Izaía 34 - O Mikanda Ikola

Nzambi ua kà bhana kaxtiku ku jinguma jê

¹ Bhiẋilenu kunu, mu ifuẋi, phala kuívua, enu ue mu mundu, ividilenu: Ivua eie u ixi ni ima ioso iene-mu, eie u mundu ni ima ioso-lolo idivualamu.

² Kuma njinda ia Jihova ia zenzama ku thandu a ifuẋi ioso-lolo, o ngânji iê iazenzamena ilombo iâ ioso muene; mbata muene-phe ua a buikisa muene, iú ua a bhakula ku kijibha.

³ O imbi iâ ibhinga ku i texe-texe ngó mu kanga, anga o mikutu iâ ikuata kunuha kibuzu; o milundu ià kʼèzala ni manhinga mâ.

⁴ O ilômbo ioso iene bhulu ia kà buika, o maulu má kà di-futa-futa kala ndunda ia divulu; kilômbo kiê kioso anga ki laùka kala ki laúka dife ku muvide, mukua ni ki sonoka o kibundu ku mufiku.

⁵ Kuma o xibhata iami ia kodiuila mu diulu; talesa-phe ia kà tuluka mu Idomo phala kua fundisa, itula ku thandu dia mundu u nga bhubhidila phala ku a buikisa.

⁶ Xibhata ia Jihova iezala ni manhinga, u sanga ia beketa ni banha ia manhinga ma tumbudi ni isutu, ni banha ia ana-sonhi a ilumbe; kuma Jihova uala ni sata mu Buzola, uala ni kijibha mʼoxi ia Idomo.

⁷ O tuluimba tua kà tuluka-nâ kumoxi, ni tuana tua jingombe ni jituelu; oxi iâ ia kà nua manhinga katé iezala, o fufuta iâ ia kà beketa ni maji.

⁸ Kuma-phe kiene o kizuua kia phonzo ia Jihova, uene o muvu ua kufuta o jinguma joso jene mu kuzoka ni Ziione.

⁹ O jingiji ja Idomo ja kà biluka uasu, o fufuta iâ, mukuâ ni xofidi, oxi iâ i kala kala ngulele iauama.

¹⁰ Ni mu muanha ni mʼusuku ki ia kà jima; o dixi diê di banda jinga katé ku hádia ni hádia; ku tunda muiji kuiza muiji ni ku i buikisa; ku tunda mivu kuiza mivu nuka mua kà bhita dingi muthu.

¹¹ Maji ni kikulungu ni káhombo a ʼivua, ni kinzunzu ni kilombe-lombe muene mua kà tunga: Kuma Nzambi ua kà ta-mu ngoji ia kavuanza ku thandu diê, ni nívele ia kingoho ni kusenguluka.

¹² O midikixi muene mu ia kà bhanga dibhata diâ; ungana a kà uʼiẋanena anʼa jingana, maji ki bha ka moneka né umoxi ngó a mu bhanga sobha; o ilamba iê ioso ki ia kà kala kima.

¹³ O mu mazêmba mê mua kà sabhuka minha, ni kasausau ni kisoma u i sanga mu jimbonge jê; ia kà kala ibuta ia mabheku, dinangenu dia anʼa kihendembumba.

¹⁴ O jimbulu ni jingato ja isangu, muenhumu ja kà takana bhuamoxi; o madimonho à kʼenda ni ku di handekela; o ima ienda usuku ia kenda ni kubutama muenhomo, a sanga-mu kibuta kia ku nhohena.

¹⁵ O kangimbi muene mua kà tela kikalanga kiê, uta maiaki, u ma totola, uenda ni kuphopha tuana mu kilembeketa kiê; ni inhungu muene mu ia kà di-bhongoluela kumoxi ni akuâ anga i kala kumoxi.

¹⁶ Sotenu mu divulu dia Jihova, mu tange ima ioso iii ki bhuala ki kamba kukumbidila, iene ioso muene ia-nda kubhita; kuma dikanu dia Jihova dia ki tange, o Nzumbi iê iene ia kà i bhongolola.

¹⁷ Kuma muene ua i tela jisorte ja ku i uanena oxi, o lukuaku luê luene lua kuata mukolo mu ku a zongela-iu; a kà i vuila-ku kiá muene; a tunga muenhomo, kutunda muiji, kuiza muiji.