II Malunda 28 - O Mikanda Ikola

Akaji, sobha ia ibha, sobha ja mukuá ji mu talesa hadi

¹ Akaji ua kexile mu makuinhi aiadi a mivu kioso kiandeka o kutumina; ua tumina kuinhi dia mivu ni kisamanu mu Jeluzaleme; hé u lémbua kubhanga jinga kia iuka bhu pholo ia Jihova, kala kia ki bhanga jinga Davidi, tatʼâ.

² Kia mu kexi kota, o kuenda mu jinjila ja jisobha ja Izalaiele, anga u ta-ku dingi o kuiudika iteka ia utadi ua kuzunza kua Bale.

³ Mu dikôlo dia monʼa Hinono, muene uohela-mu ue o uasu ua dizumba; anʼê-muène ue, ua oha mu túbhia, kala o maufusa ua matumbu ma kaiesa Jihova bhu pholo ia anʼa Izalaiele.

⁴ O ku milundu ue, ni ku ididi ia dileka, ni moxiʼa miẋi ioso ia uisu, ua bhela-mu ue jisata, ni kuoha uasu ua dizumba.

⁵ Mukonda dia kienhiki, Jihova, Nzambi iê, ua mu bhakula ue bhu lukuaku lua sobha ia akua Sídia, ene anga a mu tolola ku ita, hé a muʼambata kifuẋi kionène kia jihutile anga eza na-kiu ku Damasku; a mu bhakula ue dingi bhu lukuaku lua sobha ia Izalaiele, muene anga u mu kuama ni ukuamenu ua dikota.

⁶ Kuma Peka, monʼa Demaliia, mu kizuua kimoxi, ua jibha hama ni makuinhi aiadi a midi ia muthu mua Juda, makuenze oso a ita; mukonda a xisa Jihova, Nzambi ia jitata jâ.

⁷ O Zukidi, diiala dia dizonda mua Ifalaíme, ua jibha Mahasiia, monʼa sobha, ni Azidikanu, o kimbadi, ni Elekana, muthu ua kaiela kua sobha.

⁸ Anʼa Izalaiele anga ambata ku jiphange jâ, akua Juda, hama jiiadi ja midi ia athu, a a kutu, ni ahetu, ni anʼa mala ni anʼa ahetu; anga a bhunda ue ndumba dia ima, hé eza na-iu mu Samádia.

⁹ Muenhomo-phe mua kexile polofeta ia Jihova, dijina diê, a muʼila; Odele. Muenʼiú anga u tunda mu ku kauidila o kifuẋi kia masoladi, kia mu kuiza mu Samádia, anga uʼambela, kuila: Talenu, kioso Jihova, Nzambi ia jitata jenu kia thathamena akua Juda, ua a bhakula bhu lukuaku luenu, enuʼenu mua a jibha kiabhu ni njinda ia bhingi kuila ia bhixila katé mu diulu.

¹⁰ O kiki-phe enu mua-lu xinganeka kuila anʼa Juda ni Jeluzaleme a kala abhikʼenu, kuma ala jihutile ja mala ni ja ahetu; manhi kʼenuʼenu muene amoxi ni enhó, ala ni kikuma mu kaẋi kâ, kua Jihova, Nzambi ienu?

¹¹ Kala kiki-phe, ngʼivienu, mu vutule dingi iá, o jihutile ji mua kutu, ku jiphange jenu akua Juda, enu mueza na-u; kuma o kuuama kua njinda ia Jihova kuala ku thandu dienu.

¹² Bhenhobho ku adiakimi a mu tumina mu kaẋi ka anʼa Efalaimi, ku balumuka athu: Azadiia, monʼa Nzuanana, Belekiia, monʼa Mesilemote, Jezikiia, monʼa Salume ni Hamasa, monʼa Hadilai, anga a lungulukila iá a mu tunda ku ita.

¹³ A ambela, exi: O iá u mua kutuʼâ, ki mua-ndu tena ku a bokuesa mumu, mukonda o ku kituxi ni kikuma kietu ki tuala na-kiu kiá kua Jihova, enu mua mesena mu ta-ku dingi ku ituxi ietu ni ku ikuma ietu, sumbala o kikuma ki tuala na-kiu kia vulu kiá, o kualala kua njinda ia Jihova kuala kiá ku thandu dia Izalaiele.

¹⁴ Bhenhobho o masoladi a tundu mu ita, a maneka, a jituna iá oso a a kutile, ni ima ioso ia a bhundile bhu mesu muene ma adiakime ni ma kionge kioso.

¹⁵ O athu ió a a tange mu majina mâ, anga a balumuka, a zangula jihutile, o ku ima ia a bhundu a katula-ku kioso kia tokala anga a zuika amoxi-mu a kexile ni tuẋi; hé a a zuika, a a ta jisabhatu ku inama, a a bhana kia kúdia ni kia kúnua anga a a uesa ni maji; o ió ene oso a lémbua o kuenda, a bulukuta mukonda dia kihongo mu mukutu, a ambatela ku jibulu hé a a bheka mu Jedikó, ku jiphange jâ, mu mbonge ia maie; ene anga a vutuka kiua ku Samádia.

Akaji u bhinga jisobha ja Sídia ku mu kuatekesa maji u lémbua-ku

¹⁶ Mu thembu muenhomo, sobha Akaji u tuma kuambela jisobha ja Asídia phala ku mu kuatekesa.

¹⁷ Mukonda ue akua Idumeia, eza ue ia a lu Juda, ia ambata jihutile (o jikuikile) ku ubhika.

¹⁸ O akua Fidíxia ue a di lukula ku jimbonge ja kiphenza ni jiji jala ku mbandu ia Sulu ia Juda, ia a tambula Bete-Seme, ni Ajalone, ni Jedelote, ni Soko kumoxi ni ididi ia utuminu uê; ni Timina ni tusanzala tua utuminu uê; anga a tunga momo.

¹⁹ Mbata Juda a mu tununa, a mu katula o ujitu kuala Jihova, mukonda dia Akaji, sobha ia Izalaiele; kuma muene ua jimbidisa Juda, o Juda ue iu ua di bhakulʼé kiá muene mu kubhanga kia ibha ni kutondalela Jihova.

²⁰ Tiglate-Pilinesele, sobha ia Asídia, anga u muʼendela; muene-phe ua fikile kuma ueza ku ma kuatekesa, manhi ueza mu ku mu bhondeleka ni ku mu phopheka dingi.

²¹ Mukonda ue Akaji ua zangula ku ima ia subhukile mʼonzo ia Jihova, ni mʼonzo ia sobha ni ia ilamba, iú ua i bhana kua sobha ia Asídia; maji muene-phe ka mu kuatekesa.

Akaji u di ta mu mahamba

²² O mu kithangana kia mu bhondeleka sobha ia Asidia, muene ue ua beta dingi o ku tondalela Jihova, ni kubhanga kia ibha; kienhiki o kikexilu kia sobha Akaji;

²³ mukonda ua bhana jisata ku jinzambi ja akua Damasku, a mu tolola muene, uixi: Mukonda jisobha ja Sídia o jinzambi jâ ja mu a kuatekesa, eme uami nga-nda ku ji bhakuila jisata phala ni ji ngi kuatekese uami, Maji-phe jinzambi jenʼiji ja zubha dingi o ku mu bheka mu hadi, ni muene ni Izalaiele ioso.

²⁴ Akaji anga u bhongolola o itutu ioso ia inzu ia Jihova, anga o itutu ioso ia inzu ia Nzambi u i bulabula, anga u jika mabhitu ma inzu ia Jihova, anga u bhanga jikalatódio phala muene mu jihota joso ja Jeluzaleme,

²⁵ O mua Juda ue, sanzala ni sanzala, ua bhange-mu matala ma kuohela uasu ua dizumba ku jinzambi jengi. Mu kubhanga kienʼiki, ua lokalala o njinda ia Jihova, Nzambi ia jitata jê.

Ufilu ua Akaji

²⁶ O ima-phe dingi ia mukuá ia bhange Akaji ni ia jinjila jê joso, kixi ia dianga kala ia sukidila, tala, a i soneka mu divulu dia jisobha ja Juda ni ja Izalaiele.

²⁷ Akaji anga uzendalala ni jitata jê, anga a mu funda mu mbonge, mu Jeluzaleme, maji ka mu te mu jimbila ja jisobha ja Izalaiele. Anga Ezekiia, monʼê u hinga ungana bhu kididi kiê.