Ijila 22 - O Mikanda Ikola

Ngonge ia kioso kia dia o ima iòlumbe

¹ Kienhókio Jihova anga uambela Mozé, uixi:

² Tangela Alá ni anʼê kuila, a di lange ni ima iami ikôla ioso i ngi bhakuila kuala anʼa Izalaiele, phala o dijina diami dikola ki di kale disaselelu diâ; Eme Jihova.

³ A tangele: Uoso muthu, ku miiji ienu, ku mbutu ienu ioso-lolo u di thethemeka ku ima ioso ikôla anʼa Izalaiele a i tungula phala Jihova, o muene sai kukasana kuala na-ku, muthu ukala kiki a mu batula bhu pholo iami nʼa ngi bhue ku mesu; Eme Jihova.

⁴ Ku mbutu ia Alá, se kuala muthu uala ni dibhute, mba kibhubhe kia manhinga, kana ku mu ehela kúdia ku ima ikôla, kale uiluka hanji; kiene ue kimoxi ni ió uoso uababata ku kima kia kasana kia muthu uafu, ni diiala uoso uatundu mu sendumuna o mbutu ia luvalu kindala,

⁵ ni uoso uambata kibamba, anga ki mu kasanesa, mba uoso kiá u di kasanesa mu ku di bhiáuna ku muthu ua kasana ni kima kioso-kioso ki bhekela muthu kukasana,

⁶ uoso ngó u di bhiáuna ku ima iii, ukala kienhiki ni kukasana kumbi dioso dia kambàmba, katé ku ngoloxi; ku iima-phe iòsatele Nzambi ka tena ku dia-ku, inda u dianga janji ku dʼiẋika o mukutu uê ni menha.

⁷ Maji o ki tula dikumbi, uazele kiá dise diabhu, u tena kiá kudiê ku ima iósatele Nzambi; mukonda kuene o kúdia kuê kua mu tokala.

⁸ Ka tokala-phe kúdia kima kia di fuila, mba xitu a i ẋuua-ẋuua kuala o iama, phala ka di kasanese ni ima ioio; Eme Jihova.

⁹ A kale mu kualuka jinga o ijiia iami, phala ka balumune-ku kituxi kuthandu diâ, anga a bhitukila-ku o muenhu uâ, kia-nda kuila o ijiia a i lutu kiá; Eme Jihova, ngene ku mi kôlesa.

¹⁰ Nzuangiza ue ka tena kudia ku ima ikôla iosatele Nzambi; musonhi a mu langeka kuala nganga, ni mukua nganhu ima iii kà iʼdie;

¹¹ maji se o nganga u sumba mubhika mu kitadi kiê, o ió ku imʼii udia-ku muene, ni uoso manvala a mu vualela kiá mu dibhata dia nganga; o iá u dia-nâ ku kúdia kuê.

¹² Monʼamuhatu, monʼa nganga, se usakana ni muthu ua tunda dikanga, kuabhu-phe, mona iú ku sata ia kubhakula ia tundu ku ima iangene ikôla ka tena dingi kudia-ku.

¹³ O kʼikala monʼa nganga uala mutudi, mba a mu senge, maji kʼeze ni ana, iú ualukila kua tatʼâ kala kia kexe mʼundenge uê, mamá, ió ku mbolo ia tatʼâ a diê; maji muthu ngó uoso-uoso ua tundu kuengi, kana; ió ka die-ku.

¹⁴ Se muthu, mu kukamba ku kʼijiia, u tukumuka uadi ku ima iangene ikôla, o sata iene-ku u i futa, anga u tudika-ku dingi ki soka ni mbandu ia katanu ia sata iadi, anga u i bhana ioso kua nganga.

¹⁵ Mu a bhanga jinga kienhiki, kifua-phe mua lengesa o mundu phala kʼende ni kukasanesa o ima ikôla ia anʼa Izalaiele, ioso ia bhakula kua Jihova.

¹⁶ Phala ki kia a bhekele kukala ni mulonga ua kuêla kuthandu diâ, mukonda dia kúdia ku ima iangene iokolese; kuma Eme Jihova, ngene ku a zelesa.

Ibhaku ioso ia lumbila ku jisata ki i kale ni unema

¹⁷ Jihova anga uembela dingi Mozé, uixi:

¹⁸ Tangela Alá ni anʼê, ni anʼa Izalaiele oso, u a ambela, kuila: Muthu uoso kiá, mu diánda dia Izalaiele, mba ku jinzuangiza jene mu Izalaiele, uoso kiá ubhakula ujitu uê, hé mba ua kufuta hasa ia tele, mba ujitu ua vondadi iê, ua kubhakula ni túbhia kua Jihova,

¹⁹ a bhane kala kiala mu muxima uê, se ngombe, mba mbudi, mba hombo, ubhakula ndumbe, sé ngó unema.

²⁰ Kana kubhakula kima kiala ni kisemu, kiókio ki ki tena ku kusungila ujitu kua Nzambi, kuma ka ki ẋikina.

²¹ O muthu-phe kia bhindamena kubhakula sata ia paze kua Jihova, se uedi ngi tungula kibhaku ku jingombe mba ku jimbudi, ki kale kia hasa ia tele, ki kale kia ku di fikixila, ki ki kale ni dibaka, phala a ki ẋikine, ka ki sange ni unema uoso-uoso.

²² Kana kubhakula kibhaku kiafu mesu, kia bukuka kidiandu, mba kiahumbuka, kiezala ijimbu ni jifidila, mba kiala ni kihuhu, mba kiala ni mabaka ma hanga-kambu, kiókio ku ki bhakuile Jihova, kana ue ku ki tula ku kalatódio mu ku ki bhakula ni túbhia kua Jihova.

²³ Maji-phe, se ngombe, mba kibhaku kioso ku hombo ni mbudi, kialebhelela idiandu, mba kiabutu idiandu, se uedi u ki bhakula mu ujitu ua ku di fikixila, kiauabha. Maji ku ki bhakula mu futa hasa ia tele, a dituna-nakiu, ka ki ẋikina.

²⁴ Kibhaku ue, se a ki tutula o jimbânga ja matubha, mba a jisasala, mba a ji ẋiatula, mba a ji batula, kana ku ki bhakula mu sata kua Jihova; kana kubhanga kiki mʼoxi ienu.

²⁵ Kana ue kuẋikina kima kala kiki kia tundu bhu lukuakku lua mukua-matumbu phala ku ki satela Nzambi ienu, kuma ima ikala kiki ienda ni kubola kuê; ki iene kutenena; Nzambi ka i ẋikina mu dijina dienu, lémbue.

²⁶ Jihova anga uambela dingi Mozé, uixi:

²⁷ Ngombe mba mbudi, mba hombo, se iòvuale ngó lelu, ikale hanji mu matânga a mamʼâ katé mu sambuadi dia izuua; o ki i bhua, kuabhu, tunde kiá mu kizuua kia kanake katé kiá ku pholo, kibhaku kiókio ki tena kiá kusedivila kiambote mu ku ki bhakula ku sata ia kubhakula ni túbhia kua Jihova.

²⁸ Kana ue kukuata kibhaku ni kamona kê, anga kiiadi kiâ mu ki jibhila-bhu kumbi dimoxi.

²⁹ Jihova ue, se muambe ku mu satela sata ia jiphembele, mu ki bhanga-phe ni muxima uenu.

³⁰ Mu i dia-phe mu lelu ni lelu muene; ki mu xie-ku kama phala mungu; Eme-muène Jihova.

³¹ Kala kiki, endenu ni kualuka o ijiia iami, mu i kumbidile; Eme-muène ngi Jihova.

³² O Dijina diami dikola ki mu di sebulule, phala mu anʼa Izalaiele ngi kale ngi Nzambi ikôla; kuma Eme Jihova ngi mi bhana o kuzela;

³³ oko Eme nga mi katula kʼoxi ia Ijitu, mbé o ku mi kala ngi Nzambi ienu; Eme-muene ngi Jihova.