Izaía 63 - O Mikanda Ikola

Nzambi Ubhulula povo iê, u a zokela mvunda

¹ Mukuahi-ú u tunda ku Idomo, ni izuatu iedi kiki nguí, ua tundu ku Bozola? Ua kembe kiki ni kizuatu, kia kijingo? Ua mu kuenda ni nguzu iê ioso: Eme-muène ngi zuela ni kuiuka, ngi dizonda mu ku bhulula.

² O kiki-phe izuatu ia ku kusukila-hi kiki? ni izuatu iedi kala ia ió ua mu kama mu ditangi dia vinhu?

³ Ditangi nga di kame muene ubheka uami, ku akua jixi né ngó umoxi ua ngi bande; nga a diota ni njinda, nga a titidila mu kutema kuami; manhinga mâ ma manukina ku izuatu iami, izuatu iami iezala mabhaka.

⁴ Mbata kizuua kia kuvutula phonzo kia ngi kexe kiá ku muẋima; o muvu ua jihule jami uezabhu.

⁵ O ki nga tale ku mukonda, u ngi banda ki nga mu mono; eme nga diuana kuila ki bhuala u ngi fikidila, kienhiki lukuaku luami luene lua ngi bhekela kubhuluka, o ngânji iami iene ia ngi fikidila.

⁶ Eme-phe nga titidila o ifuẋi ni njinda, eme ngʼa a kodiuisa ni kutema kuami; o kusuina kuâ nga ku lundumuina bhoxi.

Mundu ua Nzambi u mu sakidila; kufisala ni kudionda

⁷ Ngi tumbula kulenduka kua Jihova, ngi tanga ue diximanu dia nzungule dia Jihova, dia soko ni ima ioso ia tu bhange Jihova; ni jimbote javulu joso jene kubhanga ku diembu dia Izalaiele, ja a bhange muene mu jihenda jê, kala kia soko o nzungule ja kulenduka kuê.

⁸ Kuma muene uambele, kuila: Ene povo iami mu kidi, ana ka tange makutu, kiene kia di-bhangela Mubhuludi uâ.

⁹ Mu lamba diâ dioso ni muene uevile dilamba, anga mukunji uene bhu pholo iê u a bhulula; mukonda dia henda iêmuène ni kulenduka kuê, muene ua a bhulula; iu ua a tambula, iu u a endesa jinga kienhiki mu izuua ioso ia xahúlu.

¹⁰ Maji ene a baluka, a luualesa o Nzumbi iê Ikôla; kia mu bhangesa ku kituka nguma iâ, anga muene-muène u zoka-nâ.

¹¹ O ki eza-ku-phe, ua lembalala mu xáhúlu, kia kexe Mozé, ni mundu ué. Uixi-phe; O ki tualʼiki, iú kuebhi uoso ua zaukixile mu Kizanga kia Kalunga o mubidi ua kilunga kiê? O ua tele o Nzumbi iê Ikola muʼaxaxi kâ uala kuebhi?

¹² Ió ua bhangesa o kuaku luê lua ulamba kuendesa o lukuaku lua kadilu lua Mozé, uala kuebhi? Iuná ua budile o menha mu kaii bhu pholo iâ, phala kubhangesa o dijina diê kukala dijina di nangenena?

¹³ Ki muenhó ua a batesele mu makôlo, mukuâ ni kabalu mu ixi ia kisèkele; anga a lémbua muene o ku di-bhukana?

¹⁴ Anga o Nzumbi ia Jihova ua a bhana dinhohenu, mukuâ ni kiama kioso ki ki kulumuka mu dikôlo; kiene, Ngana, ki uendesa o athuʼé phala kujingisa o dijina dié.

O kubhinga o Henda ia Nzambi ni Dikuatekesu diê

¹⁵ Ividila tundé ku maúluʼoko, u tale kunu tundé bhu kididi kié kiangene bhu ua tunga. Muanu ué Ngana uala kuebhi, ni ikalakalu ia uzonda ué? o kulenduka kua muẋima ué ni jihenda jé ji kale ni eme!

¹⁶ Maji-phe, eiʼeie u Tatʼetu, né-mbe hanji o Mbalahamu ka tu ijiia, o Izalaiele ue ka tu suu; Eie-phe, Ngana, u Jihova, eie muene u Tatʼetu; u Mukudi uetu tundé xahúlu, diene o dijina dié.

¹⁷ O kiki-phe, Jihova ua tu luezesa kiebhi o kuenda mu jinjila jé? o muẋima uala ku tu kolesa-u kiebhi, phala tu lémbue ku ku xila? Mu henda ia selevende jé, vutukisa o miji ia undundu ué.

¹⁸ O povo ié iangene, o undundu ué a u vuile ngó kathangana kôfele; jinguma jetu a titidila kididi kia dibhezelu dié.

¹⁹ Etu tu athuʼê, tuedi-phe kala athu eie kiluua u a tumina, kala athu tundé dia tunde mu dijina dié ka tokalamu.