Izekiiele 18 - O Mikanda Ikola

Kua Nzambi, kuala muthu ni kimbamba kiê, muthu ni kimbamba kiê

¹ Anga o kizuelu kia Jihova kʼiza kokuami, kixi:

² Enu ihi ia mi kuata, enu mua mu zuela o Sabhu iii ku ixi ia Izalaiele, muexi: O jitata ja-di uva ja uisu, o mazu a anʼâ ezala uèngenge?

³ Jihova Nzambi ua tange, uixi: Nga di lokela muene, o Sabhu iii mu Iza laiele ki mungu dingi mu i zuela.

⁴ Talesenu, o mienhu ioso iami eme-muène; kala o muenhu ua tata, ni muenhu ua mona uami-eme; muenhu uoso u ta o kituxi, uene u fua.

⁵ Kuma o muthu se ua iuka, nʼende ni kubhanga ima ia kilunji ni kufundisa mu kidi,

⁶ u fula kudila jisata ja iteka ku milundu, mba kubhetula mesu mê ku mahamba ma dibhata dia Izalaiele, ka xikina kukasanesa muhatuʼa mukuá, mba ku di takanesa ni muhatu uala mu ijila ié;

⁷ ka xikina kubhondeleka muthu uoso-uoso, o kiximbi kia mu ximbikila mukua dikongo u mu vutuila-kiu, ka xikina kunhana, o uala ni nzala u mu bhana kudia, hé u zuika kizuatu kua ió uala ni tuẋi.

⁸ O kitadi kiê ka xikina ku ki bhana ni kuvualesa, mba u tambula kia vulu, uebhesa lukuaku luê mu kudia mangonha, hé o muthu ni muthu u a fundisa kiambote;

⁹ u kuata kuenda kiambote mu jingonge jami ni kualuka mabatuilu mami, phala kubhanga kia fuama o kidi, o muthu ió ua iuka, ni kidi kiene, u laia, kiene kia tange Jihova Nzambi.

¹⁰ O muene-phe kia vuala mona uala muii, kijibhanganga, o ku ima iii hé u bhanga-ku kimoxi kua phangʼiê,

¹¹ hé u tokoka o kualuka o ijila ioso ioio, o ki mu kala kota o kudila ku milundu, ni kukasanesa o muhatu uangene ua mukuá,

¹² ni kubhondeleka o phulungu ua tate, ni kunhana, o kia mu ximbikila ku dikongo ka xikina ku ki vutula, uenda ni kuzambula mesu mê ku mahamba, ni kubhanga ima ia isunji;

¹³ Kitadi u ki sobhesa ni kuvualesa, o mu kutambula kikale ku di ta, manhi muenhó u laia? Lémbue, ka tena kukola muenhu; muthu ua bhange isunji ioso iii, ni kidi kiene, u fua muene; o manhinga mê ma kà kala ku thandu diê-muène.

¹⁴ Kia kà kala-phe, kuila, se o muenhú u vuala mona, u tongolola o ituxi ioso ia bhange tatʼâ, o kia i mona, hé u kamba o kubhanga ima ia difu ni ienhoio,

¹⁵ u fula kudila o jisata ja mahamba ku milundu, ka xikina kubhetula mesuʼê ku iteka ia dibhata dia Izalaiele, nguê kukasanesa muhatu ua ngene ua mukuá;

¹⁶ ka xikina kubhondeleka muthu, mba u kuatela o kima kia j mu bhana ku ungunji, ka xikina kunhana, o uoso uala ni nzala muene u katula ku kúdia kuê nʼa mu bhana, o ió uala ni tuẋi muene u mu zuika.

¹⁷ Uebhesa o lukuaku luê kua phulungu ua tate, ka bhana dikongo dia kuvualesa kitadi, mba mu kutambula a mu telaku, nʼende ni kubhanga mabatuilu mami ni kuenda mu jingonge jami, muthu ió ka fu mu kikuma kia tatʼâ, ni kidi muene u kola muenhu.

¹⁸ O tatʼâ kuma ua bhange ungulungumba, ua nhana jimbongo ja mukuá, iú ua bhange kiókio ki ki fuama ku ki bhanga mu kaxi ka mundu ue-muène, muene-ku ufua mu kikuma kiê.

¹⁹ Maji enu muexi: Mukonda diahi o mona kʼambata o ikuma ia tatʼâ? Mukonda o mona ua bhange iaiuka, uejiia o kubatula kidi, iu uaiuka o jingonge jami ni ku ji bhanga, kala kiki u laia muene.

²⁰ O muenhu uoso u ta o kituxi, uene ufua; o mona kʼambata ikuma ia tatʼâ, mba o tata ua kʼambata ikuma ia monʼê; o kuiuka kua muthu ua iuka, kua kà kala ku thandu diê-muene, o phulu ia mukua phulu, ià kà mu lundumukina ue muène.

²¹ Maji o mukua phulu-phe, se u diela o ituxi iê ioso ia-te, hé uaiuka o jingonge jami ni kubhanga iaiuka ni kubatula o kidi, o muthu ió ni kidi muene u laia, ka tena kúfua.

²² O ikuma iê iosololo ia bhanga jinga ka kà i xinganeka dingi ni ku mu bhanga phulu; mukonda dia kuiuka kua bhangiʼuku, u kola muenhu.

²³ Jihova uixi; Mbebhu eme ngène mu kuinda kiá ngoho o kalunga ka mukua phulu? Manhi ki ngʼanadala, kuila u diela ku jinjila jê ja phulu mbé a kole muenhu?

²⁴ Maji, o muthu ua iuka se u bhambuka mu kuiuka kuê, hé u ta ituxi, ni kubhanga isunji ioso kala ki bhanga mukua phulu, muthu ió mbe u kola muenhu? Makuiuka ê oso muene a bhanga jinga ki bhuà kala ku a xinganeka dingi; mu kutondala kuê kua tondala na-ku, ni mu kituxi kiê kia-te, muène mua kà fuila.

²⁵ Enu-phe muexi; O njila ia Jihova ki ia iuka kiambote ditônono. Kindala-phe, ivuenu enu mu dibhata dia Izalaiele: Manhi o njila iami ki iala ditônono? Mbé o njila jenu ki jene ja bhengajala?

²⁶ O muthu ua iuka, kia tunda mu kuiuka kuê, hé u ta kituxi, ufua ku kituxi kiê; o mu kituxi kiê kia te, muene mua fuila.

²⁷ Maji o mukua phulu kia diela ku phulu iê ia bhange, hé u bhanga ima ia kuiuka ni kubatula mu kidi, ió o muenhu uê ua sakuka.

²⁸ Mbata muene ua xinganeka iu ua diela ku itondalu iê ioso ia bhange, ni kidi kiene ia kà kola muenhu, ka kà fua, kana.

²⁹ Maji-phe, hanji o dibhata dia Izalaiele ela, exi: O njila ia Jihova ki i iuka kiambote ditônono. Manhi, enu mu dibhata dia Izalaiele, o njila jami ki ja iuka? Manhi kʼo njila jenuʼenu ja bhengajala?

³⁰ Kala kiki, Jihova Nzambi ua tange, uixi: Enuʼenuʼoso, nga-nda ku mi fundisa kala muthu kioso kia fuama mu njila jê, enu mu dibhata dia Izalaiele; zenu-phe mu diele ku itondalu ienu ioso, o ikuma ienu ki i mi kale kidibhukanu.

³¹ Zulenu itondalu ienu ioso i mua tondala na-iu, mʼoxi dienu mu bhangemu muẋima ua ubhe ni nzumbi ia ubhe; mbata mua-nda fuilaʼhi ngoho, enu mu dibhata dia Izalaiele, tata?

³² Mukonda eme ki ngene ku uabhela kalunga ka muthu uoso u fua; dielenu-phe, nda mu kale ni muenhu, Jihova ua ki tange.