Izekiiele 14 - O Mikanda Ikola

O kaxtiku ka oso a bheza iteka

¹ Anga ku ngi sanga athu a tokala ku ikulakaji ia Izalaiele hé a xikama bhu pholo iami.

² Bhenhobho o kizuelu kia Jihova kiza kokuʼami, kuila:

³ Monʼa iala, athu iâ emika o iteka iâ mu miẋima iâ, o kidibhukanu kia kuiibha kuâ a ki tula muene bhu pholo iâ; o ki ngalʼiki mbé nga tokala ku ngʼibhula kuala ene?

⁴ Kala kiki, zuela-nâ ua ambela, kuila: Jihova Nzambi uambe, kiki: Muthu uoso-uoso mu dibhata dia Izalaiele, uimika o iteka iê mu muẋima uê, anga o kidibhukanu kia kuiibha kuê hé u ki tula bhu pholo iê, nʼeze ku musesedi, eme, ngi Jihova, hé ngi mu mona, Ememuène nga-nda ku mu vutuila kala kia soko o ndumba dia iteka iê.

⁵ Phala ni ngi tena o kukuatela dibhata dia Izalaiele mu muẋima uê, mukonda ene oso a ngixiʼeme phala kukaiela o iteka iâ.

⁶ Kala kiki, o dibhata dia Izalaiele tangela-diu, uixi: Jihova Nzambi uambe kiki: Dielenu, o mahamba menu xé-nuu; jipholo jenu katulenu-ju ku ima ienu ioso ia ufusa.

⁷ Kuma muthu uoso-uoso ua tokala mu dibhata dia Izalaiele mba ku jinzuángiza ala kunhunganena mua Izalaiele, nʼa di-katula kokuʼami hé uimika o iteka iê mu muẋima uê, nʼa tula o kidibhukanu kia kuiibha kuê bhu pholo iêmuène, anga uiza kua polofeta mu ku ngʼibhuila kua muene, o ió-phe ememuène ngi Jihova, nga-nda ku mu vutuila mudiami.

⁸ O pholo iami nga kà i ta mu kulungulukila o muthu muenhó, anga ngi mu bhanga kidiuanu, u kala muene kijimbuete ni Sabhu, o muʼaxaxe ka athuʼami ngi mu vuza-mu; nda mu kʼijiie kuila eme ngi Ngana.

⁹ Se o musesedi a mu tobhesa, anga u zuela kima kioso-kioso, eme ngi Jihova, eme-muène ngà fundisa o musesedi muenhó; anga nga kà sunununa o lukuaku luami kua muene, hé ngi mu jimisa o mbutu muʼaxaxe ka mundu uami ua Izalaiele;

¹⁰ O kikuma kiâ a kà kiʼambata ene ku thandu diâ; o kikala o kikuma kia iu uibhula, kiene ue ki kala o kikuma kia musesedi.

¹¹ Phala o dibhata dia Izalaiele ki di ngʼixe dingi eme, mba di di kasanesa dingi ni itondalu iâ iosoʼlolo; kienhókio ene a kà kala mundu uami, eme ngó nga kà kala ngi Nzambi iâ, Jihova Nzambi ua ki tange.

O uiukilu ua kubazela kua Nzambi

¹² Kizuelu kia Jihova kieza dingi kokuami, kixi:

¹³ Monʼa muthu, kioso o ixi ki i ta kituxi kokuami, anga i ngi ẋinukina muene kiavulu, kuabhu-phe, eme ue nga-nda kusunununa lukuaku luami mu ku i bilukila, o huta ia kúdia nga-nda ku i bhanga kabilu-bilu hé o ixʼoio ngi i tumikisa o nzala, nda ngi vuza-mu o athu ni iama.

¹⁴ Né-mbe hanji mu kaxi kâ mu kala kitatu kiki: Noué, Daniiele ni Jobe, ene ngoho mu kuiuka kuâ eji kubhulula o mienhu iâ—Jihova Nzambi ua ki tange.

¹⁵ Se mu ixi eme ngi bhitisa-mu iama i bhanga usuéia, o iene hé a i sengulula katé ki i senguluka, athuʼoso hé a lémbua kubhita-mu mukonda dia iama;

¹⁶ né-mbe hanji o mala atatu iá a kala muʼaxaxe ka ixiʼoio, ni kidi muene kala eme ki nga mu laia, Jihova Nzambi ua kiambe, kuila ene kʼeju tena kubhulula anʼâ a mala mba anʼâ ahatu; kale ene ngó eju bhuluka, o ixi ieji kusenguluka muene.

¹⁷ Mba, se eme ngi bheka xibhata mu ixi ioso, anga ngiia: xibhata, bhita mu ixi, o muene hé ngi vuza-mu o athu ni iama;

¹⁸ né-mbe hanji o mala kitatu ió a kexe muenhomo, nga di lokela muene, eme ngi Jihova Nzambi, kuila kʼeju tena kubhulula anʼâ a mala mba anʼâ a ahatu, maji ene ngoho eji kubhuluka, kuabhu.

¹⁹ Mba-phe sʼeme ngi tumikisa kipheku ku ixi ieneʼoio o njinda iami anga ngi i lunduluila ku thandu diê ni manhinga phala kuvuza-mu o athu ni iama,

²⁰ né-mbe kiá Noué, ni Daniiele, ni Jobe, a kexe muʼaxaxe kê, nga di lokela muene, eme Jihova Nzambi, kuila né mona ua diiala mba mona ua muhatu keji kutena ku mu bhulula, mukonda dia kuiuka kuâ, eji kubhulula ngoho o mienhu ià ene-muène, toka.

²¹ Mukonda Jihova uambe kiki: Kuambe dingi se Jeluzaleme eme ngi mu tumikisa o afundixʼami aiibha ió kiuana, o xibhata ni nzala, ni iami i kuama, ni dibhebhu, phala kuvuza-mu o athu ni iama!

²² Maji, tala-ze, amoximu a-nda kusubhuka muene muenhomo, hé a kâ ambata ku kanga, kixi anʼa mala mba anʼa ahatu; talesa-ze ene a kʼeza kokuʼenu, enu hé mua kà mona o njila iá ni ibhangelu iâ; anga kia kà mi konda malamba a kuiibha kuoso ku nga bheka ku thandu dia Jeluzaleme, ni ima ioso kiá i nga bheka ku thandu diê.

²³ Anga malamba oso a kà mʼibhua, kioso ki mua kà mona o njila iâ ni ibhangelu iâ; anga mua kà kʼijiia kiua, kuila ku ioso i nga bhange, ki ngi didi ngó ku i bhanga, maji nga lunguʼami kioso ki nga i bhange momué;—Jihova Nzambi ua ki tange.