Ijila 4 - O Mikanda Ikola

Sata ia kusatela kituxi kia te o nganga mu kukamba ku kʼijiia

¹ Jihova anga u ambela dingi Mozé, uixi:

² Ambela anʼa Izalaiele, kuma: Se muthu u ta kituxi ni kutondala kua ku kamba ku kʼijiia, ka ki bhange kiluelu mu ima ioso ia kidika Jihova kuila kana ku i bhanga, muene anga u bhanga-bhu kima kimoxi.

³ Se o nganga muene a mu undu ni maji muene ua te o kituxi, anga mundu ki a iibhila beneʼobho-phe kituxi kiê a ki bhele sata kua Jihova, sata ia kuoha ia monʼa ngombe ua kiubha, ngombe ia ndumbe, iadisanze kiambote sé ngó unema uoso-uoso mba dibaka.

⁴ Ngombe a i bheke bhu múelu ua balaka ia kutakanena; anga muene a tule lukuaku luê mu mútue ua ngombe, nʼa i jibhile bhu pholo ia Jihova.

⁵ Bhenhobho o nganga a mu undu ni maji anga a katule ku manhinga ma ngombe, a ma bheke mu balaka ia kutakanena;

⁶ nganga anga u bondeka o mulembu uê mu manhinga, hé u a sangela lusambuadi bhu pholo ia Jihova, ku pholo ia kibatulu kia xitila mu xilu, mu kididi kikôla kinéne.

⁷ Nganga u ta ue o manhinga ku jimbinga ja kalatódio ka uasu ua uabha o dizumba, bhu pholo ia Jihova, kala mu balaka ia kutakanena; manhinga ma mukuá moso u a eẋikila bhoxi dia kalatódio ka jisata ja kuoha, kala mu kithâdi bhu mbandu, a muelu ua balaka ia kutakanena.

⁸ O banha ioso ia ngombe ia sata ia kuoha u i katula-ku; ni banha iala ku dikutu ni ioso iala ku midia,

⁹ ni anasonhi ene kiiadi kiâ ni banha iê ialela ku malombo, ni banha ia vungu o miẋima ia zukamena ku anʼasonhi, u i katuila kumoxi ni anʼasonhi,

¹⁰ kiene ki a i katula ku ngombe ia sata ia paze, kiene; ienhiʼii nganga anga u i ohela ku kalatódio ka jisata ja kuoha.

¹¹ O kibha-phe kia ngombe iii, ni xitu iê ioso, ni mútue, ni inama iê, ni mídia ni ditobe diê,

¹² kifua ngombe iene ioso kiá, u xia bhu kibangu, hé u i bheka ku mukáu, bhu kididi kiazele, bhu dixita dia utôkua, anga u i ohela bhobho ku jihuinhi ni túbhia; bhuoso bhu dixita dia utôkua bhene bhu a i ohela.

Sata iakusatela kituxi kia mundu kia te ni kukamba ku kʼijiia

¹³ Maji se o kilômbo koso kia Izalaiele mu kukamba ku kiʼjiia a ta kitu-xi, mundu uoso a di jimbi ka kʼijiia, ku ima ia kidika Jihova sai kima kia bhange, ala ni kuêla;

¹⁴ kioso kia tukumuka kuma kituxi kia te, mundu uâ uoso a kuate ngombe ia sata ia kuoha mu kiamenga kia kituxi, hé a i bheka bhu kanga dia balaka ia kutakanena.

¹⁵ O adiakimi oso a kilômbo a tule maku mâ bhu mútue ua ngombe, bhu pholo ia Jihova; ngombe anga a i jibhila bhu pholo ia Jihova.

¹⁶ Bhenhobho o nganga a mu undu ni maji u ambata ku manhinga ma ngombe, anga u a bheka mu balaka ia kutakanena;

¹⁷ nganga anga u bondeka mulembu uê mu manhinga, hé u a sangela lusambuadi bhu pholo ia Jihova, kupholo kunu dia kibatulu.

¹⁸ Ku manhinga enhó ue u ta-ku ku jimbinga ja kalatódio kala bhu pholo ia Jihova, mu balaka ia ditakanenu; o manhinga ma mukuá moso ma subhuka-ku u a eẋikila bhoxi dia kalatódio ka jisata ja kuoha, mu kithâdi bhu mbandu ia muelu ua balaka ia dibhongolokelu.

¹⁹ O banha ioso-phe u i katula-ku, hé u i ohela ku kalatódio.

²⁰ Kiene kia bhangʼiki, kioso kia bhanga ni ngombe ia sata ia kusatela kituxi, ni iii ue kiene; kala kiki nganga u a bhangela kiamenga, nʼa a loloka.

²¹ Ngombe iene ue anga u xia na-iu bhu kibangu, hé u i bheka ku mukáu, u i ohela koko kala kiohele ngombe ia dianga; iene sata ia kusatela kituxi kia mundu.

Sata ia kusatela kituxi kia kilamba kia te mu kukamba ku kʼijiia

²² Se bhu kala kilamba u ta kituxi kia kutondala, ka ki bhange kiluelu, maji u bhanga kima kia kidika Jihova kuma kana ku ki bhanga, iú uala ni kuêla;

²³ mba kituxi kiê kia te a mu tangela-kiu, kia zubha ku kʼijiia-phe kuila kituxi ki a te, a bheke ujitu uê; kisutu kia hombo kiadisanze sé ngó unema.

²⁴ Anga u tula lukuaku luê mu mútue ua kisutu kia hombo, hé a ki jibha, a ki jibhila bhu kididi bhuoso bhene kijibhila o sata ia kuoha bhu pholo ia Jihova; kuma iii sata ia kusatela kituxi.

²⁵ Bhenhobho o nganga, ni mulembu uê, a katule ku manhinga ma sata ia kituxi, a te ku jimbinga ja kalatódio ka jisata ja kuoha; o manhinga oso a subhuka-ku u a eẋikila bhu kikota kia kalatódio ka jisata ja kuoha.

²⁶ Banha iê ioso u i ohela ku kalatódio, kala o banha ia sata ia paze ki ene ku i oha; nganga anga u mu bhangela kiamenga mukonda dia kituxi kiê, anga a mu loloka.

Sata ia kusatela kituxi kia muthu uoso-uoso kia te mu kukamba ku kʼijiia

²⁷ Se bhu kala muthu dingi uoso-uoso ku akua-xi u ta kituxi, maji ka ki bhange kiluelu, hé u bhanga kima kia kidika Jihova kuma kana ku ki bhanga, iú uala ni kuêla;

²⁸ mba o kituxi kiê mua di bhale a mu tangela-iu, kia zubha ku kʼijiia kuila kituxi ki a te, a bheke ujitu uê; hombo ia mukaji, iadisanze sé ngó unema, mu satela kituxi kié kia te.

²⁹ Anga u tula lukuaku luê mu mútue ua sata iê ia kusatela kituxi, sata anga a i jibhila bhu kididi bhuoso bhene kujibhila o sata ia kuoha.

³⁰ Bhenhobho o nganga anga u tambula ku manhinga, u a ta ni mulembu uê ku jimbinga ja kalatódio ka jisata ka kuoha, o manhinga ma mukuá ene oso, u a eẋikila bhoxi dia kalatódio bhu kikota kiê.

³¹ O banha ioso u i katula-ku kala kiene kukatula banha ku sata ia paze; nganga anga u i ohela ku kalatódio kuma dizumba diambote kua Jihova; nganga anga u mu bhangela kiamenga, anga a mu loloka o kituxi kiê.

³² Maji se u bheka mbudi mu ujitu uê ua kusatela kituxi, u bheka mukaji uadisanze sé ngó unema.

³³ Anga u tula lukuaku luê mu mútue ua sata iê ia kusatela kituxi, anga u jibha kuma sata ia kituxi, bhu kididi bhuoso bhene kujibhila o sata ia kuoha.

³⁴ O nganga-phe anga u tambula ku manhinga, u a ta ni mulembu uê, ku jimbinga ja kalatódio ka jisata ja kuoha; o manhinga ma mukuá ene oso, u a eẋikila bhoxi dia kalatódio bhu kikota kiê.

³⁵ O banha ioso u i katula-ku, kala ki ene kukatula banha ia mbudi ia sata ia paze; nganga anga u i ohela ku kalatódio, ku thandu dia maujitu ma Jihova ma kubhakula ni túbhia; nganga anga u mu bhangela kiamenga mukonda dia kituxi kiê kia te, anga a mu loloka-kiu.