II Malunda 33 - O Mikanda Ikola

Manasa mukua mahamba

¹ Manasa kioso kiandeka kutumina, ua kexi ngó mu kitala kia kuinhi dia muvu ni kiiadi, anga u tumina makuinhi a tanu a mivu ni kitanu mu Jeluzaleme.

² Anga u bhanga muene kia ibha ku mesu ma Jihova, kiene kia matumbu ma kaiesa Jihova bhu pholo ia anʼa Izalaiele mukonda dia maufusa mâ, kiene ue kia bhange muene.

³ Mukonda muene ua tona dingi kutunga o matala a budijile tatʼâ Ezekiia, iú ua tungu dingi jikalatódio ja Bale, ua kunu iú ua fukamena o kifuxi kioso kia diulu iu ua ki xibhidila.

⁴ O mu inzu ia Jihova ua tungu-mu jikalatódio, inzu ioio ia tangele Jihova, kuila: Mu Jeluzaleme muene mua kà kala dijina diami ku mivu ni mivu ki iene kúbhua.

⁵ O kifuxi kioso kia diulu anga u ki tungila jikalatódio, mu malumbu mene ma iadi ma inzu ia Jihova.

⁶ Anga u bhitisa ue anʼê mu túbhia mu honga ia dikôlo dia monʼa Hinome; ua zambula jinga ue, ni kusàkela ni kubhanga jinga uanga, ni kukolomona jinga ue akua kuzambula ni akua iphata; anga u bhanga muene kia ibha kiavulu bhu pholo ia Jihova, mbé o ku mu lokalala o njinda iê.

⁷ Anga u ta ue mʼonzo ia Nzambi, kiteka kia kusonga, kiteka kia iudikile muene, o inzu Ngana Nzambi iambelele Davidi ni monʼê Solomá, uixi: Mʼonzo mumu, mu Jeluzaleme, i nga solo mu miji ioso ia Izalaiele, muene eme mu nga-nda ku ta o dijina diami ku mivu ni mivu sè dizubhilu.

⁸ Ki mungu dingi ngi katula o kinama kiami mua Izalaiele, oxi i nga xindila o jitata jenu, kabasa ene a tena o kukala ni muanu ua kubhanga ioso i nga a tendelela, ni ioso iala mu kitumu, ni jingonge, ni mabatuilu ma bhele Jihova kua Mozé.

⁹ Anga o sobha Manasa u tondalesa luavulu Juda ni iá a tungu mu Jeluzaleme, katé ene a beta o kubhanga kia ibha o miji ia matumbu ia buikisa Jihova bhu pholo ia anʼa Izalaiele ndenge.

Uhutile ua Manasa ni musambu uê

¹⁰ Jihova anga u zuelela Manasa ni kifuxi kiê, maji ene a tokoka o kuívua.

¹¹ Ki kia bhangesa Jihova kutulula ku thandu diâ o ilamba ia kifuxi kia sobha ia Asídia; ene anga Manasa a mu kuatela mu minha, hé a mu kuta ni malubhambu anga a mu ambata aia-nê ku Babilónia.

¹² O muene, kia mu iza o kubhindama, ua sambe kiavulu kua Jihova Nzambi iê, anga u di bhomba, u toloka muene kiavulu kua Nzambi ia jitata jê.

¹³ Anga u mu sambela. O Ngana Nzambi anga o njinda iê kua Manasa i tululuka, anga uívua o kudionda kuê, anga u tona dingi o ku mu bheka mu Jeluzaleme ku ungana uê. Bheneʼobho Manasa anga uijiia kuila Jihova muene Nzambi.

¹⁴ Kia bhiti imiʼii, ua tungu o lumbu lua kanga lua mbonge ia Davidi, ku mbandu ia mutudila-kumbi ia Jihone, mu honga, bhua lulama ni muelu ua Mbiji, hé u kondoloka katé bhu Ofele, anga u lu tunga muene ni kitala kia lebha kiavulu; o mu jimbonge joso ja nguzu mua Juda ua te-mu jifixiiadi ja mazonda.

¹⁵ Anga o jinzambi jengi joso, kumoxi ni kiteka, u ji tubhula mʼonzo ia Jihova, kiene kimoxi ue ni jikalatódio joso ja tungile ku mulundu ua inzu ia Jihova, ni mu Jeluzaleme, anga a ji texi ku kanga dia mbonge.

¹⁶ Anga u tunga dingi o kalatódio ka Jihova, u bhela koko o jisata ja uembu ni ja diximanu; anga uambela Juda kuila ende ni kubhikila Jihova, Nzambi ia Izalaiele.

¹⁷ Maji-phe o mundu hanji a kexi mu ku satela bhu matala ma di leka, maji jisata ngó kua Jihova Nzambi iâ.

O kúfua kua Manasa

¹⁸ O ima dingi ia mukuá ia bhiti ni sobha Manasa, ni musambu uê ua sambe kua Nzambi iê, ni maka a mu tangela jinga akua kuzambula oso a mu zuelela mu dijina dia Jihova, Nzambi ia Izalaiele, tala, ima ioso iii iala mu musendu ua jisobha ja Izalaiele.

¹⁹ Ni musambu uê ua sambela Nzambi, ni kioso Ngana Nzambi kia mu tambuijila anga u sosoloka mu kutema kuê, ni kituxi kiê kioso ni mulonga uê, ni ididi ioso ia tungile matala anga u i kuna mixitu ni ku ta-mu iteka ia kusonga, kioso hanji sobha kiluua a toloka kua Jihova, tala ima ioso iii a i soneka mu madivulu ma akua kuzambula.

²⁰ Manasa anga u zeka kuʼàia jitata jê, anga a mu funda muene mʼonzo iê; o Amone dia monʼê anga u hinga o ungana bhu kididi kiê.

O utuminu ua Amone ni ufusa uê

²¹ Amone kioso kiandeka o kutumina, uala kiá mu makuinhi aiadi a mivu ni kiiadi, anga u tumina mivu iiadi mu Jeluzaleme.

²² Anga u bhanga kia ibha muene bhu pholo ia Jihova, kala kia bhanga jinga Manasa dia tatʼâ; mukonda Amone ua satela jinga iteka ioso ia kusonga ia iudikile tatʼâ anga u i bhikila.

²³ Maji ua tokoka o ku tolokela Jihova kala kia tolokele Manasa dia tatʼâ; muene-phe kia mu kexile kota o kuvudisa dingi o ikuma ni milonga iê.

²⁴ Abhikʼê anga a mu ta o kikutu kia ufe hé a mu jibhila mʼonzo iê muene.

²⁵ Maji akuaʼxi ue, a jibha muene eneʼoso a tundile ufe kua sobha Amone, anga o mundu uene, mʼoxi, a zangula monʼê Joziia anga a mu hingisa bhu kididi kiê.