Izaía 33 - O Mikanda Ikola

Jinguma ja athu a Nzambi a-nda ku ji buikisa: Jeluzaleme a-nda ku mu bhangulula anga u vutukila dingi bhu ditala diê dia kijingo ni dia kuzediua

¹ Kokolo diê u mubhundi, sumbala ene ka ku bhundu, athu ka ku bhange ufe, eie u a bhanga ufe! Kioso-phe ki u zubha kubhunda akuenu, eie ue a-nda ku ku bhunda; kioso ki u zubha kubhanga ufe ku akuenu, eie ue bhu kala o ku ku bhanga ufe uene.

² Jihova, tu kuatele henda, tuene ku ku dielela, éʼmuene; dibhange éʼmuene u lukuaku luetu mu imenemene, u kale ue u ubhulukilu uetu bhu kithangana ki tu konda o ngongo.

³ Mundu ua-nda kulenga, kioso kievua ngó o muxindu ua kibulukutu; O kioso ki ua-nda ku zangumuka, ifuẋi ia-nda ku muangana.

⁴ Kiene kiua kia-nda kua kà bhongolola o madibhundila u mua xi bhoxi, mukuâ ni kia bhongolola o kabótua; kala ki tuka-tuka o mahoho, kiene ue kia kà tuka-tuka athu bhenhobho.

⁵ Jihova ua zangalala, kuma muene ua tunga ku matala; uezalesa Ziione ni kuiuka, ni kidi.

⁶ Mu ithangana ié, Ziione, ki kuà kala kima ki ku bhanga kiaiibha; ni kubhuluka, ni unjimu ni kuijiia, kua kà vula muene; anga o kuxila Jihova kua kà kala jene o jimbongo jé.

⁷ Talesa-ze, o ilôlo ié iemana ku kanga ni kudikola; o akunji a tokala ku ku bhekela kutululuka iá a ẋikujuka ni kudila.

⁸ Ikoka iabolo, o jingenji ja kuenda, mu njila a batuka-mu; nguma o kikutu ua ki bulu, o madiembu ua mʼehelela, ka mu suua dingi muthu.

⁹ Oxi ikema, ia zoza, i i ta ngololo; Libano u kala ni sonhi, hé uia ni kuxoueta; Salone ua biluka kikangalakata; Baxane ni Kalamelu mafe mâ ma lalumuka.

¹⁰ Kiki-phe kiá ngi balumuka, eme Jihova; kiki ngi balumuka eme-muène, anga a kà ngi jingisa.

¹¹ Enu muemita ixaxi, mua-nda kuvuala ibhiate; o muha uenu u mua bhusu, ua-nda ku mi hábula kala túbhia.

¹² O ifuẋi ku mundu, ia-nda kukala mukuâ ni hâla ia bambuka túbhia; a kà bhia mu túbhia kala minha ió-batujule.

¹³ Enu muène ku makanga, ivenu kioso ki ngene kubhanga; enu-phe muène bhua zukama, ijiienu o kutena kuami.

¹⁴ Akua-ituxi mu Ziione uoma ua a kuata, akua-mangonha kua a tula kiteketela. Mukuahi mudietu u tena kutunga bhuamoxi ni mulengu ki uene kujima?

¹⁵ Kikale uoso uenda ni kuiuka, ni ió u zuela ima iafuama o kidi; uoso u texi dikanga o nganhu ijila mu ku bhûnda, uoso ka xikina kitadi kioso-kioso kia diminhinu bhu maku mê; uoso u xita o mátui mê phala kʼevue maka ma kubhubhisa manhinga, anga u jika o mesu mê phala ka mone ima ia-ibha,

¹⁶ O muthu iú ua kà tunga kididi kia di-leka; disuamenu diê, o jimbongo jótunge ku matadi; a mu bhana jinga kúdia kuê, o menha mê ma kalé.

¹⁷ Eie o mesuʼé a kà mona Muenexi mu uuabhelu uê, a kà kengelela ue oxi ia di zale ku makanga.

¹⁸ O muẋima ué ua-nda kuxinganeka mu kulembalala kioso ki kala kimbuua, uixi: O kiki-phe musoneki iú kuebhi? O mukua kutambula lubhaku iú kuebhi? mukua kualula tuthôndo iú kuebhi?

¹⁹ Athu ió, a kuatesa uoma, kua kà a mona dingi, akua kudingula, a bhingi kia zuela ki ki jimbuluka, akua mbimbi iengi, i bhinga ku ivua ki i xikina.

²⁰ Talesa-ze ku Ziione, diembu dietu dia ionge ikôla; o mesu mé ma kà mona Jeluzaleme, dibhata dia ximbakata; iene o balaka i xalela-ku, jiphapha jê kene ku ji vuza, o mikolo iê ki iene kubatuka.

²¹ O muenhomo Jihova ua-nda ku tu kala ditunda, ua kà bhanga kididi kia jingiji ni jihungulule ja dixala; ki mu bhite ulungu uendela ku malemu, ki muendela ue naviiu iadikota, lémbue.

²² Mbata Jihova muene Mufundixi uetu; Jihova muene Mubhani-a-ngonge ietu; Jihova muene Muenexʼetu, muene ua kà tu bhulula.

²³ Kindala eie o mikolo ié iazoza; ialémbua kufikidila o muxi ua mvela, ni mvela iene ka i futununa-ku; bhenhobho o mbole ia madibhundila i kala ia nzungule, anga a di uanena-iu; katé ni inema ia inama, a kà suta ue ku unhanga uenhú.

²⁴ Ki bhua kà kala mukuabhata mu Jeluzaleme uila: Nga kata, lémbua, mukonda o mundu ua kà tunga-mu, ki ua kà kala dingi ni kikuma, mbata o ituxi iâ ioso a kà a loloka-iu.