II Malunda 30 - O Mikanda Ikola

Ezekiia uambela o mundu uoso kuiza mu Jeluzaleme ku Phasu

¹ Kia bhiti iosuʼiii, Ezekiia ua tumikisa jiphunga mua Izalaiele ioso ni mua Juda, iu ua soneka ue mikanda kua Ifalaimi ni Manasa, kuila eze kʼonzo ia Jihova mu Jeluzaleme phala kuimununa o Phasu ia Jihova, Nzambi ia Izalaiele.

² Mbata sobha ua tele kaiula ni makota mê moso kumoxi ni kionge kioso mu Jeluzaleme, phala o kuimununa o Phasu bhu mbeji ia Kaiadi.

³ Mukonda mu thembuʼomo ka tenene ku imunuina kiá kumoxi ni ima ia mukuá, kuma ki kua kexidiʼê luua jinganga ja vulu a di zelesa, o mundu ue ki ua di bhongoluele hanji mu Jeluzaleme.

⁴ O ienhiʼiii, ku mesu ma sobha, anga u i mona kuila ia iuka, ni ku mesu ma kifuxi kioso.

⁵ Anga a ki bhela ngonge kuila a ki boke muene mu Izalaiele ioso tundé bhu Beleseba katé ku Dane, kuila eze mu Jeluzaleme mu kuimununa o Phasu ia Jihova, Nzambi ia Izalaiele; mukonda a vulu muene ka imunuine kala kioso kia i soneka

⁶ O mikanda ia lukuaku lua sobha ni lua ilamba iê, hé a i ambata kuala o jingambateʼa-mikanda mua Izalaiele ioso ni mua Juda, kala kia tumu sobha, kuila: Enu mu anʼa Izalaiele, Vutukilenu kua Jihova, Nzambi ia Mbalahamu, ia Izake ni ia Izalaiele, phala o muene ue a talele o pholo kua ió oso momuenu a bhulaka, ia a subhuka ku lukuaku lua jisobha ja Asídia.

⁷ Ki mu kale kala o jitata jenu, mba muʼila kala o jiphange jenu a tondalela Jihova, Nzambi ia jitata jâ, o mukonda dia kienhiki, muene iu ua a tula mu kibuika, kala ki mua mu ki monʼiki;

⁸ o kiki-phe kana ku tundisa kakunda kenu, kala o jitata jenu; tolokenu kua Jihova, muize bhu kididi kiê kikôla, kia kolesa muene katé ku hádia, nda mu bhikile Jihova, Nzambi ienu, phala o kutêma kua njinda iê ki ku mi tule enu.

⁹ Mukonda kioso enu ki mu lungulukila kua Jihova, o jiphange jenu ni anʼenu a mala a-ndu bonga kiadi ku mesu ma ió oso a ambata ene ku ubhika, anga a kà vutuka dingi mu ixi iii; mbata Jihova, Nzambi ienu, mukua kiadi ni henda, o pholo iê kà tena ku mi suekela-iu, se enu mu bilukila kua muene.

¹⁰ O ió ambata o mikanda, anga aia muene ni kubhita sanzala ni sanzala mu ixi ia Ifalaimi ni Manasa kandú ku Nzebulone; maji-phe a olèla anga a a bhanga kasekelu.

¹¹ Sumbala kiene, maji amoxi-mu, ku akua Asele, ni ku akua Manasa, ni akua Nzebulone, a toloka, ia eza mu Jeluzaleme.

¹² Lukuaku lua Ngana Nzambi phe lua kexile mua Juda, lu lua a bhana muẋima umoxi ngó, mu ku bhanga ioso ia tumu sobha ni makota mê, kala kioso kia tange o kizuelu kia Jihova.

¹³ Mu Jeluzaleme anga mu di bhongoluela ndumba dia athu, phala kuimununa o kizokola kia jimbolo ja ususu, bhu mbeji ia kaiadi; kionge kia dikota muene.

¹⁴ Há a fundumuka, anga a katula jikalatódio joso ja kexile mu Jeluzaleme; a katula ue dingi o itutu ioso ia uasu ua dizumba anga a i takuila mu ngiji ia Kidolone.

¹⁵ Kieneʼokio anga a satela o Phasu mu kizuua kia kuinhi ni kiuana ku mbeji ia kaiadi; o jinganga ni jilevita anga jiosonhi ja a kuata, eza ni jisata ja kuoha ku inzo ia Jihova.

¹⁶ Anga a di ta bhu kididi kiâ, kala kiene o kífua kiâ, ni kiene mu kitumu kia Mozé, muthu uangene ua Nzambi; o jinganga anga a kuata ku sangela o manhinga, aia ni ku ma tambula bhu maku ma jilevita.

¹⁷ Mukonda kua kexile athu a vulu mu kionge a kambele o ku di zelesa kiene kia bhekelele kuila o Jilevita ene a kexile mu ku jibha o tumbudi tua Phasu phala ió oso a kambele o ku di zelesa, phala a di zelese kua Jihova.

¹⁸ Mbata kifulu kia dikota kia athu, ndumba muene akua Ifalaíme, ni Manasa, ni Isakale, ni Nzebulone, sumbala ka di zelesele, maji o Phasu a i di muene, oko ki kiene kia ki soneka; Ezekiia-phe anga u a sambela ene, uixi;

¹⁹ Eie u Jihova uene o mbote, bhanga diluuluilu ni uoso ua iudika o muẋima uê mu kusota Jihova Nzambi, o Nzambi ia jitata jê, né-mbe ka di zelesa luua o udizeleselu uendi o kididi kié kikôla.

²⁰ Jihova anga uívua o kusamba kua Ezekiia, hé uilula o muenhu ua kifuẋi.

²¹ Anʼa Izalaiele a kexile mu Jeluzaleme, anga emununa o kizokola kia jimbolo ja ususu mu sambuadi dia kizuua ni kusanguluka kua dikota; o jilevita ni jinganga aia ni kuximana Jihova kizuua ni kizuua, ni ima ia kuxikila o mimbu ni dízui dia suína kua Jihova.

²² Ni kulenduka kuoso, Ezekiia anga u zuelesa jilevita joso a kexile ni kilunji mu kuijiia kiambote Jihova. O maujitu ma fesa anga a ma dia mu sambuadi dia kizuua, ni kubhakula maujitu ma uembu, ni kuximana Jihova, Nzambi ia jitata jâ.

²³ O kia di longesa o kionge kioso mudiâ kubhanga dingi sambuadi dia mukuá dia izuua, emununa dingi muene, ni kusanguluka kuoso, sambuadi dia mukuá dia izuua.

²⁴ Mukonda Ezekiia, sobha ia Juda, kionge ua ki bhakuila midi ia tungombe tua ndumbe, ni sambuadi dia midi ia jimbudi; o makota ma jinganga ue kionge a ki bhakuila midi ia tungombe tua ndumbe, ni kuinhi dia midi ia jimbudi; o jinganga ue ndumba a di lumbila.

²⁵ Kifuẋi kioso kia Juda anga ki sanguluka, kumoxi ni jinganga ni jilevita ni kifuẋi kioso kia iá a tundu mua Izalaiele; katé ni akua jixi jengi a tundile mʼoxi ia Izalaiele ni iá a tungile mʼoxi ia Juda.

²⁶ Mu Jeluzaleme anga mu kala kusanguluka kua vulu; kuma tundé mu izuua ia Solomá, monʼa Davidi, sobha ia Izalaiele, kima kala kiki kiluua a ki mona mu Jeluzaleme.

²⁷ Bhenhobho, ni jinganga ni jilevita a balumuka anga a bhana o kizediuise ku kifuxi kioso; anga a evua o dízui diâ; kuma o musambu uâ ua bhixila muene katé mu kididi kikôla kia Nzambi, ku diulu.