II Malunda 3 - O Mikanda Ikola

Thembulu andeka o ku i tunga

¹ Solomá he uandeka kutunga o inzu ia Jihova mu Jeluzaleme, ku mulundu ua Moliia, kua di londekezele Jihova kua Davidi, tatʼâ, bhu kididi kia iudikile Davidi, bhu dizanzu dia Holona, mujebuzi.

² Ku muvu ua kauana ua utuminu uê, bhu mbeji ia kaiadi, kizuua kia kaiadi, anga uandeka kutunga.

³ O madisesa a te Solomá phala kutunga o thembulu ia Jihova eneʼá: Kia dianga o kuzonga mu jikóvadu, o kulebha kuê makuinhi a samanu a kóvadu; o kuzanza kuê makuinhi aiadi a kóvadu.

⁴ O kitelembe kia kexile ku pholo, o kulebha kuê kua soko ni kuzanza kua inzu, ene makuinhi aiadi a kóvadu, o kitala kiê hama ni makuinhi aiadi, anga moxi dioso u ki xiia ulu ua dikenze.

⁵ O inzu ia dikota ua i folala hanji ni mabaia a muxi ua faia anga u i xiia kiua ni ulu ua iuka kinéne, anga a seta-ku malubhambu ni isalale ia maie.

⁶ O inzu iene ue anga u i kembesa ni madiiamande; o ulu-phe, o ulu ió ua Palavaíme.

⁷ Inzu anga u i xiia ulu uoso moxi ni mikambu, ni mikangala, ni ku mutôto, ni ku mabhitu; o ku mutôto ua iudika-ku jixelube.

⁸ Ua bhange dingi inzu ia ukolelu, ukôla kinéne, ia bhingi o mulebhelela uê ua soko ni kuzanza kua inzu, makuinhi aiadi a kóvadu, o kuzanza kuê makuinhi aiadi a kóvadu, anga u i xiia ulu uoso ua dikenze ua pezala hama jisamanu ja talendu.

⁹ O kunema kua jiphelèku kua makuinhi a tanu a xikulu ja ulu; maxilu oso anga u a xiia ulu.

Jixelube jiiadi

¹⁰ Anga u iudika ue mʼonzo ia ukòlelu u kôla kinéne, jixelube jiiadi mu kidífua kia akua kuenda, hé u ji ta ue ulu.

¹¹ O mabhabha ma jixelube o kulebha kuê makuinhi aiadi a kóvadu; mukuá, dibhabha diê dia kóvadu jitanu dia tutile ku mútoto ua inzu; o dibhabha dia mukuá, dia kóvadu jitanu dia tudile ku dibhabha dia xelube ia mukuá.

¹² O dibhabha ue dia xelube ia mukuá dia kóvadu jitanu dia tutile ku mutôto ua inzu; o dibhabha dia mukuá ue dia kóvadu jitanu, dia kuatenene ku dibhabha dia xelube ia mukuá.

¹³ O mabhabha a jixelube jenʼiji a zonga makuinhi aiadi a kóvadu kioso kia diʼoleka; anga a jʼimika, o jipholo ji talela kʼonzo.

¹⁴ Anga u iudika ue kibatulu kia azulu, ni purpura, ni thanga i kusuka, ni linhu ia iuka kiambote, anga u ta-ku ue jixelube.

O philadi Jiiadi ja Ngondo

¹⁵ Ku pholo kiki ia ʼnzu anga u bhanga-ku philadi jiiadi ue ja kitala kia makuinhi a tatu a kóvadu ni kitanu; o ku mítue ia jiphiladi ua te-ku jikapitele; kamoxi kóvadu jitanu.

¹⁶ Ua bhange ue o malubhambu, kala mu xilu di kôlakinéne, iú ua ma te ku mítue ia jiphiladi; ua bhange ue hama ia jilomá iú ua ji te mu malubhambu.

¹⁷ O jiphiladi ua ji tungu ku pholo ia Tembulu, iii ku dilu, o iii ku kiasu; o iala ku dilu anga u i luka uixi: Jakí, o iala ku kiasu uixi: Bouaji.