nʼenu.

³⁷ Hé ngi mi bhitisa ku makoue phala ni ngi mi bokuese kiua mu muxinda ua kikutu kiami.

³⁸ Maji o ió a ngi bhukumukina, ni iá a ngi tondalela, mu kaxi kenu nga kà a muangununa-mu; nga kà a katula muene mu ixi mua nhunganena, maji o mu ixi ia Izalaiele ka kà vutuka-mu dingi; phala ki mʼindukile kuila Eme-muène ngi Jihova.

³⁹ Enu-phe, tata, mu dibhata dia Izalaiele, eme ngi Jihova, ngʼambe: Ndé-nu, muthu ni muthu a kà bhikile o iteka iê, mukonda, eme, nguenu ku ngʼivua; maji-phe o dijina diami di kôla ki mu di sebulule ni maujitu enu ni iteka ienu.

⁴⁰ Mbata, o ku mulundu uami ukôla, ku mulundu ua di leka ua Izalaiele, kuenhoko kuene hádia kua-nda ku ngi bhikila o dibhata dioso dia Izalaiele, bhata diosòlolo muene mu ixi muenhomo; kuenhoko kuene ku nga kà sangulukila momuʼâ, hé kuenhoko ngi mi bhinga o mibhaku ienu ia vondadi, ni maujituʼenu a ibundu ia mutômo, kumoxi kiá ni ima ienu ioso ikôla, Jihova ua ki tange.

⁴¹ Nga kà sangulukila momuʼenu ni dizumba dia mbote, kioso eme ki nga kà mi katula mu kaxi ka ifuẋi ni ku mi bhongolola ku jixi joso kua mi muangena; hé nga kà kala ngi muthu Ukôla momuʼenu bhu mesu ma akua ixi.

⁴² Anga mua kà kʼijiia, kuila: Emiʼeme ngi Jihova, kioso ki nga kà mi bhangesa o kuvutuka dingi mʼoxi ia Izalaiele, o ixi i nga lekela o lukuaku luami phala ku i bhana o jitata jenu.

⁴³ Muenhomo, hé mua kà xinganeka kiua o jinjila jenu, ni ibhangelu ienu ioso i mua di kasanesa na-iu, hé mua kà di kuatela fuokoso enuʼenu muene, mukonda dia kuiibha kuenu kuoso ku mua bhanga jinga.

⁴⁴ Hé kia kà mʼindukila kiua, kuila emiʼeme ngi Jihova, kioso ki ngi mi tekujula ni henda mukonda dia dijina diami, anga ngi fula o ku mi bhanga kala kia fuama mu jinjila jenu jaiibha, ni ibhangelu ienu ia phulu, eie u dibhata dia Izalaiele, tata! Jihova ua ki tange.

O sulu a i zambuila

⁴⁵ Anga o kizuelu kia Jihova kiza kokumai, kuila:

⁴⁶ Eie monʼa muthu, o pholo ié talela na-iu ku njila iia ku sulu, o maka mé lunduluila-u mu kuzoka ni sulu, u zambule mu ku bilukila o ditutu dia mukáu ua Sulu.

⁴⁷ Uambele o ditutu dia Sulu kuila: Ivua o maka ma Jihova: Jihova Nzambi uambe kiki: Tala, o momuʼé nga-nda ku bambula-mu túbhia tua ka jikatesa o miẋi ioso ia uisu ni miẋi ioso ia kukuta; o mulengu uia ni kulekujuka ki ua kà jima dingi, inda o pholo joso ja kà jokota ni mulengu uenhó tundé ku sulu katé ku suku.

⁴⁸ Anga o xitu ioso ia kà ki mona kuila eme, ngi Jihova, nga tu uika; ki tua kà jima dingi.

⁴⁹ Eme-phe, bhenhobho ngixi: Auá! Jihova Nzambi, tata! Ene ka-nda ku ngʼila exi: Iú mutangiʼa ifika?