Izaía 32 - O Mikanda Ikola

O kutumina kua muenexi uaiuka

¹ Talesenu, kua-nda kukala sobha ua kà hinga unganga ua kuiuka, o ilamba iê ia kà tumina mu kidi ni kutetuluka.

² Dikuenze muenhó ua kà kala disuamenu kiza o kitembu, dilengelu kiza o kalêmba, mukua ni jingiji ja menha mu mikáu ia kukuta, uila ue kala kilembeketa kia ditadi dionéne mu ixi ia kikáku, mua kambe o menha.

³ O mesu a iá, oso a mona, ka kà tala kudima, o mátui a iá oso evua, a kʼevidila muene.

⁴ Muẋima-phe ua iá a tobho, ua kà tongolola o unjimu; o dimi dia akua kukukuma dia kà zuela muene kiambote.

⁵ O seletete ka-nda ku mu ixana dingi mujitu; o kinjenje ka kà mu ila dingi mubhani, mubhangiʼambote.

⁶ Mbata o seletete uzuela useletete uoso, o muẋima ue u bhanga ima ia kubhuma, ndunge iê o kubhanga mangonha, katé ni Jihova u mu tanga ibhengèle, ukakula mukua-nzala, o mukua-dinhota u mu kambesa o menha.

⁷ O jindunge joso ja kinjenje, jaiibha; o muene u funha isunji, mbé o kujikinisa oso a lenduka ni maka ma mangonha, né kiá o phulungu ua zuelʼé ima ia kuiuka.

⁸ Maji muthu a mu edi mujitu, u kana ujitu uene; mukonda dia ujitu uê, uimana kididi, utunga, usoma.

Ahatu ala ni usudi mu Jeluzaleme a a dimuna

⁹ Enu ahatu, oso mua akua usudi, balumukenu mu ivue dízui diami: enu ana-ilumba, mua di fiiala kinéne, bhanenu mátui ku maka mami.

¹⁰ Kuma mu muvu ni izuua, a kà mi titidisa muene, enu ana-ilumba mua di fiiala kinéne, mukonda o kumuna kuà kʼabhua, o ki mua bhongolola-ku ki kia moneka.

¹¹ Teketenu, enu mu ahatu mua di landuka, mu akua usudi; salumukenu, enu mu ana-ilumba, mua tunga mua soma; zulenu mu ende tuẋi-a-thakala, di-ẋiẋikienu kidinhaji mu inhonga.

¹² Bhua-nda kukala ku di-bunda bhu jithulu, mbé o milenga iâ, mbé o midiva iâ iemi.

¹³ Kua-nda kuiza minha ni isasa kulu diaʼxi ia mundu uami; kiene kimoxi ni ku thanduʼa jinzo ja kutana, mu diembu dia kata o ku tumbujuka ni ngalasa.

¹⁴ Mbata dizemba dia kà xala ngundu, muxindu ua diembu ua-nda kubhua-ku; Ofele, ni tuthondo tua tungudita tua alangi, tua kà xala jingenda katé ku hádia, tu kala phala matonokenu ma mikete ku mukáu, ni makêla phala ibhaku,

¹⁵ katé o Nzumbi i tunda bhulu kia kà di-lundulula ku thandu dietu; mu kizuuʼokio, oxi ia kisèkele ia-nda kubiluka mavu a idima, o mukáu uene mu kubhana o idima a kà u kita ditutu.

¹⁶ O kutetuluka kua kà kala mu kikangalakata, o ubatuilu ua iuka ua kà kala mu mavu a idima.

¹⁷ O ibundu ia kuiuka ia kà kala kutululuka; o ukalakelu ua kuiuka o kunhoha ni ku kondama mu thembu joso.

¹⁸ O athu ami anga a kà tunga mu diembu dia batama, ni mu madiembu a kondama, ni mu ididi ia tululuka ia kunhoha.

¹⁹ Maji né hanji ki u kulumuka mu muxitu kua kà noka mvula ia matadi, anga diembuʼodio di senguluka katé dia buila.

²⁰ Mua zediua enu oso mu akua ku kuua-kuua ku mbanduʼa menha moso; anga mu bhitisa-ku o kinama kia ngombe ni kia bulu.