Ijila 3 - O Mikanda Ikola

Jisata ja mutululuku mba ja kusakidila

¹ O ujitu ua muthu-phe se u kala sata ia paze mba ia kusakidila, se u katula kibhaku mu kibhanga, mba ndumbe mba mukaji, kikale-phe kia disanze sé ngó unema mba dibaka bhu pholo ia Jihova.

² Muthu ua bhana ujitu u tula lukuaku luê mu mútue ua kibhaku, hé a ki jibhila bhu muelu ua balaka ia kutakanena; jinganga anʼa Alá anga eẋika o manhinga mu jimbandu joso ja kalatódio.

³ Ku sata ia paze a katula-ku kia kubhakula ni túbhia kua Jihova; o banha iala ku dikutu ni ku mídia,

⁴ ni anasonhi ni banha iê ialela ku malombo, ni banha ia vungu o miẋima ia zukama ku anasonhi, ienhiʼii a i katula-ku.

⁵ Anʼa Alá a i ohela ku kalatódio, sata ia kuoha a i tula ku jihuinhi jala ku túbhia; kifua ujitu ua kubhakula ni túbhia, ua dizumba diambote kua Jihova.

⁶ Se o ujitu uê ua sata ia kuoha ia ku satela Jihova, u kala ua kibhaku kia mbudi mba hombo, kixi ndumbe mba mukaji, ki kale-phe kiadisanze kiambote sé ngó unema uoso-uoso.

⁷ Se mbudi ia bhakula mu ujitu uê, a i bheka bhu pholo ia Jihova bhene bhua i bhakuila;

⁸ a tule lukuaku luê mu mútue ua kibhaku, a ki jibhile bhu muelu ua balaka ia kutakanena; o jinganga anʼa Alá anga eẋike o manhinga mê mu jimbandu joso ja kalatódio.

⁹ Ku sata ia kutululuka sai kia katula-ku, kia kubhakula ni túbhia kua Jihova: o banha iê, ni mukila ua nete uene uoso a u batuila bhu ua kuatela ku miongo, ni banha iala ku dikutu ni ku mídia,

¹⁰ ni anasonhi ni banha iê ialela ku malombo, ni banha ia vungu o miẋima ia zukama ku anasonhi, ienhiʼii a i katula-ku.

¹¹ O Nganga anga u i ohela ku kalatódio; kuene o kúdia kua ujitu ua kubhakula ni túbhia kua Jihova.

¹² O ujitu uê se u kala hombo, a i bheke bhu pholo ia Jihova bhene bhua i bhakuila;

¹³ muene a tule o lukuaku luê mu mútue ua kibhaku, a ki jibhile bhu muelu ua balaka ia kutakanena; o anʼa Alá anga eẋika o manhinga mê mu jimbandu joso ja kalatódio.

¹⁴ Ku kibhakuʼiki sai-phe kia katula-ku, kia kubhakula ni túbhia kua Jihova; o banha ioso iala ku dikutu ni ku mídia,

¹⁵ ni anasonhi ni banha iê ialela ku malombo, ni ia vungu o miẋima ia zukama ku anasonhi, ienhʼii a i katula-ku,

¹⁶ o nganga anga u i ohela ku kalatódio; kifua kuene kúdia kua ujitu ua kubhakula ni túbhia, kua dizumba diambote; o banha ioso iangene ia Jihova.

¹⁷ Ki kala kijila kienu ki xalela ku izuua ioso, ku miji ienu ioso, ku mabhata menu oso; ki mu die jinge banha mba manhinga.