II Malunda 27 - O Mikanda Ikola

Jotamu u tumina kiambote; úlua ni akua Amone anga u a tolola

¹ Kioso Jotamu kia mateka o kutumina, ua kexile mu makuinhi aiadi a mivu ni kitanu, iu ua tumina kuinhi dia mivu ni kisamanu mu Jeluzaleme; o dijina dia mamʼâ Jelusa, monʼa Zadoke.

² Anga u bhanga kia iuka bhu pholo ia Jihova, kala ioso ia bhanga jinga tatʼâ Uziia, kana-phe o kubokona mu Thembulu ia Jihova. Maji hanji o mundu ua kexile mu kutondala.

³ Muene anga u bhanga muelu ua thala ua inzu ia Jihova, anga u tunga ue kiavulu ku thanduʼa kimbaka kia Ofele.

⁴ Ua tungu ue jimbonge mu milundu ia Juda; o mu mikáu ua te-mu jimbonge ni jinzu ja matala.

⁵ Muene ualu ita ni sobha ia anʼa Amone, iu ua a lende; mukonda dia kieneʼokio, mu muvu uenʼió, anʼa Amone a mu bhekela hama ia talendu ja phalata, kuinhi dia midi ia isudi ia tiliku, ni kuinhi dia midi ia isudi ia sevada; ima ienʼiii iene ia mu bhekela jinga anʼa Amone mu muvu ua kaiadi ni ua katatu ue.

⁶ Kienhiki Jotamu anga u kituka dizonda, mukonda o jinjila jê ua ji bhangesa kutalela kua Jihova, Nzambi iê.

⁷ O ima ia kamukuá dingi ia di te-ku, ia bhanga jinga Jotamu, ni ita iê ioso ni jinjila jê, tala, a i soneka mu divulu dia jisobha ja Izalaiele ni ja Juda.

⁸ Muene ua kexile mu makuinhi aiadi a mivu ni kitanu kioso kiandeka o kutumina; iu ua tumina kuinhi dia mivu ni kisamanu mu Jeluzaleme.

⁹ Jotamu anga u zeka ni jitata jê, anga a mu funda mu sanzala ia Davidi; o Akaji, monʼê, anga u hinga usobha bhu kididi kiê.