Ijila 12 - O Mikanda Ikola

O ku dʼiẋika kua muhatu kia zubha kuvuala kamona

¹ Jihova hé u tangela dingi Mozé, uixi:

² Zuelela anʼa Izalaiele, kuamba: Se bhu kala muhatu u imita anga u vuala mona-diiala, muhatuʼó ukasana katé mu sambuadi dia kizuua; kala mu izuua ia kukuphala kuê, ukasana ue.

³ O mu kizuua kia kanake a saiesa kamona, a ka batule o kinhunga kiê.

⁴ Kienhókio o muhatu-phe akale dingi makuinhi atatu a izuua niʼtatu ni ku dʼiẋika o manhinga mê; ka kuate-phe ku kima kiangene kia Ngana, o mu dibhezelu ue kʼeze-mu luua; kikale u kumbidila hanji o izuua iê ia ku dʼiẋika.

⁵ Maji-phe se u vuala kamona ka muhatu, u bhanga jisemana jiiadi bhu muanza ua kukasana kuê, kala kia kasana mu kukuphala kuê; anga u bhanga kiua makuinhi asamanu a izuua niʼsamanu ni ku dʼiẋika o manhinga mê.

⁶ Mu kuila izuua iatena ia ku dʼiẋikila o mona-diiala mba mona muhatu, a bheke-phe kambudi ka muvu umoxi kua nganga phala o sata ia kubhakula ni túbhia, a te-bhu ue ni kaphomba mba kadiembe ka mukáu phala kiamenga kiê kia kituxi, bhu muelu ua balaka ia kutakanena,

⁷ o nganga-phe nda a bhakule imʼiii kua Jihova, muhatuʼó a mu iudikile diluuluilu; kiene kiua kia tena kuzela, dise diê diabhu kiua dia kibhubhe kiê kia manhinga; o iii iene o ngonge ia tokala muhatu kia vuala kamona ka diiala mba muhatu.

⁸ O kiela-phe lukuaku luê lua lémbua bhua nomuena kambudi, akuate-phe kiá membe aiadi a mukáu, mba tumembe tuiadi tua bhata, kamoxi phala sata ia kubhakula ni túbhia, o kamukuá phala sata ia kiluuluilu kia kituxi; kienhiki muhatu ió kia mu bhangela o kiamenga kuala nganga, anga u zela kiá.