II Malunda 6 - O Mikanda Ikola

Solomá u bhana kizediuise ku kionge ni kutanesa Jihova, Nzambi ia Izalaiele

¹ Bhene obho Solomá uzuela, uixi: Jihova eie uene mu ku ki tanga kuila ua tunga mua vundu.

² Maji eme-phe nga ku tungila inzu, mua ku kala, ni kididi ki nangenena phala dibhata diê.

³ Sobha anga u lunguluka u tala pholo ku kionge kioso kia Izalaiele, anga u a bhana kizediuise, o kionge kioso kia Izalaiele-phe emana.

⁴ Muene hé uamba, uixi: A tane-ku, Jihova, Nzambi ia Izalaiele, ua zuelela tatʼetu Davidi ni dikanu diê, hé u ki kumbidila muene ku maku mê, kuila:

⁵ Tundé mu kizuua ki nga katula mundu uami mu ixi ia Ijitu, ki ngi solo mbonge iengi mu miji ioso ia Izalaiele, phala kutunga-mu inzu mua fuama kukala o dijina diami; ki ngi solo ue muthu uoso-uoso phala nʼa kale mutumini ua mundu uami ua Izalaiele.

⁶ Maji Jeluzaleme muene nga mu solo, mbé o dijina diami di kale mueneʼomo; eme nga solo ue Davidi, phale a kale mu kutumina o kifuẋi kiami kia Izalaiele.

⁷ O Davidi ue dia tatʼetu muene, ua ki tele ku muẋima uê o kutunga inzu phala o dijina dia Jihova, Nzambi ia Izalaiele.

⁸ Maji-phe Jihova, anga uambela Davidi, tatʼetu, kuila: Mukonda ua ki tele ku muẋima ué, o dijina diami ku di tungila inzu, ua bhange kiambote muene, o ku ki tá ngó ku muẋima ué.

⁹ Maji-phe, né kiene, inzu eie kʼeie ua-nda ku i tunga, inda o mona ua-nda kutunda ku miongo ié, muenʼió hádia muene ua kà tungila dijina diami o inzu.

¹⁰ Kienʼiki kiene o Jihova kia kuatesa o kizuelu kiê kia tange; mukonda eme nga balumuka bhu kididi kia Davidi tatʼetu, eme nga xikama bhu kiandu kia Izalaiele, kala kia ki tange Jihova; o dijina dia Jihova, Nzambi ia Izalaiele, eme nga di tungila o inzu.

¹¹ Eme nga tula-mu o álaka, muala o kikutu kia Jihova, kia te ni anʼa Izalaiele.

Musambu ua Solomá

¹² Solomá anga uimana bhu pholo ia Kalatódio ni bhu pholo ia kionge kioso kia Izalaiele, hé u leka o maku mê bhulu,

¹³ mukonda Solomá ua iudikile kibaka kia utadi, kia kôvadu jitanu mu kulebha ni kóvadu jitanu mu kuzanza, ni kóvadu jitatu mu kitala, hé u ki tula mu kaẋi ka lumbu, anga uimana kuthandu diê, hé u fukama ku jiphuna bhu mesuʼa kionge kioso kia Izalaiele, anga u leka maku mê ku diulu,

¹⁴ uixi: Eie Jihova, Nzambi ia Izalaiele! Kana-ku Nzambi uedi kala eie, kixi mu diulu kixi mungongo, u tena kubhaka o kikutu ni ku kuatela henda ku abhikʼé oso enda ni muẋima ua kidi bhu pholo ié;

¹⁵ eie ua bhakela mubhikʼé Davidi, tatʼetu, ioso i ua mu ambela; mukonda eie ua ki tange muene ni dikanu dié, eie ua ki bhange muene ku maku mé, kala ki kia di monekena leluʼidi.

¹⁶ O kikiphe, Jihova, Nzambi ia Izalaiele, bhakela mubhikʼé Davidi, tatʼetu ioso i ua mu tangela, uixi: Ki mungu dingi kokué ku kamba dikuenze bhu pholo iami, u xikama bhu kiandu kia Izalaiele; inda kima kimoxi ngó ki nga ku bhingi, kuila anʼé aluke njila ié-eie, mu kuenda mu kitumu kiami, kala eie ki uenda jinga bhu pholo iami.

¹⁷ Uila kiki, Jihova, Nzambi ia Izalaiele, kizuelu kié ki di bhange ki ua tanga kua mubhikʼé Davidi.

¹⁸ O kuila ni kidi kiene, Nzambi u tunga ni athu mu ngongo? Tala-ze o diulu ni diulu dia madiulu dia lémbua ku ku kondeka, kuila eie u soka-ku, kuambe dingi o inzu iii i nga ku tungila?

¹⁹ Ividila, Ngana tata, o musambu ua mubhikʼé ni kudionda kué, eie u Jihova, Nzambi iami! Phala uívue o kudikola ni musambu ua mu samba mubhikʼé bhu pholo ié.

²⁰ Mesu mé a tone mu usuku ni mu muanha ku thanduʼa kididi kiki, ki ua tange Eʼmuene kuila o dijina dié bhene bhu u di ta, phala kuívua o musambu u ku sambela mubhikʼé bhu kididi kienʼiki.

²¹ Ivua-phe, Ngana, o kudionda kua mubhikʼé ni kua mundu ué ua Izalaiele, kioso kia kudionda bhu kididi kienʼiki; eie phe ívua ku kididi kié ku ua tunga tundé ku maúlu; ívua muene, u loloke.

²² Se bhu kala muthu u ta mulonga kua mukuá, mukuá anga u mu jijila ku ta mulôko ua ku di naka, phala nʼa di nakʼiê muene-muène, o mulôko uenʼiú ua ku di naka ni uiza bhu pholo ia Kalatódio ké mʼonzo mumu,

²³ eie-phe ívua muene tunde ku maúlu, bhanga kikalakalu, u fundise abhikʼé, mukuá ituxi u mu bhane o futu iê, ima iê ia bhange u mu tule na-iu muene ku thandu dia mútue uê, o ua iuka u mu lungise ni ku mu bhana kia fuama mu kuiuka kuê.

²⁴ Kioso ue o kifuẋi kié, kia Izalaiele, kia a kuama ku jinguma mukonda dia ku ta kituxi kokué, ene anga a diela, hé a fisala o dijina dié, anga a samba, hé a dionda bhu pholo ié, mʼonzo mumu,

²⁵ kuabhu-phe, eie ívua muene tundé ku diulu, u loloke o ituxi ia kifuẋi kié, kia Izalaiele; u a vutukise dingi mu ixi i ua a bhana ene ni jitata jâ.

²⁶ Kioso ue o diulu ki di jika, anga mvula i kamba kunoka mukonda dia ene ku ta kituxi kokué, hé eza mu kusamba bhu kididi kiki, ni ku fisala dijina dié, anga ituxi iâ a i diela muene, kioso eie ki u a muesa hadi,

²⁷ kuabhu-phe, eie ívua muene tunde ku maúlu, loloka o kituxi kia abhikʼé ni kia mundu ué ua ku tokala ua Izalaiele, ni ku a longa o njila ia mbote ia fuama ene o kuenda; u bhane o mvula ku thandu dia ixi ié i ua bhana o kifuẋi kié mu undundu.

²⁸ O mu ngongo ki mu kala nzala, mba mu kala kipheku, mba kiaúla kia idima, mba ngulèle, mba kihoho, mba kajeja, kioso jinguma ki ja a konda mu jixi joso ja zukama na-ju, mba ku kala dibhebhu dioso-dioso, mba uhaxi uosouoso,

²⁹ musambu uoso, ni kudionda kuoso, ku dionda muthu uoso-uoso, mba o kifuẋi kié kioso kia Izalaiele, o muthu ni muthu anga uijiia o dibhebhu diê ni misusu iê hé u leka o maku mê ku inzu iii,

³⁰ kuabhu-phe, eie ívua kiá tunde ku maúlu, ku kibuta kia dibhata dié, u loloke, muthu ni muthu u mu bhane kia fuama mu njila jê joso, kala kiá ki uejiia o muẋima uê (kuma eie, eiemuene ngó, ubhekelèle ué, uejiia o muẋima ua anʼathu).

³¹ Mbé a ku kale ni uoma, phala aie ni kuenda mu njila jé, izuua ioso ia kala ni muenhu mu ixi i ua bhana eie ku jitata jetu.

³² Kiene kimoxi ue ni muthu uosouoso u tunda kuengi, ka tokala mu mundu ué ua Izalaiele, maji u tunda ku maẋokololo ma jixi, mukonda dia kuzola o dijina dié-eie diónene ni lukuaku lué luala ni kutena, ni mukonda dia lukuaku lué lua sununuka; ene kioso kieza hé a samba mʼonzo mumu,

³³ kuabhu-phe, eie ívua muene tunde ku maúlu, ku kibuta kia dibhata dié, u bhange muene ioso ia ku bhingi mukua ixi iengi kioso kia kudionda, phala miji ioso ejiie dijina dié, nda a ku kuatele uoma kala o mundu ué ua Izalaiele; nʼa tene kuijiia kuila o mu dijina dié muene muʼexanena o inzu iii i nga tungu.

³⁴ Kioso ki tunda o kifuẋi kié, phala kuia ku ita, mu kúlua ni jinguma jâ, nʼa di tela njila i ua a tumu, hé a samba kokué, ku mbandu ia kunu ku mbonge iii i ua solo, kuakexila o inzu iii, i nga tungila o dijina dié,

³⁵ ivua-phe o musambu uâ ni kudionda kuâ, tunde ku maúlu, u a bhange muene kioso kia fuama.

³⁶ Kioso ki a ta kituxi kokué (mbata kana-ku muthu u kamba ku ta kituxi) eie anga u a kuatela njinda, hé u a bhakula kua nguma iâ, phala oso a-nda ku a kuika, a ambate muene ku ubhika ku ixi ioso-ioso ia dikanga mba ia zukama,

³⁷ o ku ixi kuoso kua a bheka ku ubhika, ene hé a di xinganekena ene mudiâ, anga a diela, o ku ixi ia ubhika uâ kuene kuaiʼoko, hé a kudionda eie, exi: Tua te kituxi, tua bhange kudianguka, tua kalakala ufusa;

³⁸ hé a diela anga a lungulukila kokué ni muẋima uâ uoso ni muenhu uâ uoso, mu ixi iá ia ubhika, kua ambata jikuikile, o kueneʼoko anga a samba ni kutalela jipholo ku mbandu kuala o ixi iâ, i ua bhe ku jitata jâ, ku mbandu kualela o mbonge iii i ua solo, ni ku inzu iii i nga tungila o dijina dié,

³⁹ ivua-phe, tata, o musambu uâ ni makudionda mâ, tundé ku maúlu, ku kididi kia dibhata dié, u bhange kioso kia fuama; nda u loloke, Ngana, o kifuẋi kié kioso kia te o kituxi kokué.

⁴⁰ Kiki-phe, tata, eie u Nzambi iami, mesu mé a tone, o mátui mé evidile o musambu ua kididi kiki.

⁴¹ Balumuka-phe kiá kindala, Ngana Nzambi, u bokone mu kibuta kié, nʼEie ni álaka ia kusuina kué; o jinganga jé, Ngana Nzambi, a a zuike ubhulukilu, o athuʼê a ngene a sanguluke ni mbote.

⁴² Auá! Ngana Nzambi, tata, pholo ia muthu ué ua mu undu ni maji ku i bhangese ku lunguluka; xinganeka o jihenda ji ua kuatela Davidi dia mubhikʼé.