Ijila 6 - O Mikanda Ikola

Kuêla mu kudia mukuenu mangonha

¹ Jihova anga u ambela dingi Mozé, uixi:

² Se muthu u ta kituxi, anga u tondala kua Jihova, mu ku di tuna kubhana kua mukuá o kimbamba kia mu bhana kulanga, mba kima kia mu bhakesa, mba ua ki nhana, mba u bhanga kusuina anga u bhunda kima kia ngene kia mukuá,

³ mba kima kia texikile iu ua ki bongo, o mu ku di tuna há u ta muloko ua makutu, mba u bhanga kima kiengi kioso-kioso ku ima iii ia bhingi kuila muthu nʼa i bhange ua te kituxi,

⁴ se kiene ki kia bhiti, kituxi ua ki te, uala ni kuêla; kikale u futa kioso kia nhana, mba kia tambula mu kusuina mba kimbamba kia mu bhakesa, mba kiangene kia bongo, o mukua kiê ua mu ijiia,

⁵ mba kima kioso-kioso kia tela mulûko ua makutu; kikale u ki vutula muene kiene kioso kia tenena, nʼa te-ku dingi mbandu ia katanu ia kiki kia futu; o uoso mukua kiê muene a mu bhana-kiu, mu kizuua kiene kia di mono iú kuila uala ni kuêla.

⁶ U bheka ujitu kua Jihova mu kuêla kuê, kilumbe kia mbudi kiadisanze kiambote sé ngó unema, eie-muène u ki mona se kia te kiasoko, anga u ki bhana kua nganga;

⁷ o nganga anga u mu bhangela o kiamenga bhu pholo ia Jihova; anga a mu loloka kioso kia bhange kia mu bhekela o kuêla.

Unganga mu bhana jisata ja kuoha

⁸ Jihova anga u ambela dingi Mozé, uixi:

⁹ Tuma Alá ni anʼê, kuma: Ngonge ia jisata ja kuoha ienhiʼii: o sata ia kuoha i zeka ku jihuinhi jê ni kuuana ku kalatódio usuku uoso katé kuákie mu kimene; o túbhia tuê a tu uamesa ku kalatódio usuku uoso.

¹⁰ O Nganga u di ta kizuatu kiê kia linho, mu inama u zuata jikalasá jê; anga uʼomona utôkua kioso o túbhia ki tu tunda mu kujikinisa o sata ioso, ku kalatódio, o uthôkua anga ù tula bhu mbandu ia kalatódio.

¹¹ Anga u zula izuatu iê, u di ta iengi; nʼambate utôkua ku kanga dia kibangu bhu kididi kia zele bhuoso bhuala o dixita dia utókua.

¹² O túbhia-phe ku kalatódio tu kala jinga mu uama thembu joso, ka tu ehela kujima; o nganga uia ni ku ta-ku dingi jihuinhi izuua ioso mu kimene; o ku thandu diê sata ia kuoha a i zale kuenhoko, ni banha ia jisata ja paze kuene ku a i ohela.

¹³ O túbhia ku kalatódio tu uama jinga usuku ni muanha, ki tu jimi dingi.

Unganga ku mubhaku ua musa

¹⁴ O Ngonge ienhiʼii ia mubhaku ua musa: anʼa Alá ene a u bhana kua Jihova ku pholo bhua lulama ni kalatódio.

¹⁵ Umoxi mudiâ anga u katula-ku dibhûbhu diê ku fuba ia uabha kiambote ia mubhaku ua musa, ni ku maji u katula-ku, o uasu ua dizumba uene uoso ua bhana ku mubhaku ua musa u u ta koko, anga u i ohela ku kalatódio mu bhanga dizumba diambote, kifua ujitu ua kulembalesa ua dizumba dia mbote kua Jihova.

¹⁶ O ioso ia subhuka-ku, Alá ni anʼê ene a i dia; a i dia ia kambe felemendu, a i dila bhu kididi kikola; mu kithâdi kia balaka ia kutakanena muene mua i dila.

¹⁷ Ka i kange ni felemendu. Nga a bhana-iu kuma dikânda diâ, ku maujitu mami ma ngi bhakuila ni túbhia; i kôla kinéne, ia soko ni sata ia kituxi, ia soko ni sata ia kuêla.

¹⁸ Mala oso ku anʼa Alá ene a dia-ku; dikânda diâ izuua ioso, katé kua suka miji ienu, diókatule ku maujitu ma Jihova ma mu bhakuila ni túbhia; uoso u kuata-ku ua di bhange kiá muthu ukôla.

Ni nganga u bhana ue mubhaku uê ua musa

¹⁹ Jihova anga u ambela dingi Mozé, uixi:

²⁰ Ujitu uenhú ua tokala Alá ni anʼê kubhana bhu kizuua kia mu unda ni maji ku unganga mbandu ia kakuinhi ia efah ia fuba ia uabha kiambote ia mubhaku ua mákudia; kaxaxi kê a ka bhakula mu kimene, kaxaxi mu ngoloxi, ni ku hádia kiene kia kà bhanga jinga.

²¹ Fuba iii a i lunga ni maji, anga a i kangela bhu kienga; o kioso ki i lungana kiá kiambote, kiene ki u i bheka; o jimbandu jê ja kanguka kiambote, jene ji u bhana ku mubhaku ua musa, ua dizumba diambote kua Jihova.

²² Ni nganga ioso a mu unda, monʼê uoso hádia u mu bhingana, kiene ue kia kà bhanga; kijila kiê ki nangenena, o ujitu uenhú a u ohela jinga Jihova, uene uoso ki ku xala kima.

²³ Kala kiki o mubhaku uoso ua musa ua bhana o nganga, ki kale a u oha uoso katé ua jokota; ki ku di muthu.

Ngonge ia sata ia kituxi

²⁴ Jihova anga u ambela dingi Mozé, uixi:

²⁵ Ambela Alá ni anʼê, kuma: Iene o ngonge ia sata ia kituxʼii bhu kididi bhuoso bhene kujibhila o sata ia kuoha, ni sata ia kituxi bhene bhua i jibhila bhu pholo ia Jihova; kuma i kôla kinéne.

²⁶ Nganga uoso ua i bhakula mu kusatela kituxi, muene u i dia; u i dila bhu kididi kikôla, mu kithadi kia balaka ia kutakanena.

²⁷ Kima kioso-kioso ngoho ki di tuta-ku ku xitu ia sata iii, kima kiókio kikôla kiá; se ku manhinga mê ku sonokena dibêbe ku kizuatu kioso-kioso, kikale kizuatuʼokio a ki sukuila mu kididi kikôla.

²⁸ Imbia ia mavu muoso mua i lambela, kikale u i bula; se a i lambela mu ímbia ia ngôndo, kikale a i seka, anga a i sanguluila mu menha.

²⁹ Diiala dioso ku jinganga, u diê-ku; kuma kima kikôla kinéne.

³⁰ Maji o sata ia kituxi-phe ia kuila manhinga mê a ma bheka mu balaka ia kutakanena, mu bhanga kiamenga mu kididi kikôla, ioio ka i di; kikale iene ioso a i oha mu túbhia.