Izaía 7 - O Mikanda Ikola

Mizambu ia ku kanena Izalaiele ni Sídia. Manasa u zoka ni Juda

¹ Anga ki bhita-phe kuila, mu izuua ia Akaze, monʼa Jotamu, monʼa Uziia, sobha ia Juda, o Lejime, sobha ia Sídia, ni Pheka, monʼa Lemadiia, sobha ia Izalaiele, a bandele mu Jeluzalema phala kúlua-nê ita, edile a teza-ku, a mu lémbua.

² Anga a dimuna dibhata dia Davide, exi: O Sídia ua te kikutu ni Ifalaími. Bheneʼobho muẋima uê u di-vunza kumoxi ni muẋima ua mundu uê, kala ki di bhuka o mixi mu tutu, kʼiza o kitembu.

³ Jihova phe uambela Izaia, uixi: Kindala nʼeie ni monʼé ua diiala Selejasube, tundenu mu takane ni Akaze kua suku o mulombo, bhu dijiia dia thunda, ku njila ia mukáu ua musukuidi.

⁴ U mu ambela kuila: Aiuka, u ximbakate, ku kale ni uoma, ku bhuile muẋima ki u mona o tu-iẋinji tuiadi tua ibunji ia mu xongota, mukonda dia kutemanana kua njinda ia Lejime sobha ia Sídia, ni ia monʼa Lemadiia.

⁵ Mbata o Sídia ua ku tele kikutu kia ufue, kumoxi ni Ifalaími, ni monʼa Lemadiia, exi:

⁶ Tuienu tu lue ni Juda tu mu talese hádi, tu di uanenenê, phala o muʼaxaxi-kê tu hingise-mu monʼa Tabiiala ku usobha.

⁷ Jihova Nzambi uambe, kiki: Kikutu kiki ngi ki selula, ki ambe eneʼokio ki ki tena kubhita, né ngó.

⁸ Inda o Damasku muene ua kala mútue ua Sídia. O muadiakimi mu Damasku, Lejime; Ifalaími-phe, katé bhu bhuila makuinhi asamanu a mivu nʼitanu ngi mu tolojola, ka kala dingi kifuxi.

⁹ Hé kima, o Dikota mu Ifalaími ua ká kala Samádia, o muadiakimi mu Samádia o monʼa Lemadiia; O kienhiki, se mu kamba ku ki xikana, ki mu tena dingi kunangenena.

O Kijimbuete kia Imanuuele

¹⁰ Jihova anga ukuata dingi kuzuelesa Akaze, uixi:

¹¹ Bhinga-phe kijimbuete kua Jihova, Nzambi ié; hé u ki bhinga kuila kʼijiie muʼalunga mua zongo, mba mu dinga ni dinga.

¹² Kuala-phe Akaze, uixi: Eme ki nga-nda kubhinga kijimbuete; Jihova ki ngi tena ku mu lola.

¹³ Muene-phe, uixi: Kindala ivuenu, enu mu dibhata dia Davidi: O ki mua mu tatesa athu ki kia mi soko, hanji mu tatesa dingi Nzambi iami?

¹⁴ Uila kikiphe, Jihova muene, ua-nda ku mi bhana kijimbuete: Talesa, kua kà kala monʼa kilumba, uimita, nʼa vuale monʼa diiala, o dijina diê a kà mu luka Imanuele.

¹⁵ Ua kâ dia matheka ni uiki, katé kia kʼejiia ku dituna kiaiibha, nʼa sole kia uabha.

¹⁶ Kia kidi kiene, kioso mona iú kiluua eza mu kitala kia kuijiia ku di tuna kia iibha ni kusola kia uabha, jixi ja jisobha jiiadi jiji, ja ku kuatesa uoma, ja kà buika.

¹⁷ Maji nʼeie, ni mundu ué, ni dibhata dia tatenu, Jihova ua-nda ku mi bhekela izuua ia iibha, ijila kua sobha ia Asídia; o ienhiʼiii kiluua mu i mona, tundé bhu kizuua kia batuka Ifalaími kua Juda.

¹⁸ Mbata kià kala kiki: Jihova, mu kizuua kiókio, ua kà xika muixi mu kuixana o jihamue, jène kua suku o jihonga ja Ijitu kumoxi ni jinhuki jène mʼoxi ia Asídia.

¹⁹ Anga jiza, jibutama mu makôlo a iphenza, ni mu mitanji ia matadi, ni mu minha ni mu matutu oso.

²⁰ Bhu kizuua kieneʼokio Jihova ua kà sobha phoko ia bhutu, iene ku sámbua dia ngiji, muene sobha ia Asídia, anga u konga na-iu o mútue ni kindemba kioso kia inama; katé ni muezu uoso muene u u konga.

²¹ Bhua kà kala-phe kuila, muthu mu kizuua kieneʼokio ua kà sasa ngó mama imoxi ia ngombe, ni mama jiiadi ja mbudi.

²² Maji, kia kà bhita-phe kuila: Mukonda dia lete iavulu ia kà bhana o ibhaku ienhiʼii, ua kà dia matheka; o uoso u subhuka mu kaẋi ka ixi, ua kà dia ue matheka ni uiki.

²³ O luamukuá ue, bhu kizuua kieneʼokio, kia kà bhita kuila ididi ioso, bhuoso bhu kala midi ia mivide, mu suilu ia midi ia itadi ia phalata, ia kà kalé ngoho isasa ia hatu ni misonge.

²⁴ O kubokona-mu ki kale u kuata mifula ni matoma, kuma oxi ioso ia-nda kuizala isasa ni misonge.

²⁵ O mu milundu ioso ue, muene mu dima ni matemu, ka kà ia-mu dingi, mukonda dia uoma ua mazalakata ni misonge, ki kale muia jingombe ni jimbudi ku titidila-mu.