Izaía 15 - O Mikanda Ikola

Muzambu ua kibuika kia Mouabhe

¹ Kimbamba kia Mouabhe, kutanga kidi, Ale dia Mouabhe a mu buikisa mu usuku umoxi, ia a mu sengulula; kutanga o kidi, Kidi dia Mouabhe a mu buikisa mu usuku umoxi, iá a mu sengulula uê.

² Iu banda ku Baiite, ni ku Dibone, ku thala kuná ni kudila; Mouabhe ua-nda kuta jingololo mukonda dia Nebo ni Medeba; mítue ioso ia kà biluka mabhaia ni dilamba, o miezu ioso ue a-nda ku i bhuta.

³ A zuata idinhaji mu jinzunga jâ; ia kumbila ku matala, ia kumbila bhu itanda, ia dila-dila ni lujiji.

⁴ Kienhiki ni Hexebone ni Eleiale, ia ku jingololo; dízui diâ u dʼivila ku Jahaze; kia bhangesa kuila, makuenze a maneka mu Mouabhe a di kola, a kala ni kikote kia dikota, muenhu uâ ua kenana.

⁵ Muẋima uami u ta jingololo mbé Mouabhe; ilamba ié ia lengela ku Zouale, mukuâ ni seseme ia ngombe ia mivu itatu; kuma ia aia ni kubandela ku Luhite ni kudila, mbata mu njila, mu njila ia Holonaime, akuata-mu mukumbi ua kikote, ala ku dikola mukonda dia kibuika.

⁶ Kuma o kukamba menha ma Nidime kua dibhange ue kíbhidi; mbata iangu iakukuta kiá, mafe ma lalumuka, kana-ku ngó kathumbi ka buingita.

⁷ Kienhiki nzungule ioso ia bhongoluele, ni ia lundile, ioso iii a kà iambata mu kahonga ka misalakelu.

⁸ Kuma ngololo ianda kukondoloka mu jimbambe ja Mouabhe; ku kumba kuâ kua-nda kubhiẋila ku Englaíme, o jingololo ue katé mu Belelime.

⁹ Kuma menha ma Dimone mezala manhinga, mbata oso a subhukile ngʼa kuuila dingi kua Dimone; ngambe ngixi, oso a bhulaka mua Mouabhe, ngá seiela jihoji, kiene ue ki bhita na-kiu ió oso a subhuka mʼoxiʼomo.