Izaía 8 - O Mikanda Ikola

O kibuika kia ma-utuminu ma Izalaiele ni Sídia

¹ Jihova ua ngʼambela dingi, uixi: Kuata dibaia dionéne, u di soneke ni usonekenu ua lomboloka: A lengela ku madibhundila, a lengulukila ku mbole.

² Ngexana-phe jimbangi ja fiiele, nganga Udiia, ni Zakadiia, monʼa Jebelekiia.

³ Anga ngiia mu ku di mona ni polofeta ia muhatu, muene iú uemita, anga uvuala mona-diiala; Jihova u ngʼambela uixi: Dijina diê, mu luke Mahele-xalalaxe-baze.

⁴ Mbata mona muenhú kioso kiluua ejiia kuila, tatʼetu, mba memʼetu, o jimbongo ja Damasku a kà ji bhunda, ni madibhundila ma Samádia a kà ma ambata bhu pholo ia sobha ia Asídia.

⁵ Jihova anga ukuata dingi ku ngi zuelesa, uixi:

⁶ Kiedi mundu iú, menha ma Siloua mene ku kunguluka kilendu, a ditunu-u, ia a tana ni Lejime ni monʼa Lemadiia;

⁷ mukonda dia kiki, Jihova ua-nda kubheka ku thandu diâ menha ma ngiji, ma kunguluka ni kusuina; muene sobha ia Asídia ni kijingu kiê kioso; menhʼama ma-nda ku banda anga mʼezalesa mu mijinga iâ ioso, ma ẋamukina ku ibumu iâ, iene ioso.

⁸ Ma-nda kubhita mu Juda, Juda ioso i boba mu menha, anga ma kuata ku ditutila-mu katé ma a bhixila mu xingu; o mabhabha mâ mu kuzanza, ma kà soka ni kuzanza kua oxi iê ioso, eie u Imanuuele.

⁹ Divunzienu, enu mu mundu, a kà mi tolole; bhanenu mátui enu mu akua-jixi ja makanga, bhakatenu, a kà mi batujule ku iẋimbu; ndokuenu, bhakatenu, a kà mi batukule ki iẋimbu.

¹⁰ Né muedi mu di-phopha bhuamoxi ku kaiula ki ka kà tunda kiambote; né mua te maka, ki ma kuata, lémbue; mbata etu Nzambi tuala-nê.

Jihova u dimuna o Jipolofeta

¹¹ Kuma Jihova ua ngʼambela-kiu muene ni lukuaku lua suina, iu ua ngi longesa kuma ki ngendele mu njila ia mundu iú, uixi:

¹² Kima kʼila mundu iú exi, kubangana, ki mu kʼixane kubangana; ki mu kale ni hele ia uoma uâ, né ngó bhuòfele ki mu bhuuame.

¹³ Kôlesenu Jihova dia Ilombo Ieta; muene mu mu kuatela uoma, mu bhuuame mukonda dia muene.

¹⁴ Bheneʼobho-phe muene ua-nda ku di-bhanga dibhezelu dienu di kôla; maji ua kà di bhanga ditadi dia kidibhukanu, ndanji ia iẋanju ku mabhata maiadi ma Izalaiele; ua kà kituka mubhetu ni múkala phala iá a tungu mu Jeluzaleme.

¹⁵ Muʼaxaxi ka mundu, avulu muene a-nda ku di-bhukana, a-nda ku di-bhala anga a bukujuka, afua mu uanda, a-nda ku a loua ni mikolo anga a a kuika.

¹⁶ Divulu didi dia umbangi a kaiese na-diu momuʼa, o kitumu xina-kiu kidimbu muʼaxaxi ka jixibulu jami.

¹⁷ Eme ngi dielela kua Jihova, muene ngi mu xikamena, sumbala o dibhata dia Jakobo ua a suekela o pholo.

¹⁸ Emeʼami-ú, Ngana, ni ana a ngi bhana Jihova; enhá, ijimbuete, madiuanu mua Izalaiele, ma tundu kua Jihova dia Ilômbo Ieta, ua tungu ku mulundu ua Ziione.

¹⁹ Kioso ki a mi ambela: Tenu mizambu, ibhulenu akua kuxingila, ni imbanda, akua kuzuelela ku mazu ni ku di-ngunguina, o mundu mbé ki uibhula kua Nzambi iâ? Manhi kibhidi kia kuata athu a muenhu, mu kʼibhula kua iá a fu kiá?

²⁰ Inda tuila: Ku Kitumu ni ku Umbangi; ene se nguauá kuzuela kala kiambe o kizuelu kiki, o mukengeji ua kimene ka kà u mona.

²¹ Mu ngongo a kà bhita-mu ni hadi ia vulu ia ku a tatesa, ni nzala; o kia-nda ku a bhondeleka o nzala, njinda ia a kuata, o kia tala bhulu, a kà lebhula sobha iâ ni Nzambi iâ.

²² O kia tala mu ngongo, a mona-mu mukondo ni kitombe kila muene buí, o mu thulu mua kà a xita ni kikote, anga aia ni ku a lundujuila mua vundu, muedi buí.