II Samuuele 22 - O Mikanda Ikola

O muimbu ua Davidi ua ubhulukilu

¹ Davidi anga u tela Jihova maka moso ma muimbu iú, kizuua kia mu kudila Jihova bhu lukuaku lua jinguma jê joso, ni bhu lukuaku lua Saúlo, uixi:

² Jihova muene ndánji iami, mbonge iami ia kolo, mukudi uami uene ku ngi kudila.

³ Nzambi muene ditadi diami, kua muene kuene ku ngi dielela; muene ngubu iami, muene nguzu ia kubhuluka kuami, ditala diami dia di leka kinéne, kididi kiami kiakondama;

⁴ Nga dikola kua Jihova, ua fuama o ku mu ximana, muene iú ua ngi bhulula ku jinguma jami.

⁵ Mukonda mabhuku a kalunga a sotele ku ngi bobesa, masenza ma kadiaphemba ma ngi kuatesa uoma, kuma mambele ku ngi kungulula.

⁶ Mikolo ia kúfua ia ngi louele kiá, ia ku ngi sungila mu kina, manda ma kalunga ma ngi kuatele kiá.

⁷ Mu kutata kuami anga ngi dikola kua Jihova; ngi handekela muene kua Nzambi iami! Muene anga u ngʼivua tunde mu tembulu iê, kudikola kuami kua mu bhixila mu mátui.

⁸ Bhenhobho ixi anga i tunguta, i kala mu zemana, madisesa ma diulu ma zamba, anga ma tunguta, mukonda njinda ia mu kuata.

⁹ Mu mazulu mê mu fuafua dixi, mu kanu mu tuka túbhia tuia ni kuaúla; tu uika muene makala.

¹⁰ Anga diulu u di bheteka, u tuluka; bhoxi dia inama iê hé bhu bhita kitombe kiedi buí!

¹¹ Anga u tuka u endela ku xelube, u bhita bhulu, hé a mu muena ku mabhabha ma kitembu.

¹² U bhangesa kitombe ki kala kifua iene balaka iê, matuta ma menha ma mvula ma mu xiti, mavundu.

¹³ O kubenha kua mu tuamenena ku pholo ku uika muene makala ma túbhia.

¹⁴ Jihova anga u numina ku diulu, ua tundu ene oso u bhana mutemdu, ua bhangesa kuívua o dízui diê.

¹⁵ U asa jihunji, u a bhesa lusolo, nzaji iê ila telu-telu katé a bhuuama. Mu kubazela kua Jihova, mu kubhusa kua muene mu mazulu,

¹⁶ ikhobo ia musanza anga i moneka, katé madisesa maʼxi, ma xala ku kanga.

¹⁷ Ua di sunununa tunde bhulu bhuala, ua ngi kuata ni lukuaku luê, iu ua ngi sungu mu menha mavulu.

¹⁸ Ua ngi tambula ku nguma iami iasuina kinéne, ni ku athu a ngi zembele, a ngi tundu mu nguzu.

¹⁹ Ene andalele ku ngi tukumuisa mu kizuua kiami kia uíndua; maji Jihova-phe muene ua ngi bande.

²⁰ Ua ngi bheka bhu kididi kiadizanze; ua ngi kudila mukonda muene ua ngi zola.

²¹ Jihova ua ngi futu kia tokala mu kulunga kuami; mu ku ngi vutuila ua kaiela makuʼami a hatu ka kuata kima.

²² Mukonda nga lange jinjila ja Jihova, Nzambi iami ki nga mu baluka ni ima ia kubhukumuka.

²³ Kuma jingonge jê joso nga ji bhake ku muẋima uami; o ijila iê ki ia ngi jimbi mba ngi i abhuka.

²⁴ Muene ka ngi mono ni mixima iiadi bhu pholo iê, ituxi iami nga fulu muene i ku kaiela.

²⁵ Jihova kiene kia ngi vutuila kia tokala mu kulunga kuami, ua kaiela makuʼami a hatu, kia a mono ue muene.

²⁶ Uoso mukua henda eie u mu idikiza henda; uoso mukua muẋima umoxi eie u mu idikiza muẋima umoxi;

²⁷ Uoso ua di zelesa eie u mu idikiza kuila eie uazela; uoso-phe ua xibhaka eie u mu idikiza kuthathamana.

²⁸ Mundu ua di tululula eie u a bhulula; mesuʼé ala ku thandu dia akua izala phala ku a tololola katé bhoxi.

²⁹ Kuma eie u Jihova u kandeia kami; Jihova muene u ngi muikina muʼavundu.

³⁰ Mukonda mu nguzu iê ngi kaia ilômbo, mu kudielela Nzambi ngi tuka imbaka.

³¹ Njila ia Nzambi ia iuka, ki iene kulueza; kizuelu kia Jihova kia kidi, ki kiene mangonha; Jihova muene ngubu i xitila oso a lengela kua muene.

³² Nzambi iengi uebhi, oko Jihova muene ngó kuabhu? Ditadi diengi diebhi, u mu fika ni Nzambi ietu?

³³ Nzambi muene mbonge iami iakolo, nguzu iami; muene ni kuiuka kuoso u ngʼendesa mu njila iê.

³⁴ U bhangesa inama iami i soka ni ia hoha, u ngʼimanesa matala ma di leka,

³⁵ muene ua longo makuʼami o kubhânga ku ita, katé ni mufula ua utadi nga soko-bhu ku u fumba.

³⁶ Ngubu ia ku ngi xitila i ua ngi bhana, o kubhuluka ku tunda ko kué; o ku dʼivua ni eie kuene kua ngi bhana o kijingo.

³⁷ Eie ua ngi bhana kididi kiakulu, kia kutula makanda mami ma inama; inama iami ia kuata, o tu ṗhole-ṗhole tuami ki tua xangumuka.

³⁸ Jinguma jami nga ji kaie, nga ji tolola muene; ki ngʼaluluka dingi katé ki nga zubha ku a jikinisa.

³⁹ Nga a zubhidisa muene, nga a toma-toma, ka tena dingi kubalumuka-bhu; a dibhalela bhoxi, dia inama iami, bhene.

⁴⁰ Kuma eie ua ngi zuika ni nguzu ia kubhânga; ua ngi lendesa ku a tolola ió oso a ngi solomokena.

⁴¹ Jinguma jami eie ua ji bhesa lusolo. Ió oso a ngi zembele eie ua a bhuisa-ku.

⁴² A kengelela mu kusota uoso ua bhulula, maji ka mu mono; katé ni kua Jihova, muene-phe ka a suu.

⁴³ Bhenhobho-phe eme ngʼa beta katé a fufuka kala mavu a bhoxi, ngʼa titidila muene kala malôua mu nzunga; a phephuluka aii ni kitembu.

⁴⁴ Eie ua ngi kudila mu jimvunda ja mundu uami; ua ngi bhake ku ukota ua kutumina jixi; katé ni mundu ki nga u ijidile, ua kà ngi bhikila.

⁴⁵ Akua makanga ala kuiza ku ngi tolokela; a ngʼivua ngó dízui ia ngi tumaka kiá.

⁴⁶ Enhó akua makanga a lela kala iangu; eza ni kuteketa, a fomoka mu masuamenu mâ.

⁴⁷ Jihova a laie mu thembu joso! A tane-ku ditadi diami! A zangalale Nzambi iami ia Kibhamuenhu!

⁴⁸ Muene Nzambi iami ua ngi bhana ku a vutuila o phonzo, iu ua bateka o mundu phala ngi kale ku thandu diâ.

⁴⁹ Muene ua ngi katula muʼaxaxi ka jinguma jami, iu ua ngi bhake ditala, enhó ka ngi tena oso a ngi kala ni luma, muene ua ngi tambula ku kiiala kiasuina.

⁵⁰ Mukonda dia kiki nga ku sakidila, u Jihova, muʼaxaxi ka akua jixi. Dijina dié ngi di ximana jinga muene ni kuimba!

⁵¹ Muene, Sobha iê, u mu bhana kubhanduluka kua nzungule, u idikiza jihenda javulu ku muthu uê ua mu undu ni maji, kua Davidi ni mbutu iê, katé ku hádia ni hádia.