Ijila 21 - O Mikanda Ikola

O jingonge ni ijiia ia tokala oso a kala jinganga

¹ Anga Jihova uambela kiua Mozé, uixi: Ambela jinganga, anʼa Alá, u a tangela kuma: Muthu a mu edi nganga ka kale mu kotamena kimbi kiafu mu ifuẋi iê, nʼa tambula-ku lufuku.

² Kale muene kiá mukua ʼjiku diê; manhiʼâ, mba phaiiʼâ, mba monʼê ua diiala mba ua muhatu, mba phangʼiê ia diiala,

³ mba phangʼiê ia muhatu, uoso uala hanji muzeletete, ua mu tokala muene, se ka sakana luua; xi, o kua iá kale u di kasanesa muene.

⁴ Muthu-phe uala ngó ndandu, kiafua, ku mu tambuile lufuku, né mbé ei ʼmuene, u dikota mu diembo.

⁵ O Jinganga ka konge mútue, mu kubhanga-mu dibhala, ka bhute ue muezu bhu phaphʼa dítui, kana ue ku di sema jiphoko ku mukutu,

⁶ Jinganga-phe a kale ku ujitu ni Nzambi iâ, o dijina dia Jihova Nzambi iá ka di sebulule, mbata ene axikamena kubhana jisata kua Jihova, ja kubhakula ni túbhia, ene ala kubhakuila Nzambi iâ o musa; ki bhinga-phe a zela muene.

⁷ Ka sakane muhatu uala kiuaia, mba a mu katula kiá o undenge; ka sakane muhatu a mu sange kuala munumiʼê, kuma nganga muthu uangene ua Nzambi.

⁸ Kala kiki, eie u mu kôlesa muene; kuma muene ua xikamena kutela Nzambi iê o mbolo ku meza. Muthu u kala kiki, a mi kale muthu ukôla, kuma Eme Ngi Jihova, ngene ku mi bhana o kuzela, nga zela.

⁹ Se bhu kala monʼa-muhatu, monʼa nganga, ubokona mu uuaia, o ió ualebhukisa phaiiʼâ; mu mu oha mu túbhia.

¹⁰ O nganga iadikota-phe, muʼaxaxi ka phange jê, a mu tunguile anga a mu lunduluila o maji ma ku undila, ia a mu lumbu phala kuzakela o izuatu ikola, nuka a vungununa mútue uê, mba utandůla izuatu iê;

¹¹ ió ka tena kuzukama ku kimbi kioso-kioso, né-mbé phaiiʼâ, mba manhiʼâ, ka tena kutambuila-ku lufuku;

¹² ka tena kutubhuka mu dibhezelu diangene, mba o dibhezelu dia Nzambi iê u di luta, kuma o kitundu kia ku undila kiala ku mútue uê; Eme ngi Jihova.

¹³ O kia sakana, a sumbule muhatu ua muzeletete kiluua ejiia diiala tunde mu undenge uê.

¹⁴ Muhatu, uala mutudi, mba muhatu a mu senge, mba muhatu a mu katula kiá o undengeʼó, mba muhatu a mu edi, kuma kidianzunga, kana; o iá ka tena ku sakana-nâ, kikale u katula muhatu ua muzeletete kʼejiia luua diiala mu kifuẋi kiê, muene u kala muhetuʼê a sakana-nê.

¹⁵ Ka sekalesa o mbutu iê muʼaxaxi ka jindandu jê; mbata Eme ngi Jihova nga mu jingisa.

Ikata ni inema a a kidika kukala jinganga ja kubhana jisata

¹⁶ Jihova anga uambela dingi Mozé, uixi:

¹⁷ Tangela Alá, kuamba: Ki bhua kàle muthu ku mbutu iê, uala ni unema, anga uiza mu kubhana mubhaku ua kúdia kua Nzambi iê.

¹⁸ Kuma ki bhu kale muene muthu ua nemana, uiza mu kubhakula ujitu: muthu uala, kifofo, huhii, mba ua buatakata mazulu, mba mukua idiandu ialebhelela i iadiengeta,

¹⁹ mba ua bukuka kinama, mba ua bukuka lukuaku,

²⁰ mba mukua mulumba ku kunda, mba kiximbi, mba mukua lumvuua mu diesu, mba mukua jihana mba uene ni ijêla ku mukutu, mba mukua mbumbi.

²¹ Ki bhu kale muthu ku mbutu ia Alá, o nganga, uala ni unema kala iú, anga uiza mu kubhana mubhaku ua kubhakula ni túbhia ua tokala Jihova; kuma ka tenena, sai kia mu kambe; ió ka tena kubhiẋila mu kubhakula o musa ua Nzambi iê.

²² Maji o mbolo ia Nzambi iê, kixi ikôla, kixi ikôla kinéne, i tunda ku jisata jikôla kinéne, a diê.

²³ Maji ka bhumine kubokona ni kubhikila ku mvéu, ka tena ue kubhikila ku kalatódio, mukonda ka tenena, mabhezelu mami makôla uavula ku ngi kasanesena-u; kuma Eme Ngi Jihova, ngene mu tena ku a zelesa.

²⁴ Mozé anga ukunda ima ioso iii kua Alá ni anʼê, ni ku anʼa Izalaiele oso muene.