Izaía 47 - O Mikanda Ikola

Babilonha ngundu

¹ Tuluka, xikama mu fufuta eie u muzeletete, mona-kilumba ua Babilonha; xikama bhoxi; kana-bhu dingi kiandu, mona-kilumba mu Kaldeia, kuma ki bhu kala dingi ku ku ixana muzeletete, mba mona bhu kinéne.

² Katula kinu u zuke o fuba; futumuna o mútue ué, katula jisabhatu ku inama, baka matabela u vuue jingiji.

³ Eie ua-nda kuzuluka, anga dilebhu dié di di monekena; nga-nda kufuta phonzo, ki nga-nda kubhanga katungu ka muthu.

⁴ Kiene kia tange ió uala ni Jina dia Kibhamuenhu kietu, Jihova dia Ilombo Ieta, Dilemba Dikola dia Izalaiele.

⁵ Xikama-phe, uile hudí, nʼu kutuke mu kikote muedi bui, eie u mona-kilumba ua jikaldeu, kuma ki bhua kà kala dingi ku ku ixana, exi: Muene mvuale ia mautuminu a jixi.

⁶ Nga thathamana kiavulu ni mundu uami, undundu uami nga u kasanesa, eme nga ku bhakuila-nâ bhu lukuaku lué; eie-phe ngué ku a kuatela jihenda, katé ni ikulakaji, akuka, ua a tuika kimbamba kia neme.

⁷ U kuata kuzuela, uixi: Eme ngi kala jinga muene na mvuale katé ku hádia ni hádia; katé-phe bhu uezʼabha ima iii ki ia ku bokona mu muẋima, kuala kuxinganeka ue bhu ia kà suka.

⁸ Kiki-phe, ivua-kiu, eie ua kodiua ni ima ia uabha, ua tunga ua soma, eie uene mu kuila mu muẋima ué, uixi: Eme-muène ngó, kana-ku ua soko ni eme; ki nga-nda ku kala ngi mutudi, ki nga-nda kuijiia ue dilamba dia kufunda ana.

⁹ Maji o ima iiadi ienhiʼii-phe ia-nda kuiza ku thandu dié mu kathangana kamoxi, mu kizuua kimoxi ufunda ana, o utudi u ku iza ue; ima iii ia-nda kuiza muene ku thandu dié ni nguzu ioso, mukonda eie uanga ua u tundisa, mukonda dia maumbanda mé kuvula.

¹⁰ Kuma uadielela o phulu ié, uixi: Ki bhuala u tena ku ngi mona; o unjimu ué ni ndunge jé ji ua di-longo, jene ja ku bhekela kujimbila, eie uambe ku muẋima ué, uixi: Eme-muène ngó, kana-ku muthu ni mukuetu nga soko-nê.

¹¹ Mukonda dia kienhiki, ua-nda kubhita ni uíndua, o ku u tunda kua-nda kuijiia-ku, kibuika kia-nda ku ku iza ku thandu, kua kà tena ku ki lenga; mukonda o kingùmba kia-nda ku ku tumikisa, ki ku xitisa mu thulu, kua-nda kutena ku kʼijiia.

¹² Kolokota muene ni maumbanda mé ni mauanga mé, mu uakulu-nâ tundé ku undenge; u tale se utena kubhandulukila-ku, mba u tena muene ku di-fikidila.

¹³ Mu nzungule ia jindunge jé, muene mu ua bhuidila; kiki-phe ni akua kuzambuila ku ijimbuete ia maúlu, ni akua kutongolola jithéthembua, akua mizambu ia mbeji ia thethama, ene-oso a balumuke a ku kudile ku kibuika kia-nda ku ku tula ku thandu.

¹⁴ Talesa-ze, eneʼó a-nda kuila kala ibhiate, a-nda kúbhia mu túbhia; ka kà tena ku kudila o muenhu uâ ku nguzu ia mulengo; o uene ki ua-nda kuila kala makala ma kuota mba dijiku dia kuila uxikama-bhu.

¹⁵ Athu oso u ua kalakala jinga-nâ, kiene kia-nda ku ku kalʼiki; jingenji jé ji ua funa na-ju tundé undenge, a kà ku ehelela; kala muthu ua-nda ku di-texila ni njila iê; o u ku bhulula eie, ka kà moneka.