II Tesalonika 2 - O Mikanda Ikola

Kia kà tukuluka Ngana Jezú, ni kia kà tukuluka o Kisueia

¹ Tua mi bhingi-phe, jiphange, mukonda dia kutukuluka kua Ngana ietu Jezú Kristu, ni kubhongoloka kuetu ni Muène, kuma:

² Ki mu kuate kulungujuka mu ixinganeku ienu, mba mu sasumuka se bhu kala muthu u mi ambela kuila o Kizuua kia Ngana kieza-bhu kiá. Sumba ima ienʼ iii a mi tangela-iu ku muthu uoso-uoso uene mù kola o Njimbu Iambote, mba a i tange kuala musésedi, mba a mi ambela kuila etu tua i soneka mu mukanda uosouoso.

³ Ki bhu kale muthu u mi nganala kioso-kioso. Mukonda kizuuʼ okio ki kiza luua, kikale ku dianga hanji kubhita o thembu ia athu kubaluka, a balukila Nzambi, o muthu ua Kisueia nʼa kà tukuluke, o monʼ a kibuika ió a mu elesela kuia mu inferno.

⁴ Muthu muenʼió u kala mú kituka, u mesena u tunda ioso ia luka exi Nzambi, ioso athu iene ku bheza. Muène ua kà di zangeleka katé muene u xikama mu Tembulu ia Nzambi, nʼa dʼidikise kuma muene Nzambi!

⁵ Manhi enu ki mu lembalala? Ki nga kexile hanji kuenhoko, imʼ iii nga mi tangela-iu.

⁶ O kiki sai-ku kioso kia fudisa kuila imʼ iii i bhita kindala, enuʼ enu mua kʼ ijiia. Maji hinu-phe o Muthu ua Kisueia u tukuluka bhu thembu iê.

⁷ Kuma o Usueia ua Kasuekele ua kuata kiá kukalakala, maji sai-ku hanji uala kufudisa, katé kia kà mu katula mu njila.

⁸ O kia kà zubha ku mu katula-ku, kiene kia kà tukuluka o Kisueiʼokio, u bhinga Ngana Jezú kià kèza ua kà mu jibha ni muha ua dikanu diê, ua kà mu bhuisa-ku ni kisuma kia kutukuluka kuê-muène.

⁹ Kuma o Kisueia iuná, o ku dʼidikisa kuê, kuenda ni kukalakala kuoso kua Satana, ni nguzu ioso ni iphata ni madiuanu ma makutu.

¹⁰ Muène ua kà bhanga mangonha moso, phala kuxômba athu oso anda kutexika. Ene-phe anda kutexika, mukonda nguâ kutambulula o muẋima ua kubhindamena o kidi, ki tena ku a bhulula.

¹¹ Mukonda dia kiki, Nzambi ua a tumikisa nguzu ia a bhekela kavanza ka kutondala, phala a xikane o makutu.

¹² Phala ene oso a kambele kuxikana o kidi, a uabhelele o makutu ni kubhanga o mangonha, ni vondadi jâ, a kà êlese.

Oso a a solela o kubhuluka

¹³ Tua tokala-phe tu sakidila jinga Nzambi, mukonda dia enu, mu jiphange jozole mua Ngana. Kuma Nzambi ua mi sola tunde ku dimatekenu, phala mu bhuluke mu nguzu ni kutena kua Nzumbi Ikôla, ni mu ku mi kôlesa nzumbi moxi mu kuxikana o kidi. Muène ua ki bhange, nʼa tena ku mi kitula mu athu a ngene a Nzambi.

¹⁴ O Nzambi muène iú ua mʼixanena mu Njimbu ietu Iambote i tua kola, phala mu tambule ue mbandu ku fuma ia Ngana ietu Jezú Kristu.

¹⁵ Uila kiki, jiphange, kolokotenu, mu kuate o kidi kia malunda u tua mi longo, kixi ma dikanu, kixi ma mikanda i tua mi sonekena.

¹⁶ Kiki-phe, Ngana ietu Jezú Kristu muène, ni Nzambi, Tata ietu ua tu zola, ió ua tu bhana o kubhua uôma ni kukondoka o malamba sè kufula, ni kudielela kuambote mu kiadi kiê,

¹⁷ a mi izalese o miẋima ni kubhua uôma, a mi suinise ni mu kuzuela ni mu kubhanga ima ioso iambote.