II Malunda 7 - O Mikanda Ikola

Túbhia ni unéne ua Nzambi u tuluka mu diulu anga uizalesa o thembulu

¹ Kioso Solomá kia zubha o kusamba, kua tuluka túbhia tua diulu, anga tuʼoha jisata joso ni mibhaku; o unéne ua Jihova anga uizalesa o inzu ioso.

² O jinganga-phe ka tenene kubokona mʼonzo ia Jihova, mukonda o kizunda kia Jihova kiezalesa inzu ioso ia Jihova.

³ Ana oso a Izalaiele kia mono o túbhia ni unéne ua Jihova ua mu tuluka ku thandu dia inzu, a bhetamena jipholo bhoxi, ku mavu, hé a diunda, a ximana Jihova; mukonda mukua mbote, mbata o kulenduka kuê ki kuene kúbhua.

⁴ Bheneʼobho sobha ni kifuẋi kioso a kuata kubhakula jisata bhu pholo ia Jihova.

⁵ O Sobha Solomá anga u bhakula makuinhi aiadi ni kiiadi a midi ia sata ja jingombe, ni hama ni makuinhi aiadi a midi ia jimbudi; anga sobha ni kituxi kioso a lumba kienʼiki o inzu ia Nzambi.

⁶ O jinganga emana ku ibuka iâ; jilevita ue emana ni ima ia kuxikila mimbu kua Jihova, ia bhangele sobha Davidi phala ende ni kuximana Jihova, mukonda o kulenduka kuê ki kuene kúbhua, kioso Davidi kia kexi mu ku mu ximanena ku ukunji ua ene; o jinganga aia ni kuxika jikoloneta bhu pholo iâ, o Izalaiele ioso-phe emana.

⁷ Solomá anga u lumbila ue o dikaẋi dia lumbu dia kexile ku pholo ia inzu ia Jihova; mukonda o jisata ja kuoha, ni maji a jisata ja uembu, bheneʼobho bhua ji bhelelele; mbata o Kalatódio ka utadi, ka iudikile Solomá, o jisata ja kuoha ni maujitu a makudia ni maji a ibhaku ki ji tenene kusoka-bhu.

⁸ Kienʼiki, mu izuuʼomo, Solomá hé u bhanga kizokola kiki mu sambuadi dia izuua, kumoxi ni Izalaiele ioso, a di bhongolola kituxi kia dikota, tundé bhu dibokuenu dia Hamate tulé ku honga ia Ijitu.

⁹ O mu kizuua kia kanake, a bhanga fesa ia kizuua kia mubatuku; mukonda edi, sambuadi dia kizuua dia kulumbila o Kalatódio, sambuadi dia kizuua dia kubhanga o kizokola.

¹⁰ O mu kizuua kia makuinhi aiadi ni kitatu, ku mbeji ia kasambuadi, kiene Solomá kieha kiua o kituxi ku vutuka ku mabhata mâ, a sanguluka, o muẋima ua tana, mukonda dia mbote ia bhange Jihova kua Davidi, ni kua Solomá, ni ku mundu uê ua Izalaiele.

Nzambi u tukulukila Solomá lua kaiadi anga u ta-nê kikutu

¹¹ Kienʼiki Solomá kia zubha o inzu ia Jihova ni inzu ia sobha; iene ioso Solomá ia xinganekene kubhanga ku inzu ia Jihova ni ku inzu ié-muène, ua i bhange muene ni kuzediua kuoso.

¹² Jihova anga u tukulukila Solomá mu usuku, u muʼambela, uixi; Musambu ué nga uivu, eme nga di solela, kididi kiki phala inzu ni sata.

¹³ Se eme diulu ngi di jika, mvula hé i kamba kunoka; mba ngʼambela o kihoho kuila ixi a i jikinise; mba ngi tumikisa kipheku mu kaẋi ka mundu uami,

¹⁴ o ki kala-phe o mundu uami, kituxi kiʼexana mu dijina diami, a di bhomba kokuami, anga a samba, a sota muene pholo iami, o ku jinjila jâ ja ibha anga a tunda-ku, kieneʼokio-phe eme ku maúlu nga-nda ku a evua, anga ngi loloka ituxi iâ, o ixi iâ ngi i saka.

¹⁵ Kiki kiá o mesuʼami a-nda kutona, o mátui ami a-nda kuividila jinga o musambu ua kididi kiki,

¹⁶ mukonda o kiki nga solo inzu iii, eme nga i kôlesa, mbé o dijina diami di kale jinge mueneʼomo ku mivu sè dizubhilu; kienʼiki o muẋima uami ni mesu mami andu tala jinga kʼonzo kueneʼoko izuua ioso.

¹⁷ Kuambe-phe dingi eie, se uenda bhu pholo iami, kala kiende tatʼenu Davidi, hé u bhanga muene ioso kala ki nga kuambela, anga u bhaka o jingonge jami ni mabatuilu mami,

¹⁸ eme ue, ngi kuatesa o kiandu kia utuminu ué, kala kiá ki nga ta o kikutu ni tatʼenu Davidi, ngixi: Eie kua ka kamba monʼa diiala u tumina mu Izalaiele.

¹⁹ Maji-phe, sʼenu muʼabhuka ni mu ila kuengi, anga mu xa o jingonge jami, ni ijila iami, i nga mi tendelelʼiii, anga muia hé mu bhikila jinzambi jengi anga mu ji tolokela jene,

²⁰ bheneʼobho-phe eme ue ngi mi vuza mu ixi iami i nga mi bhana, o inzu iii i nga kôlesa mbé dijina diami, nga kà i texi dikanga, mu mesu mami i tundamu, kienʼiki anga kia kà di bhanga Sabhu ni diba dia maka mu kaẋi ka akua jixi joso.

²¹ O inzu iii ia zangelekele kiosuʼokio, uoso u bhita-bhu uà kà diuana, hé ua kèla: Phalaʼhi, ixi iii ni inzu iii, Jihova ua i bhange kiki?!

²² Anga a kà ki tanga muene, kuila: Mukonda o Ngana dia Nzambi ia jitata jâ, ua a katula mu ixi ia Ijitu, a mu xisa, ia a di bhana ku jinzambi jengi, i a ji tolokela, ia a ji bhikila; kiene ue muene kia a bhekela o divuua diosuʼidi ku thandu diâ.