II Malunda 31 - O Mikanda Ikola

¹ Kioso o ima ioso iii ki iabhu, akua Izalaiele oso a kexile bhobho, a katuka, aia mu jimbonge ja Juda anga o iteka a i bula-bula, mixitu a i koka, mu Juda ioso ni mua Bejamí a sengulula-mu o matala moso ni jikalatódio, kiene ue kimoxi mua Efalaime ni Manasa, katé ima ioso kia i sengulula; kuabhu-phe, ana oso a Izalaiele a vutuka kiua, muthu uia kokuʼâ, muthu uia kokuʼâ, mu jisanzala jâ.

Ezekiia u ta o jinganga ni jilevita ku ibuka

² Anga Ezekiia u ta o jinganga ni jilevita ku ibuka, kala kia tokala mu ibuka iâ, kala muthu ni ukunji uê; o jinganga ni jilevita phala o jisata ja kuoha, ni jisata ja uembu; ni kubhanga kioso kia tokala mu ukunji ni kuximana ni kuimbila bhu mabhitu ma ilômbo ia Jihova.

³ Ku jimbongo ja sobha ue ua xindi-ku mbandu phala o jisata ja kuoha, mbé o jisata ja kuoha mu kimene ni mu ngoloxi, ni jisata ja kuoha mu jisabhalu, ni bhu mbeji ia thethama, ni bhu izokola, kala kia ki soneka mu kitumu kia Jihova.

⁴ Anga u tendelela o mundu, a tungu mu Jeluzaleme, kuila, o mbandu ia tokala o jinganga ni jilevita a i bhane; phala ene uâ a tene o ku di bhakula ngoho ku kitumu kia Jihova.

⁵ O kizuelu kienhiki kioso ki kia sambuka ku mbandu joso, anʼa Izalaiele a bheka ndumba dia idima ia mutômo ia tiliku, makúnua, ni maji, ni uiki, ni idima ioso kiá ia dima jinga ku mukáu; ni mbandu ia kakuinhi ku ima ioso ʻue, eza na-iu ni kuvula kuoso.

⁶ O anʼa Izalaiele ue ni Juda, a tungile mu jisanzala ja Juda, eza ue ni madijimu ma jingombe ni jimbudi ni madijimu ma ima ikôla ia lumbila kua Jihova, Nzambi iâ; anga a bhanga jimvumbu ja nzungule.

⁷ Ku mbeji ia katatu kiene kia mateka o kubhanga jimvumbu ja dianga; ku mbeji ia kasambuadi, a zubha.

⁸ Ezekiia kioso kia kieza kumoxi ni ilamba, mu kumona o jimvumbu jojo, a tanesa Jihova ni mundu uê ua Izalaiele.

⁹ Ezekiia anga uibhula o jinganga ni jilevita ku mbandu ia jimvumbu jeneʼojo.

¹⁰ Azadiia-phe o nganga ia dikota, ua tokala mu dibhata dia Zadoke, u muʼambela, uixi: Tundé kiandeka o ujitu uenʼiú kʼonzo ia Jihova, tuene mu kúdia anga tuikuta; maji o masubhu hanji a vuluʼê muène; mbata Jihova ua zediuisa o kifuxi o kifuxi kiê; ku kua subhukʼé hanji o nzungule iosuʼiii!

¹¹ Bheneʼobho Ezekiia kuema dia inzu ia Jihova, u tuma ku iudikisa-ku mabhakelu, anga a ma iudika.

¹² Kia zubha ku ma iudika, a ta ni ufiiele uoso mueneʼomo, o maujitu, ni madijimu, ni ima ioso iòʼlumbile; ku pholo dia ima ienʼiii anga a ta-ku Konaniia, o levita, muadiakimi, ni Ximei, phangʼiê, muene kaiadi ua kaiela-ku.

¹³ Ni Jihiiele, ni Azadiia, ni Nahate, ni Azaiele, ni Jedimote, ni Jozabade, ni Ediiele, ni Iximakiia, ni Mahate, ni Benaia, ene osuʼâ atumini bhoxi dia lukuaku lua Konaniia ni phangʼiê Ximei, kala kia ki tumu sobha Ezekiia, ni Azadiia, muadiakime ua dibhata dia Nzambi.

¹⁴ O Kola, monʼa Jimina, o levita, mulangiʼa-bhitu ku mbandu ia mutundila-kumbi, muene a mu bhele o kutambula konda ia maujitu ma ku di fikixila, ma Nzambi, mbé o kuenda ni kuuana o maujitu ma Jihova ni ima i kôla kinéne.

¹⁵ A kaiela kua muene a mu kexile bhoxi dia lukuaku luê ene a Edene, ni Minhami, ni Jesuua, ni Semaia, ni Amoliia, ni Sekaniia, mu jimbonge muala o jinganga phala nʼende ni kuuanena o jiphange jâ ni muẋima ua iuka (ua ufiiele), kala kia tokala mu ibuka iâ, kixi anʼandenge mba adiakime.

¹⁶ Katu-ku ió a alula ku mísala ia Uvuadiue ua athu, tundé mu kitala kia mivu itatu té bhulu dingi, eneʼoso a kexe mu ku bokona kiá mʼonzo ia Jihova, mbé o kikalakalu kia izuua ioso bhu kizuua kiâ, ku ukunji uâ, kala kia a te mu ibuka iâ.

¹⁷ Kumoxi ue ni iá a alula ku mísala ia Uvuadiue ua jinganga, kala kiala ku mabhata ma jitata jâ; kiene kimoxi ue ni jilevita ala mu kitala kia makuinhi aiadi a mivu katé bhulu dingi, dialuilu diâ dia bhiti kala ki ala o ilangidilu iâ, ni kioso kiala mu ibuka iâ.

¹⁸ Kala ue kiala mu mísala ia Uvuadiue uâ, kiene ue ni tumbonga tuâ tuoso, ni ahetuʼâ, ni anʼa a mala ni anʼâ a ahatu. Kienhiki mu kionge kioso muene; kuma ni kuiuka kuoso kua muẋima a di zelesele mu ima ioso iòlumbile kua Jihova.

¹⁹ Ni mu kaẋi ue kʼanʼa Alá, mua kexile jinganga ku mikáu mu ikanzu ia jimbonge, o mu mbonge joso mua kexile athu a a nona muene mu majina phala ku uanena o mala oso, mu jinganga, o makanda mâ, ni iá oso a aleka ku mísala ia Uvuadiue mu jilevita.

²⁰ Ezekiia anga u bhanga kienhiki mu ixi ioso ia Juda anga u bhanga muene kia uabha, kia iuka, kia kidi, bhu pholo ia Jihova, Nzambi iê.

²¹ O mu ima ioso i andeka kubhanga, ku kikalakalu kia inzu ia Nzambi, ni mu kitumu, ni ku ijila, phala kusota Nzambi iê, ua ki bhange muene ni muẋima ua muvuimba, anga u kala ni kuzediua.