Ijila 24 - O Mikanda Ikola

O muanu ua kukuatela o jikandeia

¹ Jihova anga uambela Mozé, uixi:

² Tuma anʼa Izalaiele a ku bhekele maji ma midiva, ma di kenze kiambote, mobatele, phala o kimuikinu, mbé o kuuika o jikandeia mu ʼthembu joso-lolo.

³ Alá muene uenda ni ku ji ta kiambote mu ididi iê ku monôno, mu kolôlo ku kanga kunu dia kibatulu kia mvéu kia luluma ni umbangi, mu Balaka ia kutakanena, ji kale jinge bhu pholo ia Jihova mu bambuka kimuanu, tunde mu ngoloxi katé kuáki; ki kale kijila ki xialela ku miiji ienu.

⁴ O jikandeia u ji tula kiambote ku thandu dia ditudilu dia jikandeia dia ulu nda ji kale mu kuuama bhu pholo ia Jihova usuku ni muanha katé ku hádia ni hádia.

O mbolo ia meza ma Jihova

⁵ U katula ue fuba iauabha kiambote anga u i kanga kuinhi dia ʼmbolo ni jiiadi, kadia mbolo i ambata fuba iozonge mu tu-inda tuiadi tu tena kubhana tukuinhi tuiadi tua efah.

⁶ Anga u ji tula bhu pholo ia Jihova ku minôno iiadi, kadia munôno uambata mbolo jisamanu, bhu meza mauabha kiambote ma ulu ua fina.

⁷ Kadia munônė-phe u u kuua uasu ua dizumba ku thandu, uene ukala ujitu ua dilembalesu ku jimbolo; kuma ujitu ua kubhakula ni túbhia kua Jihova.

⁸ Kadia kizuua kia sabhalu, Alá u ta jimbolo ku munôno bhu pholo ia Jihova, mu ʼthembu joso, mu ki bhangela anʼa Izalaiele, ki kale kikutu ki nangenena katé ku hádia ni hádia.

⁹ I kale-phe mbolo iangene ia Alá ni anʼê, ende ni ku i dila bhu kididi kikôla, mbata kima kiakolela-ku phala muene, kia tundu ku ma-ujitu ma kubhakula ni túbhia kua Jihova, kikale kijila ki nangenena katé ku hádia ni hádia.

O kuẋonguena Nzambi ni kaxtiku kê

¹⁰ Anga muʼaxaxi ka anʼa Izalaiele mu solomoka mona-diiala, mamʼâ mukua Izalaiele, o tatʼâ mukua Ijitu; o mona muenhú a mu vuala kuala muzalaiele ua muhatu, ukuata mvunda ni muadiakime ua diiala muzalaiele ue, bhu kilômbo.

¹¹ O mona-diialʼú anga uẋonguena Dijina dia Jihova, u di naka, anga a mu bheka kua Mozé. O dijina dia mamʼâ Selomite, monʼa Divile, ku muiji ua Dane.

¹² Anga a mu ta hanji muʼaleia, ukala muenhomo katé mulonga uê kia u tetulula kuala Jihova.

¹³ Jihova anga u ambela Mozé, uixi:

¹⁴ O ió ua ẋongueneʼó mu tubhule muʼaleia, muie-nê katé ku maxilu ma kilômbo: oso-phe a mu ivile o kuẋongona, a te maku mâ ku thandu a mútue uê; bhenhobho-phe kionge kioso nda ki mu bûbe ni matadi.

¹⁵ Anʼa Izalaiele-phe u a jimbuile, kuamba: Uoso-uoso unaka Nzambi iê, kituxi kiê ki mu xine muene ku thandu.

¹⁶ Uoso ue u ẋonguena o Dijina dia Jihova, ió ni kidi, afue muene; o kionge kioso ki mu bûbe ni matadi; kixi muthu uatundu kuengi, kixi mukua-bhata muene, se nʼa ẋonguena o Dijina dia Jihova, a mu jibhe muene.

Ngonge ia kuvutula phonzo

¹⁷ Uoso ue ujibha muthu, ió, ni kidi, a fue muene.

¹⁸ Maji uoso ujibha kibhaku kiangene, a ki bhinganese, muenhu ufuta muenhu.

¹⁹ Se bhu kala muthu ue unemeka mukuâ, kioso muene kia nemeka mukuâ, muene ue kiene kia mu nemeka;

²⁰ ua bukula kifuba, a mu bukula ue kifuba, diesu mu diesu, dizu mu dizu; dioso kiá o ditota dia xila mukuâ mu ku mu nemeka, diene ue di a mu totana-diu muene.

²¹ Uoso-phe ujibha kibhaku kiangene, a ki vutule, maji uoso u jibha o muthu, muene ue a mu jibhe.

²² O ngonge-phe iene imoxi i mu kala na-iu; kixi muthu uatunda dikanga, kixi mukua-xi, ene oso kiene kimoxi; oko Eme-muène ngi Jihova Nzambi ienu.

²³ Mozé iu uambela anʼa Izalaiele kuamba o pelezo ia ẋonguena ioio, a tubhuke-nê ku maxilu a kilômbo, sembele a mu bûbe ni matadi; anʼa Izalaiele anga a ki bhanga muene kioso kia tumina Jihova kua Mozé.