II Samuuele 3 - O Mikanda Ikola

¹ Anga ku kala muene ita ia thembu iavulu, bhu kaẋi ka dibhata dia Saúlo ni dibhata dia Davidi; o nguzu ia Davidi anga iia ni ku di bandekeza, maji o ia dibhata dia Saúlo-phe iia ni kutebhunuka.

Anʼa Davidi a a vualela bhu Hebolone

² David anga u vuala anʼê bhu Hebolone: thungunu iê Aminone, monʼa Ahinouama mukua Jezeleele;

³ kaiadi Kileiabe, monʼa Abingaile mukaji a Nebale, mukua Kalumelo; katatu Abisalone, monʼa Mahaka, uavu tatʼâ Talamai, sobha ia Ngexule;

⁴ O kauana Adoniia, monʼa Hajiti;

⁵ katanu Sefatiia, monʼa Abitale; kasamanu Iteleiamu, monʼa Ekala, mukaji a Davidi. Ene oso iá anʼa Davidi a a vualela bhu Hebolone.

Abinele u dikuata ni Ixi-bozete, anga u zuama kua Davidi

⁶ Kioso kiki hanji ita ia jiji ni dibhata dia Saúlo ni dibhata dia Davidi, Abinele u suina mu bhângela dibhata dia Saúlo.

⁷ Anga bhu kala mukama ua Saúlo, dijina diê Dízipa, monʼa Aiia; Ixi-bozete anga u ambela Abinele, uixi: Phala-hi eie ua bokona kua mukama ua tatʼetu?

⁸ Abinele bhenhobho u kala ni njinda iavulu, mukonda dia kuzuela kua Ixibozete, uixi: Kifua ua ngi mono ngi mútue uaʼmbua nga kalakalela bhata dia Juda? Katé mu kizuua kia lelu, hanji ngala mu kuidikiza henda ia kukalakela o dibhata dia tatʼenu Saúlo, ni jiphange jé, ni makamba mé, eie muene nga kambe ku ku thelekala bhu lukuaku lua Davidi, maji ki bhinga u ngi tatela kikuma mukonda dia muhatu muenhú?

⁹ Nzambi a ngi bhange-kiu, eme ngi Abinele, a ngi tele-ko dingina, se kia lokela Jihova kua Davidi eme ngi kamba ku ki kumbidila,

¹⁰ kia kusondolola o utuminu, u tunde mu dibhata dia Saúlo, ni kukuatesa o kiandu kia Davidi mu ku tumina Izalaiele ni Juda, tunde ku Dane katé Beleseba.

¹¹ Ixi-bozete anga u lémbua kuvutuila Abinele, né ngó dízui dimoxi, kuma ua mu kala ni uoma.

¹² Abinele anga u tuma jiphunga kua Davidi mu dijina diê muene, uixi: Ixi iangene ia nanhi? Uixi dingi; Ndoko, u te kikutu kia ukamba ni eme, phala eme uami ngi kale kumoxi ni eie, nda ngi bheke Izalaiele ioso mu utuminu ué.

¹³ Muene-phe uixi: Kiauabha; ngi ta kikutu ni eie; maji nga ku xindi kima kimoxi: Kumona pholo iami, kikale u dianga ku ngi bhekela Mikala monʼa Saúlo, kioso ki uiza ku ngi mona pholo.

¹⁴ Davidi anga u tuma jiphunga kua Ixibozete monʼa Saúlo, uixi: Ngi bhane mukajiʼami Mikala, nga mu lembele hâma ia inhûnga ia akua Fidíxia.

¹⁵ Ixibozete anga u tuma, hé a mu tambula kua munumiʼê, muene Palatiiele monʼa Laíji.

¹⁶ Munume uê anga u ijila-nê kumoxi iu uenda iu dila, iu uenda iu dila, hé u mu kaiela katé bhu Bahudimi. Bhenhobho Abinele u mu ambela, uixi: Ndeie kiá, vutuka ku bhata dié; muene anga u vutuka.

¹⁷ Abinele-phe kienhokio ua tumine kiá kukunda adiakimi a Izalaiele, uixi: Mu thembu ia bhiti enu mu endile kiá Davidi kukala sobha ienu ia ku mi tumina.

¹⁸ Ndokuenu-phe kiá, mu ki bhange kindala; kuma Jihova muene ua tumbula Davidi, uixi: Ku lukuaku lua selevende iami Davidi kuene ku ngi bhuluila o mundu uami ua Izalaiele bhu lukuaku lua akua Fidíxia, ni bhu lukuaku lua nguma jâ joso.

¹⁹ Abinele anga u ki zuela ue mu mátui ma akua Bejami oso. Abinele anga uia ue kuzuelela mu mátui ma Davidi bhu Hebolone, kioso kia uabhela Izalaiele, ni dibhata dioso dia Bejamí.

²⁰ Kienhiki Abinele u bhiẋila kua Davidi mu Hebolone, ni makuinhi aiadi a muthu endela-nê kumoxi. Davidi anga ua a bhangela fesa, ni muene Abinele ni athuʼê eza-nê kumoxi.

²¹ Abinele anga u ambela Davidi, uixi: Ki ngi tunda bhenhabha, nga kà bhongolola Izalaiele ioso bhu kinama kié u muenexi, phala a te kikutu ni eie, eie u kale mu ku a tumina kioso kia mesena muẋima ué. Davidi anga u sulula Abinele; o muene anga u muangana ni paze, ku muẋima kua mu uabha.

Abinele a mu jibhila mu ufe kuala Jouabe

²² Bhu kaxiʼabha-phe, makuenze a Davidi kumoxi ni a Jouabe, a tula ku mbanza, a tundu mu kúlua, eza ni imbamba iavulu ia bhûndu; Abinele-phe a sange kala-bhu dingi bhu bhata dia Davidi mu Hebolone; kuma muene ua mu sulula kiá, iu ua muangana ni paze.

²³ Kia zubha-phe Jouabe kutula ni kifuxi kioso kiala-nê, a ki kunda Jouabe, exi; Abinele monʼa Nedi uejile kua muenexi, iú ua mu sulula kiá, ua muangana kiá ni paze.

²⁴ Jouabe anga u bhixila kua muenexi, uixi; Eie ua bhange kiebhi? Abinele manhi uejile ko kué; eie eie ua mu sulula kiebhi, nʼaiê ngó kienhiki?

²⁵ Eʼmuene Abinele, monʼa Nedi, ua mu ijiia kiambote, uejile ngó ku ku bhomba, uejile ue mu lónda o kutunda kué ni kubokona kué ni ima ioso i uala kubhanga.

²⁶ Jouabe, kia zubha kutunda kua Davidi, u tuma jiphunga kukaiela Abinele ni ku mu vutula, anga a mu kuatela bhu kixima kia Sila; Davidi-phe ka kʼijiia.

²⁷ Abinele-phe kia zubha ku vutuka bhu Hebolone, Jouabe u takananê bhu muelu ua kimbaka, anga u abhuka-nê bhu mbandu, kala phala kuzuela-nê maka bhu ubheka, bhenhobho anga u mu toma iene ia jimbanji, u fuila bhobho, mukonda dia ku mu vutuila o phonzo ia manhinga ma Azaiele ndengʼiê.

²⁸ Ki kia zubha kubhita, Davidi anga u kʼivua, uixi: Ni eme ni utuminu uami, ki ki kale kituxi kietu bhu pholo ia Jihova, ku mivu sé dizubhilu, kiki kia manhinga ma Ahinele monʼa Nedi.

²⁹ Kikuma kiki ki nemene ku mútue ua Jouabe, ni ku dibhata dioso dia tatʼâ; mu bhata dia Jouabe ki mua kamba dingi mukua kibhubhe kia manhinga, mba mukua dibhute, mba uenda ni mbangala, mba u fuila ku xibhata, mba mu kamba muthu uenda ni kubhinga jimola.

³⁰ Kienhiki ni Jouabe, ni Abisai phangʼiê, a jibha Abinele, mukonda muene ue ua jibha ndengʼiâ Azaiele bhu Ngibiione ku ita.

Davidi u dila kúfua kua Abinele

³¹ Davidi anga u ambela Jouabe, ni athu oso ala ku mbèle iê, uixi: Tandujulenu izuatu ienu, mu di kute idinhaji, mu dile Abinele. Muenexi Davidi anga uia ni ku kaiela ku ditumba.

³² Anga a fûnda Abinele bhu Hebolone; muenexi anga u zangula o dízui ni kudila bhu mbila ia Abinele; ni mundu uoso a dilanê kumoxi.

³³ Muenexi anga u ta mbûndu mukonda dia Abinele, uixi: Abinele, tata, kífua ufua ufuilu ua kiôua?

³⁴ Ka ku kutu maku, ka ku te inama mu jingidinhá, maji mukuâ ni muthu a mu bûba ngó kualʼ o isuéia, kiene ki ua dibhale. Mundu uoso anga a ta jingololo a dila dingi kiavulu ku thandu diê.

³⁵ Mundu uoso anga eza kua Davidi ku mu bhomba kudia mu muanha hanji; maji Davidi-phe u loka, uixi: Nzambi a ngi bhange-kiu, a ngi tele-ku, se ngi lola kúdia kuoso-kuoso katé ki tula o dikumbi.

³⁶ Mundu uoso anga a ki tongolola, hé ki a uabhela; kuma kioso kiene kubhanga muenexi, mundu uoso kiene mu ku a uabhela muene.

³⁷ Kienhiki, mundu uoso, ni Izalaiele ioso, mu kizuua kienhokio a xala ni ku kʼijiia kuma muenexi ki muene ua ki bhange kia kujjibhisa Abinele monʼa Nedi.

³⁸ Bhenhobho muenexi anga u ambela akua mbèle iê, uixi: Kifua ki mua kʼijiia kuma mona-ngana, muadiakimi, ua dibhale lelu mu Izalaiele?

³⁹ Eme lelu hanji nga kambe nguzu sumbala a ngʼundu ku ungana; mala enhá, anʼa Zeluia o kuẋinuka kuâ kua ngi bhonzo; Jihova-phe muene u futa o kisuéia, kioso kia tokala mu usuéia uê.