II Malunda 29 - O Mikanda Ikola

Ezekiia u tuma kuzelesa o Tembulu

¹ Ezekiia ua kexi mu makuinhi aiadi a mivu ni kitanu kioso kiandeka o kutumina, iu ua tumina makuinhi aiadi a mivu nʼivua mu Jeluzaleme; dijina dia mamʼâ, a muʼixana jinga exi Abiia, monʼa Zakadiia.

² Anga u bhanga ima ia kuiuka bhu pholo ia Jihova, kala ioso kiá ia bhanga jinga Davidi, tatʼâ.

O Kuzelesa o Tembulu

³ Muene, mu muvu ua dianga ua utuminu uê, ku mbeji ia dianga, kiene kia jikula o mabhitu ma inzu ia Jihova, anga u ma iudikisa.

⁴ Anga uiza ni jinganga ni jilevita, u a bhongoluela bhu kitanda kia mutundila-kumbi.

⁵ U a tangela, uixi: Enu mu jilevita, ngʼivienu. Dizelesienu kindala. Zelesenu ue o inzu ia Jihova, Nzambi ia jitata jenu, o dixidilu katulenu-diu mu kididi kikôla.

⁶ Kuma jitata jetu a tondala, ia a bhange muene kiaibha ku mesu ma Jihova, Nzambi ietu, kuma a mu xisa; mesu mâ a ma katula ku dilombe dia Jihova, ia a mu bhana dikunda.

⁷ O mabhitu ma kitelembe ue a ma jika; o tundeia a tu jimi; ka mu kʼoha dingi uasu ua dizumba, mba kubhana jisata ja kubhakula ni túbhia kua Jihova, mu kididi kikôla kia Nzambi ia Izalaiele.

⁸ Kí kia bhekesa njinda ia dikota ia Jihova ku thandu dia Juda ni Jeluzaleme, iu ua a bhakula ku kikènene, ni ku dibuikilu, ni ku a xikila jisupiia, kala enuʼenu ki mua lu di muena-kiu ni mesu menu.

⁹ Mukonda, talenu kuma jitata jetu ja buila ku xibhata, kiene kia bhangesa kuila ni anʼetu a mala, ni anʼetu a ahetu, ni ahetuʼetu, a kexile ku ubhika.

¹⁰ Kindala-phe mu muẋima mua mu ngi bhita kuila tu ta kikutu ni Jihova, Nzambi ia Izalaiele; phala o kutêma kua njinda iê ku tu somboke ni kuie kuengi.

¹¹ Kiki-phe, enu mu anʼami, ki mu kale ni kaxixi mba usudi; mbata Jihova ua mi sola, nda mu kale bhu pholo iê mu ku mu xibhidila, ni mu kale mu akunjiʼê, muie ni kuoha o uasu ua dizumba.

Akua Levi a zelesa o tembulu

¹² Bheneʼobho jilevita a balumuka: Mahate, monʼa Amasai, ni Jouele, monʼa Azadiia, ku anʼa Kohate; o ku anʼa Meladi, Kiji, monʼa Abidi, ni Azadiia, monʼa Jehalelele; o ku akua Ngelexone, Nzoua, monʼa Zima, ni Edene, monʼa Nzoua;

¹³ o mu kaẋi ka anʼa Elisafu a katula-mu Sidi, ni Jeiele; o mu kaẋi ka anʼa Azafo, a katula-mu Zakadiia ni Mataniia.

¹⁴ O mu kaẋi ka anʼa Hemane, Jehiiele ni Simei; o muʼaxaxi ka anʼa Jeditunu, Semaia ni Uziiele.

¹⁵ Anga a bhongolola o jiphange jâ, hé a di lumbila kua Jihova, anga eza kala kioso kia tumu sobha, ku maka ma Jihova, phala a zelese o inzu ia Jihova.

¹⁶ O jinganga anga a bokona mʼonzo ia Jihova, phala kuzelesa-mu, ni kutubhula ku kanga, mu lumbu lua inzo ia Jihova, o dixidilu dioso dia sange mu Tembulu ia Jihova; o jilevita anga a di tambula, nʼai mu ku di texe ku kanga, mu honga, mu ngiji ia Kidolone.

¹⁷ Mu kizuua kia dianga ku mbeji ia dianga kiene kiandeka o kuzelesa; o mu kizuua kia kanake ku mbeji, eza mu kitelembe kia Jihova, inzo ia Jihova anga a i zelesela mu nake dia izuua; o mu ku bhixila mu kizuua kia kakuinhi ni kisamanu, ku mbeji ia dianga iene, a zubha kiua.

¹⁸ Bheneʼobho a bokona mʼonzo kua sobha Ezekiia, a muʼambela, exi: Inzu ioso ia Jihova tua i zelesa kiá, kumoxi ue ni kalatódio ka jisata jakubhakula ni túbhia kua Jihova ni itutu iê ioso, ni meza ma jimbolo ja ku tela, ni itutu iê ioso.

¹⁹ Ni itutu ioso ue, ia texile sobha Akaji bhu kanga, mu kutondala kuê, kioso kiala muene mu kutumina, tua i ludika kiá, etu tua i lumbila; tala, iii kiá ku pholo ia kalatódio ka Jihova.

Ezekiia u mateka dingi o kuhingila Jihova

²⁰ Kienhokio sobha Ezekiia anga u balumuka mu kimenemene anga u bhongolola adiakime oso mu mbonge, há u banda kʼonzo ia Jihova.

²¹ Anga eza ni sambuadi dia tuana tua jingombe, ni sambuadi dia ilumbe ia jimbudi ni sambuadi dia tumbudi tua ndumbe, ni sambuadi dia isutu ia jihombo mbebhu o sata ia kilumbu kia ituxi, ni ku utuminu, ni ku kididi kikôla, ni kua Juda kuene, anga u tangela anʼa Alá, o jinganga, kuila a ji bhakuile ku thandu dia kalatódio ka Jihova.

²² Ene anga a jibha o jingombe; o manhinga mê a ma tambula kuala o jinganga a ma sangela ku thandu dia kalatódio; o ilumbe ia jimbudi a i jibha ue, anga manhinga mê a ma sangela ku thandu; tumbudi ue a tu jibha kiomuène, o mahaxi mê hé a ma sangela ku thandu dia kalatódio.

²³ Anga eza ni isutu ia jihombo, ia sata ia kilumbu kia kituxi, bhu pholo ia sobha ni mundu uoso, ene anga a i tula o maku mâ bhu thalʼa mítue.

²⁴ O jinganga hé a i jibha, o manhinga mê hé a bhanga na-mu o sata ia kilumbu kia ituxi ku thandu dia kalatódio phala o kuluulula Izalaiele ioso; mbata sobha ua tumine kuila a bhange ujitu ió ua kubhakula ni túbhia kua Jihova ni sata ia kilumbu kia ituxi, bhu kididi kia Izalaiele ioso.

²⁵ Anga u ta o jilevita mʼonzo ia Jihova ni jingoma ja ngondo, ni jikakoxi ni jimbanza kala kia tuma Davidi ni Ngade, ua kexe mu ku zambuila sobha ni polofeta Natane; mukonda kiene kia tumina Jihova, ku lukuaku lua jipolofeta jê.

²⁶ O jilevita-phe emana ni ima ia maxikile ma Davidi, o jinganga ja kuata jikoloneta.

²⁷ Anga Ezekiia u a ambela kubhana o sata ia kubhakula ni túbhia kua Jihova ku thandu dia kalatódio. O kiene ngó kia mateka o kusatela, a mateka ue ni muimbu ua Jihova, ni jikoloneta ni ima dingi ia kuxikila o mimbu, ia Davidi, sobha ia Izalaiele.

²⁸ Kifuẋi kioso anga a dibhala jipholo bhoxi kioso kiala mu kuimba o muimbu ni kuxika o jikoloneta; anga a bhanga kienʼiki katé kiabhu o kubhana o sata ia kubhakula ni túbhia kua Jihova.

²⁹ O kia zubha kubhana o sata ni sobha ni ene oso a kexile ni muene, a di bhale jipholo bhoxi, anga a bheza Nzambi.

³⁰ Bheneʼobho sobha Ezekiia, kumoxi ni makota, ambela o jilevita kuila Jihova a mu ximane ni izuelu ia Davidi ni Asafo, o muzambuidi. Anga a mu ximana muene ni kusanguluka kuoso, a bhetama, a mu bheza.

³¹ Ezekiia anga u kumbulula, uexi: o kiki-phe mua di lumbila enuʼenu muène kua Jihova; bhiẋilenu-phe, muize ni jisata ni maujitatu ma kisakidilu, kuma diximanu ku inzu ia Jihova. O kifuẋi anga ki bheka jisata ni maujitu ma kisakidilu kia diximanu; o ene oso a kexile na-kiu ku muẋima, a bheka jisata ja kubhakula ni túbhia kua Jihova.

³² Okieza mu kualula o jisata ja kubhakula ni túbhia kua Jihova, jeza na-ju o kifuẋi, ja tena makuinhi sambuadi a ngombe; hama ia ilumbe ia jimbudi; hama jiiadi ja tumbudi tua ndumbe; iene iosuʼiii phala sata ia kubhakula ni túbhia kua Jihova.

³³ Ku ima iòlumbile kua Jihova, kua kexile dingi hama jisamanu ja ngombe ni midi jitatu ja mbudi.

³⁴ O jinganga-phe a kexile òfele muene kiavulu; o ku katula ibha ku jisata joso, kia a bhonzele; kí kia bhingile o kua a kuatekesa kuala o jiphange jâ, o jilevita, katé kiabhu o kikalakalu, kifua katé kioso kia di zelesa dingi o jinganga ja mukuá; mukonda o jilevita a betele o kuiuka muẋima mu ku di zelesa o jinganga, ndenge.

³⁵ O jisata ja kubhakula ni túbhia kua Jihova anga ji kala nzungule ni ndumba dia maji ma jisata ja uembu, ni jisata ja makúnua mbé o jisata ja dizumba dia mbote. Kienhiki kia vutula dingi o ukunji ua inzo ia Jihova bhu kididi kiê.

³⁶ Ánga Ezekiia ni kifuẋi kioso a sanguluka mukonda o Nzambi muene-muène ua bhangesa o kifuxi kiê o ku di iudika kiambote, mbata o kikalakalu kiki a ki bhange lusolo.