II Malunda 36 - O Mikanda Ikola

Jouakaji a mu kuta, aia-nê ku Ijitu ku ubhika

¹ O bheneʼobho akuaʼxi anga a zangula Jouakaji, monʼa Joziia, hé a mu bhanga sobha, mu Jeluzaleme, bhu kididi kia tatʼâ.

² Jouakaji-phe kala uala mu makuinhi aiadi a mivu ni kitatu, kioso kiandeka o kutumina; anga u tumina mbeji jitatu mu Jeluzaleme,

³ mbata o sobha ia Ijitu ua mu katula ku usobha mu Jeluzaleme; o ixi anga u i jijila kufuta lubhaku lua hama ia jitalendu ja phalata ni talendu imoxi ia ulu.

⁴ O sobha ia Ijitu anga u ta Eliiakí, ku usobha ua Juda ni Jeluzaleme, bhu kididi kia phangʼiê, o dijina hé u mu lungulula-diu, u mu ta dia Nzuakí; o phangʼiê Jouakaji, Neku u mu zangula, uia-nê ku Ijitu.

Nzuakí u tumina

⁵ Kieneʼokio, o Nzuakí uala mu kitala kia makuinhi aiadi a mivu ni kitanu kioso kia mateka o kutumina; anga u tumina kuinhi dia mivu ni umoxi mu Jeluzaleme; anga u bhanga muene kia ibha ku mesu ma Jihova, Nzambi iê.

⁶ Nabukodonozolo, sobha ia Babilónia, anga u mu endela mu kuzoka-nê, anga u mu kuta ni malubhambu phala kuia-nê ku Babilónia.

⁷ O Nabukodonozolo anga uambata ue ni itutu imoxi-mu ia inzu ia Jihova, uia na-iu ku Babilónia anga u i tula mu Tembulu ié-muene ku Babilónia.

⁸ Ki tuʼila o ima ia mukuá dingi ia bhange Nzuakí ni maufusa mê ma bhanga jinga ni ima ia mukuá dingi ia vulu ia sange momué, iene ioso iòsoneke mu divulu dia jisobha ja Izalaiele ni ja Juda; O Nzuakí dia monʼê anga u tumina bhu kididi kiê.

Utuminu ua Nzuakí

⁹ Nzuakí kioso kia mateka o kutumina ua kexile mu kitala kia nake dia mivu; ua tumina mu Jeluzaleme mbeji jitatu ni kuinhi dia kizuua anga u bhanga ioso ia ibha ku mesu a Jihova.

¹⁰ O bhu kisonaxi ku muvu, sobha Nabukodonozolo u tuma ku muʼambata ni ku mu bheka ku Babilónia, kumoxi ni itutu ia te kiavulu ia inzu ia Jihova; anga Zedekiia dia phangʼiê muene a mu te bhu kididi kiê mu kutumina mua Juda ni mu Jeluzaleme.

Zedekiia u hinga ungana

¹¹ Zedekiia ua kexile mu makuinhi aiadi a mivu ni kitanu kioso kiandeka o kutumina; iú ua tumina kuinhi dia mivu ni kamoxi mu Jeluzaleme.

¹² Anga u bhanga muene ima ia ibha ku mesu ma Jihova, Nzambi iê; nguê ku di tolesa bhu pholo ia polofeta Jelemiia, ua kexi mu ku ta maka kumbandu ia Jihova.

¹³ O kia di te-ku dingi, ua bhukumukina sobha Nabukodonozolo, ua mu lokesele kua Nzambi; maji ua thathamana o xingu iê; anga muẋima uê u huka kinéne katé ua lémbua o kudiela phala kulungulukila kua Jihova, Nzambi ia Izalaiele.

¹⁴ O atumini oso mu jinganga ni kifuẋi ene a kexile mu kuvudisa dingi ni dingi muene, o itondalu mu ku kaiela o maufusa moso ma matumbu; anga a kasanesa o inzu ia Jihova iala mu Jeluzaleme, ia zelesele kiá kuala Jihova muene.

¹⁵ Anga Jihova, Nzambi ia jitata jâ u a tumikisa o kizuelu kiê ku jiphunga jê. U di meneka muene mu ku a tumikisa na-kiu. Mbata jihenda ja mu kuata ja mundu uê ni ja dibhata diê.

¹⁶ Maji ene-phe, o jiphunga ja Nzambi a ji bhange kasekelu, a kambe kusuua o maka mê, o jipolofeta jê aia ni ku ji sebulula, katé o njinda ia Jihova ki ia bande kinéne ku mundu uê, ni milôngo dingi ia kubhanga ki i moneka.

An ʼa Juda aia ku ubhika

¹⁷ Mukonda Jihova ua bhangesa sobha ia jikaldeu kubanda o minzangala iâ, muene iu ua i jibha ku xibhata, mu inzu ia dibhezelu diê; o minzangala ia mala muene ka i kuatela dingi henda mba o ilumba, mba adiakime a kuka kiá, mba ikulakaji ia kukidila; maji ene oso ua a bhakula bhu lukuaku luê.

¹⁸ O itutu ioso ia inzu ia Nzambi, ni ia makota ni iòfele, ni jimbongo ja inzu ia Jihova, ni jimbongo ja dibhata dia sobha, ni ja ilamba iê, iene ioso ua i ambata, uai na-iu ku Babilónia.

¹⁹ O inzu ia Jihova anga a i oha, o imbaka ia Jeluzaleme hé a i bula-bula; o jinzu jê joso ja matala a ji oha mu túbhia, ni itutu iê ioso ia makembu a i jikinisa ue.

²⁰ O ió a subhuka ku xibhata ua ambata, iú uai-nâ ku Babilónia; a kituka abhika phala muene ni anʼê katé bhu thembu ia utuminu ua sobha ia Pelesa.

²¹ Mbé o kizuelu kia Jihova ki tenene kia tange ku dikanu dia Jelemiia, katé bhuoso ixi bhu ia kà uabhela dingi o jisabhalu jê; o mu izuua ioso ia kibuika, iene ia nhoha; katé kia tenena o makuinhi sambuadi a mivu.

O ngonge ia Silu

²² Maji-phe, o mu muvu ua dianga ua Silu sobha ia Pelesa (phala o kizuelu kia Jihova ni kitenene, kia tange ku dikanu dia Jelemiia), Jihova ua tonesa o nzumbi ia Silu, sobha ia Pelesa, muene iú ua bhitisa ni kuboka mu utuminu uê uoso, ni ku ki soneka muene, kuila.

²³ Silu, sobha ia Pelesa uambe kiki: O Jihova, Nzambi ia Diulu ua ngi bhana o mautuminu moso mu ngongo, iú ua ngi tumu ku mu tungila inzu mu Jeluzaleme, kididi kiala mua Juda; uoso uala momuenu, ua zuama muene ku kifuẋi kiê, a bande, Jihova Nzambi iê a kale ni muene.