II Samuuele 6 - O Mikanda Ikola

Davidi u bheka Álaka ia Nzambi mu Jeluzaleme

¹ Bhenhobho Davidi anga u bhongolola athu, o makota a jingana mu Izalaiele, a di tungula mu akuâ, makuinhi atatu a midi ia muthu.

² Davidi anga u zanguka ni mundu uoso uala-nê kumoxi, aia bhu Bahale ia Juda, mu kutakana kuenhoko o álaka ia Nzambi, ia ku fumanesena o Dijina, dijina dia Jihova dia Ifuẋi, ua xikama muʼaxaxi ka jixelubini.

³ Anga a xikika álaka ia Nzambi mu dikalu dia ubhe, kia zubha ku i katula mʼonzo ia Abinadabe, bhu kalundu ka Ngibeia. Ni Uza ni Ahiio anʼa Abinadabe ene a kexi mu kombola o dikalu dia ubhe.

⁴ Mu kutunda mʼonxo ia Abinadabe bhu kalundu, Uza u kala bhu mbandu ia álaka ia Nzambi, o Ahiio ua tuamena ku pholo.

⁵ Ni Davidi-phe, ni dibhata dioso dia Izalaiele, a kala mu sanguluka ni ku xikila bhu pholo ia Jihova, o idifua ioso ia jimuzika ióiudike ni muxi ua mufaia, ni jimbànza ni tukoxi, ni jingoma, ni misaxi, ni jingonge.

⁶ Kutula-phe bhu dibhiatelu dia Nakome, Uza u sunununa lukuaku mu kukuata álaka ia Nzambi, mukonda jingombe ja di bhukana, iene iii ia zendalala.

⁷ Njinda ia Jihova anga i uamena Uza; Nzambi anga u mu betela bhenhobho mukonda dia kutondala kuê; u fuila bhobho bhu mbandu ia álaka ia Nzambi.

⁸ Davidi anga ki mu iibhila mukonda Jihova ua jikula Uza muʼaxaxe; kididi kienhokio anga u ki luka Peleza-Uza, katé mu kixuua kia lelu.

⁹ Davidi anga u kala ni uoma uavulu ua Jihova kizuua kienhokio, uixi: Álaka ia Jihova ia-nda kuiza kiebhi bhu ngalʼeme?

¹⁰ Kienhiki Davidi hé u kamba kubhiẋila ni álaka ia Jihova bhu bhata diê mu mbanza ia Davidi; maji Davidi u abhuka na-iu, anga u i bheka mʼonzo ia Obede-Edomo, mukua Ngate.

¹¹ Álaka ia Jihova anga i xala mʼonzo ia Obede-Edomo mukua Ngate mbeji jitatu, Jihova anga u zediuisa Obede-Edomo ni dibhata diê dioso.

Álaka a i bhiẋidisa mu Jeluzaleme

¹² Anga a ki kunda muenexi Davidi, exi: Jihova-ze ua zediuisa dibhata dia Obede-Edomo, ni ioso ia mu tokala, mukonda dia álaka ia Nzambi. Davidi anga uia hé u takana álaka ia Nzambi mʼonzo ia Obede-Edomo, u i bheka mu mbânza ia Davidi ni kusanguluka.

¹³ Mu ku ki bhanga-phe, oso akua kuzenza álaka ia Jihova, kia te-ku ngó makanda masamanu, u satela-bhu ngombe ni mbudi ia sevado.

¹⁴ Davidi anga u kina, bhu pholo ia Jihova ni nguzu ioso; Davidi ua zuata efodi ia linhu.

¹⁵ Kienhiki, Davidi ubanda ni dibhata dioso dia Izalaiele, a bheka álaka ia Nzambi ni kudikola kua kusanguluka, ni kuxika koloneta.

¹⁶ Mu ku ki bhanga-phe, kioso kiala kubokona álaka ia Jihova mu mbânza ia Davidi, Mikala, monʼa Saúlo ua muhatu, u zongola bhu njanena, anga u mona muenexi Davidi uala mu tuka-tuka, uala mu kina bhu pholo ia Jihova: muene anga u mu tobhesa mu muẋima uê.

¹⁷ Álaka ia Jihova anga a i bhiẋidisa, a i tula bhu kididi kiê mu kaẋi ka balaka ia iudika Davidi phala ku i bhakela-mu; Davidi anga u bhakula jisata ja kuoha, ni jisata ja kubhandulula kua Jihova.

¹⁸ Kia zubha Davidi kubhakula sata ia kuoha ni sata ia paze, Davidi u benzela mundu mu dijina dia Jihova dia Ifuẋi.

¹⁹ Muene anga u uanena mundu uoso ua Izalaiele, ni mala ni ahatu, kala muthu dikende dia mbolo, ni thumba iambote ia xitu, ni mutadi ua ji-uva jakukuta. Mundu anga a muangana, kala muthu ku bhata diê.

Mikala a mu bazela kuala Davidi

²⁰ Davidi anga uia kubenzela dibhata diê-muène. Mikala, monʼa Saúlo ua muhatu, anga uiza kukauidila Davidi, uixi: Muenexiʼa Izalaiele kujinga kuahi lelu, u di vungununa bhu pholo ia tuhatu tua abhikʼé, mukuâ ni muthu uoso-uoso ngó ua kambe sonhi!

²¹ Davidi anga u ambela Mikala, uixi: Nga ki bhangela o kusanguluka bhu pholo ia Jihova, ua tenene ku ngi tungula eme mu ku tùnda tatʼenu ni dibhata dioso, ni ku ngi tumbika kukala ku pholo ia mundu uangene ua Jihova, uene ua Izalaiele; kiene ki nga tonokena bhu pholo ia Jihova.

²² Ngi di sebulula muene dingi, kiki ndenge, ngi di tolesa muene ku mesu mami eme-muène; o tuhatu-phe tu ua tangeʼoto, ene a ngi bhana jinga kijingu.

²³ Mikala-phe, monʼa Saúlo ua muhatu tunde kienhokio ánga u kamba mona katé kiá bhu kizuua kia ufuilu uê.