II Malunda 8 - O Mikanda Ikola

Solomá u tunga jimbonge

¹ Anga ki bhita kuila, Solomá kia zubha makuinhi aiadi a mivu, ni kutunga o inzu ia Jihova ni inzu iê-muene-muène,

² Solomá ua tungu jimbonge ja mu bhele Hilamu; anga anʼa Izalaiele u a bhana kukala mueneʼomo.

³ Solomá anga uendela o mbonge ia Hamate-Zoba, anga u i bua.

⁴ Anga u tunga dingi Tadimolo, mu kikangalakata ni jimbonge joso ja mabhakelu ja tungile mu Hamate.

⁵ Ua tungu ue dingi ni Mbetelone ia thala ni Mbetelone ia luiji; jimbonge ja nguzu, jala ni imbaka, ni mabhitu, ni jisabhi ja felu.

⁶ Kumoxi ue ni Bhalate ni jimbonge joso ja mabhakelu ja kexile na-ju Solomá, ni jimbonge joso ja makalu, ni jimbonge ja akua kusambela jikabalu, ni ima ioso kiá ia mu solele o muẋima uê, iandalele Solomá kutunga mu Jeluzaleme, ni mu Libanu, ni mu ixi ioso ia utuminu uê.

Mahiti, ni mamole, ni majebuzi ni amukuá dingi, Soloma u a bhanga akua lubhaku luê

⁷ Ku mbandu ia kifuẋi kioso kia subhuka ku Mahaiti, ni Mamole, ni ku Mapelezi, ni ku Mahivi, ni Majebuzi ió a kambele kutokala mu muiji ua Izalaiele,

⁸ ku ana a enhó, a xalele mu ixi kioso kia-fu jitata jâ, o anʼa Izalaiele anga a kamba ku a buikisa, Solomá ua a kitula akua lubhaku luê katé mu kizuua kia lelu.

⁹ Maji-phe ku anʼa Izalaiele, Solomá ka bhange-ku abhika a kikalakalu kiê; inda a kexile mala a ita, atumini, jikabhitangu, atumini a makalu, atumini a ió aia ni kusambela ku jikabalu.

¹⁰ Eneʼâ-phe a kexile ene atumini a jifixiiadi ja kexile na-ju sobha Solomá; hama jiiadi ni makuinhi a tanu a kexe mu kutumina o kifuxi kioso.

¹¹ Monʼa Falaó, monʼé ua muhatu, Solomá anga u mu bandesa, u tunda mu mbonge ia Davidi phala nʼai mu inzu ia mu tungila, mbata, uixi: Muhatuʼami ka kala mʼonzo ia Davidi, sobha ia Izalaiele, kuma ididi ia bokona álaka ia Jihova, ididi ikôla.

¹² Bheneʼobho-phe Solomá u bhakula, kua Jihova, jisata ja kuoha, ku thanduʼa Kalatódio ka Jihova, ka tungile mu lumbu bhua lulama ni muelu.

¹³ O kienʼiki hé u ki bhanga muene kala kia tokala mu izuua ioso, ni kubhakula kala kia tumu o kijila kia Mozé mu jisabhalu, ni bhu jimbeji ja thethama, ni mu jifesa, lutatu ku muvu: Bhu fesa ia jimbolo ja ususu, ni bhu fesa ia jisemana, ni bhu fesa ia jifundu.

¹⁴ Kala ue kia tendelela Davidi, tatʼâ, ua te o ibuka ia jinganga mu ukunji uâ, kiòmuene ue o jilevita, ku mbandu iâ ia a tokala, mbé a ximane Nzambi, ni ku bhanga ukunji uâ bhu pholo ia jinganga, kala kia ki xindi ku kizuua ni kizuua, ni akua mabhitu ue ku ibuka iâ, dibhitu ni dibhitu; mukonda kiene kia ki tumine Davidi, muthu ua ngene ua Nzambi.

¹⁵ Ku jinganga ni jilevita, kioso kia tumu sobha ka ki tondala ni kima, kiene kimoxi ue ku jimbongo.

¹⁶ Kienhiki kia iudika o kikalakalu kioso kia Solomá, tundé bhu kizuua kia kuandeka o inzu ia Jihova katé kia i zubha; anga u iukisa kienhiki o inzu ia Jihova.

¹⁷ Kia zubha kubhanga ioso, Solomá uai ku Enzone-Ngabele ni ku Elote, ku museke ua kalunga, mʼoxi ia Idomo.

¹⁸ Ku lukuaku lua abhikʼé, Hilamu anga u mu tumikisa jinaviiu ni jingunza ejiia kiambote kuendela mu kalunga, anga aia kumoxi ni jingunza ja Solomá ku Ofidi, anga ambata-ku hama jiuana ni makuinhi a tanu a talendu ja ulu; anga eza na-ju kua sobha Solomá.