Ijila 8 - O Mikanda Ikola

O kulumbila Alá ni anʼê

¹ Jihova anga u ambela dingi Mozé, uixi:

² U kuata Alá ni anʼê a mala kumoxi-nê ni izuatu, ni maji a kuundila, ni kangombe ka sata ia kituxi, ni ilumbe iiadi ia jimbudi, ni kinda kia jimbolo ja kambe felemendu;

³ anga u bhongolola o kilômbo kioso bhu muelu ua balaka ia kutakanena.

⁴ Mozé anga u bhanga kala kia mu tumu Jihova; kilômbo kioso anga ki bhongoloka bhu muelu ua balaka ia kutakanena.

⁵ Mozé anga u ambela kilômbo, uixi: Kienhiki kiene kia tumu Jihova kubhanga.

⁶ Mozé anga u bhiẋidisa Alá ni anʼê a mala, u a eẋika ni menha.

⁷ Anga u mu zuika divunga, u mu kuta ni phonda, u mu zuika o mbinza, u ta-ku ni efodi, u mu kuta dingi ni phonda ia makembu anga u mu iudika kiambote.

⁸ U mu nhenga o kixita-thulu ku phetu: o mu kixita-thulu u ta-mu Udimi ni Tumimi.

⁹ Anga u mu ta kijinga ku mútue; o ku kijinga, bhu dibhomo, u kutila-ku xapa ia ulu, kifua kitundu kikôla; kala kia tumu Jihova kua Mozé.

¹⁰ Mozé hé u katula maji a kuundila, u unda balaka iene, ni ima ioso iala-mu, hé u i kôlesa.

¹¹ Anga u ma sangela ue ku kalatódio lusambuadi, u unda kalatódio ni imbamba iê ioso, ni mbasinha ni mbunda iê i tula bhoxi, phala ku i kôlesa.

¹² Anga u lundulula o maji a ku undila mu mútue ua Alá, mu ku mu unda, ni ku mu kôlesa.

¹³ Mozé anga u bheka ue anʼa Alá a mala, hé u a zuika ue o mavunga, u a kuta jiphonda, u a ta o ijinga ku mútue, kala kia tumu Jihova kua Mozé.

¹⁴ Anga u tuma ku mu bhekela kangombe ka sata ia kituxi, Alá ni anʼê anga a tula maku mâ mu mútue ua kangombe ka sata ia kituxi.

¹⁵ Anga u ka jibha; Mozé anga u tambula o manhinga, u a ta ku jimbinga ja kalatódio ni mulembu uê, anga u bonza o kalatódio kene koso, o manhinga a subhuka-ku anga u a eẋikila bhoxi dia kalatódio u ka bhangela kiamenga, u ka kôlesa.

¹⁶ Anga u katula o banha ioso iala ku mídia, ni iala ku miẋima ia zukamena ku anasonhi, ni anasonhi ene ni banha iâ; Mozé anga u i ohela ku kalatódio.

¹⁷ O ngombe-phe ni kibha kiê ni xitu iê, ni ditobe diê, ua i oha ni túbhia ku mukáu ku kanga dia kibangu kala kia tumu Jihova kua Mozé.

¹⁸ Anga u tuma ku mu bhekela o kilumbe kia mbudi, kia sata ia kuoha; Alá ni anʼê anga a tula maku mâ ku mútue ua kilumbe kia mbudi.

¹⁹ Anga u ki jibha, Mozé anga u eẋika manhinga mê mu jimbandu joso ja kalatódio.

²⁰ Kilumbe anga u ki bhanga idiandu; Mozé anga u oha o mútue, ni idiandu, ni banha.

²¹ O mídia anga u i sukula ni menha, ni inama iê; Mozé anga u oha kilumbe kiene kioso ku kalatódio; kuma sata ia kuoha ia dizumba diambote; ujitu ua Jihova ua ku mu bhakuila ni túbhia, kala kia tumu Jihova kua Mozé.

²² Anga u tuma ku mu bhekela o kilumbe kia mukuá, kilumbe kia ku di lumbila; Alá ni anʼê anga a tula maku mâ mu mútue ua kilumbe.

²³ Anga u ki jibha; Mozé anga u katula ku manhinga mê, u ta-ku bhu sungu ia dítui dia Alá, ku mbandu ia kúdia, ni ku sungu ia mulembu ua kikota ua lukuaku lua kadilu, ni ku sungu ia mulembu ua kikota ua kinama, ku mbandu ia kúdia.

²⁴ Mozé anga u bhiẋidisa ue anʼa Alá, u a bhanga ue kienhiki, bhu pondo ia dítui dia kadilu ni bhu pondo ia mulembu ua kikota ku lukuaku lua kadilu, ni ku mulembu uakikota ua kinama kia mbandu ia kúdia; Mozé anga u eẋika manhinga oso a subhuka-bhu mu jimbandu joso ja kalatódio.

²⁵ Anga u katula o banha iê ioso ni mukila uanete, ni banha ioso ku mídia, ni banha iala ku miẋima, ni anasonhi ene kiiadi kiâ ni banha iâ, ni kinama kia taku kia mbandu ia kúdia.

²⁶ O mu kinda kia jimbolo ja kambe felemendu, jala bhu pholo ia Jihova, anga u katula-mu mbolo imoxi ia kambe felemendu, mbolo imoxi ióte maji, ni bolaxa imoxi, u ji ta ku thandu dia banha ni ku thandu dia kinama kia taku kia kadilu.

²⁷ Iene ioso iii anga u i tula bhu maku ma Alá, ni bhu maku ma anʼê, anga a i bhuka bhu pholo ia Jihova, kifua ujitu ua kubhukila.

²⁸ Mozé anga u i tambula dingi bhu makuʼâ, anga u i ohela ku kalatódio, ku thandu dia sata ia kuoha; kifua ujitu ua ku di lumba, ua dizumba diambote; ujitu ua kubhakuila Jihova, ni túbhia.

²⁹ Mozé anga u tambula o phetu, u i bhuka ue kuma ujitu ua kubhukila bhu pholo ia Jihova, diene o dikânda dia Mozé, ku kilumbe kia ku di lumbila; kala kia tumu Jihova kua Mozé.

³⁰ Mozé anga u tambula ku maji a kuundila, ni ku manhinga ala ku kalatódio, ua sangela kua Alá, ni ku izuatu iê, ni ku anʼê kumoxi ni izuatu iâ anga u kôlesa Alá ni izuatu iê, kumoxi ni anʼê, ni izuatu iâ.

³¹ Mozé anga u ambela Alá ni anʼê, uixi: Xitu mu i lambela bhobho bhu muelu ua balaka ia kutakanena; mu i dile bhenhobho, ni jimbolo jala mu kinda kia ku di lumbila, kala ki nga ki tendelesa ngexi: Alá ni anʼê ene a i dia.

³² Maji se ku xitu ku subhuka, mba ku jimbolo, kikale mu i oha mu túbhia.

³³ O bhu muelu ua balaka ia kutakanena, ki mu tunde-bhu luua; mu bhanga bhobho sambuadi dia izuua, katé izuua ienu ia ku di lumbila ia tena; kuma muene ua-nda ku mi lumbila mu sambuadi dia izuua.

³⁴ Kioso ki tua bhange kizuua kia lelu, Jihova kiene kia tumu ku ki bhanga, phala ku mi bhangela kiamenga.

³⁵ Mu kala-phe bhu muelu ua balaka ia kutakanena usuku ni muanha, mu sambuadi dia izuua, mu kukumbidila kia mi tendelela Jihova, phala ki mu fue; kuma eme kiene kia ngi tendelesa.

³⁶ Alá ni anʼê anga a kumbidila kioso kia a tumu Jihova kua Mozé.