Izekiiele 19 - O Mikanda Ikola

Kifika kia monʼa hoji a mu te mu kikolo-kolo

¹ Eie-phe o ilamba ia Izalaiele zangumuina-iu nzongo ia kudila,

² Uile, uixi: Nanhi muene ua kexi mamʼenu? Mama ia hoji ia zeka mu ndumba ja jihoji, ia sase tuana tuê mu kaxi ka tuana tua jihoji.

³ Anga u sasa-bhu kamona kamoxi, hé ka kula, anga ka kituka kahoji ka di longo kukuata o mbole; anga kʼaia ni kúdia athu.

⁴ O miji ku mundu kioso kia kʼevu ku ka ta o maka, a ka kuatela mu ngenda iê anga eza-na-ku ni jingouele mʼoxi ia Ijitu.

⁵ O mama ki iedi kiá o talʼé, o muẋima iu ua mu tundu-ku, ua zangula-bhu dingi kamona kengi bhu tuana tuê iu ua ka bhange kahoji.

⁶ O kenhaka ki ka kuata izuua ioso kuenda kumoxi ni jihoji, ka di bhange kahoji muene iu ua di longo kukuata o mbole ni kúdia athu.

⁷ Anga kejiia mu mazemba mâ, hé ka muanga-muanga o jimbanza jâ; o ixi ioso anga i muangana ni jinzungule jê joso ja athu, mu kuívua o kukoma kuê.

⁸ Kienhokio-phe athuʼoso ala mu jixi jala mu jimbandu joso, anga a dikasa, o hoji a i tela uanda, hé a i kuatela bhu ngenda iê.

⁹ A i ta ni jingouele mu kikilo-kolo, hé a i ambata kua sobha ia Babilonha; anga a i bokuesa mu ididi ia kolo kiambote, mbé o mbimbi iê ka ivue dingi ku milundu ia Izalaiele.

¹⁰ Mamʼenu, mu ku di xibha kuê, uedile kala muẋi ua muvide, uòphaphe ku mbanduʼa ngiji; uene uima ibundu hé uizala jithangu mukonda dia imenha ia vulu.

¹¹ Anga u kala ni jithangu ja kolo kiambote, phala o jimbasá ja atumini; uene hé u di-leka mu kitala kiê, mu kaxi ka jithangu jʼezala isasa; anga mu kitala kiê, u di monekena ni ndumba iê ia jithangu.

¹² Maji a u vuza ni njinda, hé a u takuila bhoxi, o kitembu kia thunda anga ki kukutisa o ibundu iê; ojithangu jê ja nguzu ja bukujuka, ja kukuta anga o túbhia tu ji jikinisa.

¹³ O kiki a u kunu mu kikangalakata, mu ixi ia kukuta, ia dinhota ni kikaku kia menha.

¹⁴ O ku luthangu luê lumoxi kua tundu túbhia tuoha o ibundu iê, katé ki kuala dingi luthangu ngó lumoxi lua kolo lu tokala kukala mbasá ia kutumina na-iu. Kuku kuene o ku di tenda kua kà xalela-ku.