II Malunda 5 - O Mikanda Ikola

¹ Kienʼiki, kikalakalu kioso, Solomá kia bhangela inzu ia Jihova anga kíbhua; bheneʼobho Solomá anga uiza ni ima ioso iólumbe ia tatʼâ Davidi, ni phalata, ni ulu, ni itutu ioso anga u i tula mu malundilu ma inzu ia Nzambi.

Alaka a i bheka mu xilu dia thembulu

² Bheneʼobho Solomá anga u bhongolola adiakime oso a Izalaiele mu Jeluzaleme, ni malemba oso a miji, ni makota mu jitata ja anʼa Izalaiele, phala kubandesa o álaka ia kikutu kia Jihova, ku tunda mu mbonge ia Davidi, muene Ziione, ni ku i bheka mu thembulu.

³ Athu oso mu Izalaiele anga a di bhongoluela kua sobha, ku kizokola, bhu mbeji ia kasambuadi.

⁴ Adiakime oso mua Izalaiele anga eza muene; jilevita hé a zangula o álaka.

⁵ Hé a bandesa o álaka ni balaka ia kutakanena kumoxi ni itutu ioso iólumbe ia kexile mu balaka; jinganga ni jilevita ene muene a i bandesa.

⁶ Bheneʼobho-phe, Solomá ni kifuẋi kioso kia Izalaiele, kia di bhongoluele kumoxi ni muene bhu pholo ia álaka, anga a bhana jisata ja jimbudi ni jingombe, ki ji xikina ku ji tanga mba ku ji alula mukonda dia kuvula kinéne.

⁷ Kienʼiki anga jinganga eza ni álaka ia kikutu kia Jihova bhu kididi kiê, mu xilu dia Tembulu, mu kididi ki kôla kinéne, hé a i bhiẋidisa muene moxiʼa mabhabha ma jixelube.

⁸ Mukonda o jixelube jʼolekele mabhabha mâ ku thandu dia kididi kia álaka, anga ku thandu jixelube Ji vungina muene o álaka ni mikambu iê.

⁹ O mikambu anga i lebhelela dingi, phala o jisungu ja mikambu ia álaka ni jende ni kumoneka mu xilu dia ukòlelu u kôla kinéne, maji ua kexila ku mbandu ia kanga, ka i mono; o álaka i ia zalela bheneʼobho katé mu kizuua kia lelu.

¹⁰ O mu álaka ki mu kexile dingi kima kiengi, kale ngó o mabaia aiadi a telemu Mozé bhu Holebe, kioso Jihova kia te kikutu ni anʼa Izalaiele mu ku tunda mu Ijitu.

¹¹ Anga kibhita kuila, kioso kia tundu o jinganga mu kididi kikôla, (mukonda o jinganga joso ja kexile-bhu, a di zelesa, ki kuala dingi kukaiela ibuka).

¹² Ni jilevita, ni akua kuimba ene oso, ni akuʼAzafe ni akua Hemane ni akua Jedutune, ni anʼâ ni jiphange jâ, a kembe ni izuatu ia linhu ia nzeta, (a kuata jingoma ja ngòndo ni tukoxi ni jimbànza, emanena ku mbandu ia thunda ia Kalatódio, ni ene kiá kumoxi ni hama ni makuinhi aiadi a jinganga a kala mu xika jikoloneta).

¹³ Ene há a tongesa muene mu kuxikila jikoloneta kumoxi, ni mu kuimba ue, embila mbimbi imoxi ngó i uivua, mu ku tumbula o mbote ni kuximana Jihova; o kioso ene kia zangula o mbimbi kumoxi ni jikoloneta ni jingoma ja ngòndo ni ima dingi ia mukuá ia kuxika o mimbu, ni kutumbula Jihova kuma mukua Mbote, mukonda o kulenduka kuê ki kuene kúbhua, inzu ioso muene iezala ni dituta, o inzu ia Jihova.

¹⁴ Anga jinganga a lémbua kuimana, mu kubhanga ukunji uâ mukonda dia dituta, mbata o Kizunda kia Jihova kiezalesa o inzu ia Nzambi.