II Phetele 2 - O Mikanda Ikola

Jimesene ja makutu

¹ Mʼukulu ku mundu-phe kuejile jipolofeta ja makutu, uila kiki mudienu kuandú kala ue jimesene ja makutu. Jene ji mi zombela ni maulongelu mengi ma texikisa, katé ni Muadiʼâ ua a sumba a dituna-nê. O mu kubhanga kiki, a di bhekela kingûmba kialenguluka.

² Kuandu kala ue athu avulu, a kaiela midimu iâ ia ufusa; o mukonda dia ene, Njila ia Kidi ia kà lebhuka.

³ O mu luimbi luâ lua kitadi ni kuzuela kuâ kua ku di dinga, a kà mi ta uenji. Enhó tunde okulu o kuêla kuâ ki ku kokoloka, o kubuika kuâ ki ku zeka!

⁴ Kuma Nzambi kia kambele kuehela ji-anju ja tele kituxi, maji ua ji kaiesa katé mu ifernu, iú ua ji kuikila ku malubhambu mu makungu ma usuku katé bhu kizuua kia kufundisa.

⁵ O mundu ua xahulu ue Nzambi kà u dielele, maji ua bhekele Diluviu ku mundu ua athu ió abhumu. Inda ua bhakela ngó Noué ni sambuadi dia muthu kumoxi-nê, kuma mujimbuidi ua maka maiuka.

⁶ Ni jimbànza ja Sodoma ni Ngomola Nzambi ua ji bhange uthôkua, ua jʼêlesa ni ji kale ngó jingundu, mbé ji kale kijimbuete kua ió oso enda ni kubhuma.

⁷ Maji ua kudidile ue muiuki Lote, a mu tele bhu kibhidi kiavulu kuala athu ió abhukumuka, mukonda dia uendelu uâ ua ufusa.

⁸ Kuma muthu ió uaiuka, kia tungile muʼaxaxi kâ, ua tatesele o muẋima uê uaiuka izuua ioso, mu kuivua ni kumona imbamba ia bhangele jinga athu ió ia kukamba uôma.

⁹ Kienhiki Nzambi uejiia kukudila akua uôma uê muʼ axaxi ka kudianguka, o akua ikuma u a bhaka katé bhu Kizuua kia Kufundisa, kuma a xikamena kaxtiku.

¹⁰ Nzambi u kala-phe kota mu ku a bhanga-kiu, enhó oso enda kala kia a tumu o xitu mu hânji ia kubola, o Ngana u tokala ku a tumina, hé a mu tènda. Jimesene ja makutu jenhiji, a bhumu, a thathamena vondadi jâ, ka moneka ujitu ua kuxila ji-anju mba a kala ni héle ia kuxinga jingana.

¹¹ Sumbala jianju ja tu tundu mu nguzu ni ukota, maji ki ja tena ku a ta dilebhu bhu pholo ia Ngana, ki ji zuela o ibhangelu ia jimesene ja makutu jenhiji kua Nzambi.

¹² Athu enhá-phe kala iama ki i moneka kilunji, edi kala ibhaku ia ngó ia kukuata ni ku i jibha, enda ni kuxinga o ima ia tokoka ku i ijiia. A kà di bota mu kubola kuâ, a kà tambula o hadi, kuma kifutilu kia kubhanga kiaiibha.

¹³ Athu a uabhela kubhanga o isunji ia jivondadi jâ ja bolo mu muanha uatu! O kioso ki mu kala mu kudia-nâ mu fesa jenu, a bhekesa jisonhi, edi kala mabaka ku kizuatu. O ima ioso a i bhanga ni kádia.

¹⁴ Katena kumona muhatu ku mesu, sè ku muʼandala ku mu bhanga kiaiibha, a lémbua kuzumbuka ku ituxi. Aia ni kunganala oso a tolo kuxikana. A kala ngó mù banza kunganhala kitadi! Ala athu a a bhubhidila kuala Nzambi!

¹⁵ A jimbila, iá ala kubungana ngó, kuma njila ia kidi a tokoka ku i ijiia! A kaiela mu njila ia Balamu, monʼa Beola, uandalele o nganhu ia kitadi mu kubhanga kia iibha.

¹⁶ Muène-phe a mu bazelele mukonda dia kituxi kiê. Bûlu iê, kiama ki kiene kuzuela, anga i zuela ni dizui dia muthu, hé i fudisa polofeta kusaluka.

¹⁷ Athu enhá edi kala jifiẋi ja kambe menha, mukuâ ni mbundu, a i kaia-kaia kuala kitembu. Nzambi ua a solela kididi mu usuku iuná ua a xikamena uedi ni uene bûi.

¹⁸ Kuma ene a tanga maka ma ku di kaka, a zuela izala ioso, o mu hânji jâ ja xitu ni mu ufusa, a bhomba athu ió oso ambe kiá kubhuluka mu akuâ a nanga mu kutondala.

¹⁹ A dielelesa ufolo ku akuá, manhi ene ala abhika a ifua iabolo. Kuma muthu kioso ki mu lenda, kiene kima ki mu bhikisa.

²⁰ Kuma athu, se a bhulukile kiá ku maufusa ma mundu iú, mu kuijiia Ngana ietu, Mubhuludi Jezú Kristu, maji o ku pholo ku eza kunu afu dingi mu mibhetu ia ima iene ku mundu, a toloka, eza ditala dia kuxixima kuengi, inda hanji kia diangele kukala.

²¹ Mukonda kieju beta kuuabha, se a kambele kuijiia o njila ia kuiuka, kana kiki kiaʼijiia, maji kijila kiangene kikôla kia a bhana a ki xie, a vutukila ku dima.

²² Athu iá kia a bhiti, ki ambe o Sabhu ia kidi, exi: Imbua iʼâlukila dingi o kudia kuê kua lusile; ngulu aʼiẋikile, ia vutukila dingi o ku di dimbula mu malôua.