II Malunda 34 - O Mikanda Ikola

Joziia u jima-ku o ubhezelu ua iteka

¹ Joziia kioso kiandeka o kutumina ua kexi ngó mu nake dia mivu, anga u tumina makuinhi a tatu a mivu ni umoxi mu Jeluzaleme.

² Muene anga u bhanga ima ia iuka bhu pholo ia Jihova; anga uenda muene mu jinjila ja Davidi, tatʼâ, sé kulueza-mu mba uia ku kiasu mba ku dilu.

³ Mukonda o kioso kia bhixila mu muvu ua kanake ua utuminu uê, kioso kiala hanji mona-ndenge, kiene kia mateka ni kusota o Nzambi ia tatʼâ Davidi; o kia tula mu muvu ua kakuinhi ni kiiadi, kiene kiá kiandeka o kuzelesa Juda ni Jeluzaleme ku matala ni ku mixitu ni ku iteka ia kusonga ni ia kuzunza.

⁴ O jikalatódio ja Bale ua jimanena mu ku ji bula-bula; muene anga u batujula o iteka ia dikumbi ia kexile ku thandu dia jikalatódio; ni mixitu ni iteka ia kusonga, ni iteka ia kusula, ua i bula-bula iú ua i zuku katé ki ia kituka fufuta iú ua i sangela ku thandu dia jimbila ja oso a kexile mu ku i satela.

⁵ O ifuba ia jinganga ua i ohela ku thandu dia jikalatódio jâ; anga kienʼiki u zelesa Juda ni Jeluzaleme.

⁶ Mu jimbonge joso ja Manasa, ni Ifalaimi, ni Ximinhá, kiene ue kia bhange, katé ni kua Nafitali ue, ua zelesa-ku kumoxi ni mu ididi ia di suekele mu jimbandu.

⁷ O kia zubha kubula o jikalatódio joso ni mixitu, ni iteka ia kusonga katé kia i kitula fufutila, ni kia zubha o kubatujula o iteka ioso ia dikumbi mʼoxi ioso ia Izalaiele, u vutuka kiua mu Jeluzaleme.

Joziia u iudika o Tembulu

⁸ Mu muvu ua kakuinhi ni nake, ua utuminu ua Joziia, kioso muene kia zelesa kiá o ixi kumoxi ni inzu iê, ua tumikisa Safane, monʼa Azadiia, kua Mahaseia, o muadiakimi mu mbonge, ni kua Nzoua, monʼa Nzouakaji, o musoneki ua malunda, phala a tunge dingi o inzu ia Jihova, Nzambi iâ.

⁹ Anga eza, kua Hilikiia, nganga ia dikota, anga a mu bhana o kitadi kiejile na-kiu athu ku onzo ia Jihova, anga o jilevita a kexile mu kulanga bhu muelu ua tembulu a ki bhongolola, a ki tambula bhu maku ma Manasa, ni bhu maku ma Ifalaimi ni kua iá oso a subhuka mua Izalaiele kumoxi kiá ni Juda dioso ni Bejamí; anga a vutuka kiua ku Jeluzaleme.

¹⁰ O kitadi hé a ki bhana kua oso a kexile mu kutumina o kikalakalu, a tambuile konda ia inzu ia Jihova; o ene anga a ki bhana kua oso a kexile mu ku bhanga o kikalakalu, ió a kexile mu kukalakala ku onzo ia Jihova, phala ene a tene o ku i iukisa ni ku i tungulula dingi.

¹¹ Anga a ki bhana ku jimesene ja ufunu ni akua kutunga, mbé o kusumba o matadi a kuseta ni miẋi phala ku i ta mu masokokelu; phala o kuiudika o jisabhalalu ja jinzu ja budile kuala jisobha ja Juda.

¹² Athu eneʼá anga a kalakala ni ufiiele uoso ku kikalakalu; o a kexile mu ku a tumina eneʼá: Johate ni Obadiia, o jilevita, a tokala ku anʼa Meladi, kumoxi ni Zakadiia ni Mezulane, a tokala ku anʼa Kohate, phala kulenguluisa o kikalakalu, kumoxi ni jilevita ja mukuá, athu ejidile kiavulu mu ima ia kuxikila o mimbu.

¹³ Anga a kala ue mu kutumina o jingamba ni oso a kexile mu ku a tumina ku kikalakalu kioso-kioso kia kubhanga; amoxi-mu ku jilevita a kexile asoneki, amoxi-mu jifixiiadi, amoxi-mu akua kilangidilu kia mabhitu.

Hilikiia u bonga o Divulu dia kitumu

¹⁴ Ene kioso kia mu katula o kitadi kiejile na-kiu athu kuʼonzo ia Jihova, Hilikiia, o nganga, u bonga o Divulu dia kitumu kia Jihova, Nzambi kia bhelelele kua Mozé.

¹⁵ Hilikiia anga u kumbulula, uambela Safane, o musoneki, uixi: Divulu dia kitumu nga di bongela mʼonzo ia Jihova. Anga Hilikiia u tambuisa o Divulu kua Safane.

¹⁶ O Safane anga uambata o Divulu kua sobha, u kiʼambela ue sobha, uexi: Abhikʼé ngana, a mu bhanga muene ioso eie i ua a tumu.

¹⁷ Ene a bhongolola o kitadi kioso ki ala mʼonzo ia Jihova, ia a ki bhana bhu maku ma iá a mu tumina, ni bhu maku ma iá a mu bhanga o kikalakalu.

¹⁸ O kia di te-ku dingi, Safane, o musoneki, uambela sobha, uexi: O nganga Hilikiia ua ngi bhana divulu. Anga Safane u tanga-mu hanji bhu pholo ia sobha.

Joziia u tuma kuibhula kua polofeta ia muhatu, dijina diê Hulda

¹⁹ Anga ki bhita-phe kuila o sobha kioso kievu o maka ma kitumu, u tandula o izuatu iê.

²⁰ Hé u tuma Hilikiia ni Haikane, monʼa Safane, ni Abidone, monʼa Mika, ni Safane, o musoneki, ni Azaiia ngolambole ia sobha, uixi:

²¹ Ndenu mua kà ngʼibhuile kua Jihova, kua iá a subhuka mua Izalaiele ni mua Juda, ku thandu dia maka a divulu didi dia bongo; mukonda o njinda ia Jihova ia vulu ia lundulukila ku thandu dietu; mukonda o jitata jetu ka bhake o kizuelu kia Jihova, phala kubhanga ioso kala kia i soneka mu divulu didi.

²² Bheneʼobho Hilikiia ni jiphûnga ja sobha, anga aia mu ku di mona ni Hulda, polofeta ia muhatu, muhatuʼa Salume, mubhakiʼa izuatu monʼa Tokate, monʼa Hajila, ua tungile mu mbonge ia luiji, ia Jeluzaleme; anga a mu tangela kieneʼokio.

²³ Muene anga u a tangela, uixi: Jihova, Nzambi ia Izalaiele uambe kiki: Ambelenu o diiala ua nu tumu kokuami, muixi:

²⁴ Jihova uambe, uixi; Jiphaxi nga-nda ku ji bheka bhu kididi kienhiki ni kua ió oso a tungu-bhu: Ni mázui moso muene mʼòsoneke mu divulu dia tangela bhu pholo ia sobha ia Juda.

²⁵ Mbata a ngi xisa, o uasu ua dizumba iá a uohela ku jinzambi jengi, mbé o ku ngi lokalala o njinda iami ni ibhangelu ia maku mâ; uila kiki, o njinda iami ia laukila bhu kididi kienhiki ki ia-nda kuẋikina kujima,

²⁶ maji-phe o sobha ia Juda ua mi tumu ku ibhula kua Jihova, mua kà mu tangela kiki, muexi: Ku maka ió u uevu, Jihova, Nzambi ia Izalaiele, uambe kiki:

²⁷ Kuma o muẋima ué eie ua teketa, eie ua tolokela Nzambi, kioso ki uevu o maka ma tange kubhanga o kididi kiki, ni ió oso a tungu-bhu, eie ua toloka bhu pholo iami, eie ua tandula o izuatu ié, eie ua ngi didila, eme ue nga kuivu, kienhiki kiene kiambe Jihova.

²⁸ Tala nga-nda ku ku bhongoluela ku jitata jé, a kà ku tula mu mbila ié ni kutululuka kuoso, o mesu mé ka-nda kumona o jiphaxi joso ji nga-nda kubheka bhu kididi kiki ni kua ió oso a tungu-bhu. Ene anga a vutuka ni njimbu ienʼiii kua sobha.

Joziia u fukulula dingi o kikutu kia Jihova

²⁹ Bheneʼobho sobha u xika ngonge anga u bhongolola adiakimi oso mua Juda ni mu Jeluzaleme.

³⁰ Athu oso mua Juda kumoxi ni iá a tungu mu Jeluzaleme, ni jinganga ni jilevita ni kifuẋi kioso tundé ku muadiakime katé ku mona-ndenge, ene oso, sobha u banda, uia-nâ mʼonzo ia Jihova, anga u tangela muene mu mátui ma ene oso o maka moso ma divulu dia kikutu, diodio dia bongele mʼonzo ia Jihova.

³¹ Sobha, bhu kididi kiê, anga u balumuka, uimana hé u ta kikutu bhu pholo ia Jihova, phala kukaiela jinga Jihova, ni kualuka o ijila iê, ni kubhaka o maumbangi mê, ni jingonge jê ni muẋima uê uoso ni muenhu uê uoso, ni kutumaka o maka moso ma kikutu mʼòsoneke mu divulu dieneʼodio.

³² Anga u tuma ue kuila ene oso ala mu Jeluzaleme ni mua Bejamí emana; iá-phe a tungu mu Jeluzaleme anga a bhanga muene kala kia tokala o kikutu kia Nzambi, o Nzambi ia jitata jâ.

³³ Joziia anga u katula ima ioso ia isunji mu jixi joso ja tokalele anʼa Izalaiele, hé u jijidika ene oso a kexile mua Izalaiele kuila Jihova Nzambi iá, a mu bhikile ni ubhezelu u kala kiki; o mu izuua ioso ia Joziia, ka tondalele mu ku kaiela Jihova, Nzambi ia jitata jâ.