II Malunda 26 - O Mikanda Ikola

Uziia u hinga usobha; o Ngana Nzambi u mu zediuisa

¹ Bhenhobho mundu uoso a kuata Uziia uala hanji mu kuinhi dia mivu ni kisamanu, anga a mu bhanga sobha bhu kididi kia phaiʼâ, Amaziia.

² Muene anga u tunga Elote, hé u mu vutuila kua Juda, kioso sobha kia zeka ni jitata jê.

³ Uziia kioso ki andeka kutumina, ua kexile hanji mu kuinhi dia mivu ni kisamanu, anga u tumina makuinhi a tanu a mivu ni kitanu mu Jeluzaleme; o dijina dia manhʼâ Jekodiia, mukua Jeluzaleme.

⁴ Anga u bhanga ima ia iuka ku mesu ma Jihova, kala ima ioso ia bhanga jinga Amaziia, tatʼâ.

⁵ Mukonda ua di bhana mu kusota Nzambi mu izuua ia Zakadiia, muthu ua kexile mbâmba mu iusukila ia Nzambi; o mu izuua mua sota jinga Jihova, Ngana Nzambi ue ua mu zediuisa.

⁶ Mbata ua tundu, iú ualu ni jifilisteu, anga u bula o kimbaka kia Ngate, ni kimbaka kia Jabina, ni kimbaka kia Ajindode; anga u tunga jimbonge mu Ajindode ni mu kaii ka jifilisteu.

⁷ Ngana Nzambi iu ua mu kuatekesa ku jifilisteu ni ku akua Alábia a tungile mu Ngulu-bale, ni ku jimeunita.

⁸ Akua Amone anga a bhana maujitu kua Uziia; o fuma iê anga iia katé mu ku bokona mu Ijitu, kuma ua di jingisa kinéne.

⁹ Uziia ua tungile ue jinzu ja matala mu Jeluzaleme bhu muelu ua Thungi, ni bhu muelu ua Dikôlo, ni mu jihota, anga u ji kolesa kiambote.

¹⁰ Ua tungile ue jinzu ja matala mu kikangalakata anga u kandesa-mu ndunga ja vulu; kuma ua kexile ni ibhaku ia vulu, kutale mu makôlo uixi mu manhana; o idimakaji ni akuni a mivide ua a uanena mu milundu ni mu mikáu ia uabha o kudima; mukonda muene ua uabhelele o kudima.

¹¹ Uziia ua kexile ue ni kifuẋi kia athu, masoladi ejiia kiambote o ku kuata mata, aia ni kutunda phala kuia ku ita kala kia a soneka mu ditangelu diʼòbhange ku lukuaku lua Jeiele, o musoneki, ni Mahaseia, fixiiadi, ala bhoxi dia lukuaku lua Hananiia, umoxi ku ilamba ia sobha.

¹² O mítue ia mabhata, athu a mazonda, ku a kuata o konda, atena midi jiiadi ni hama jisamanu ja muthu.

¹³ Anga a kala mu kutumina kifuẋi kia masoladi ma ita, kia kexile hama jitatu ni sambuadi dia midi ni hama jitanu ja athu, a kexile mu kúlua ita ni nguzu ia vulu, mbé o ku kuatekesa sobha kúlua ni jinguma jê.

¹⁴ Uziia anga u bhanga jingubu phala o kifuẋi kioso, ni madionga, ni jikapasete ni ivunga-thulu, ni mifula; katé ni jimbalafunda mbé o kutakula o matadi.

¹⁵ Anga u bhanga jimákina mu Jeluzaleme, ja iudika kuala athu ejiia o ufunu, a ji iudikila phala ji kale mu jinzu ja matala ni bhu jithungi ja imbaka phala ni jʼende ni kuasa misongo ni kutakula imatadi ionéne; anga o fuma iê iia muene ku mabhabha katé ku makanga kinéne; mukonda a mu kuatekesa ni isunji ni madiuanu katé kia di bhange dizonda dionéne.

Uziia dibhute di mu kuata

¹⁶ Maji Uziia-phe kia zubha kiá o ku kituka dizonda, o muẋima uê ua di zangeleka katé ki ua zangiua; anga u tondalela Jihova, Nzambi iê, mbata ua bokona muene mʼonzo ia Jihova phala kuoha uasu ua dizumba ku thandu dia kalatódio ka uasu ua dizumba.

¹⁷ Kienhokio-phe ue, nganga, Azadiia, ua mu kaiela kuema, anga u bokona ni makuinhi nake a jinganga ja Jihova, makuenze oso a nguzu.

¹⁸ A fudisa sobha Uziia, anga a muʼambela, exi: Eie Uziia ki ki ku fuama, kuoha o uasu ua dizumba bhu pholo ia Jihova, maji kia a fuama o jinganga, anʼa Alá, athu a a lumbu, mbebhu o kuoha uasu ua dizumba; mu kididi kikôla tunda-mu, kuma ua tondala; kuma kienhiki ue ki ki tena ku kukala ujitu ué-eie, ku mbandu ia Jihova Nzambi.

¹⁹ Uziia bhenhobho njinda i mu kuata; o muene ua kuata bhu maku o kienga kia kuohela uasu ua dizumba phala kuoha; muene-phe kia thathamena jingangʼiki, dibhute di mu tundila bhu dibhomo, mʼonzo ia Jihova, bhu mbanduʼa Kalatódio ka uasu ua dizumba, bhu mesuʼa jinganga bhene.

²⁰ O nganga ia dikota Azadiia kioso kia lunguluka mu ku mu tala kumoxi ni jinganga ja mukuá, a mu mona kuila dibhute dia mu tundila kiá bhu dibhomo diê, anga a mu tubhula bhu kanga ni makidikidi; katé ni muene ue ua tundu lusolo, kuma ua mono kuila Jihova ua mu kuama.

²¹ Kienhiki sobha Uziia kia kituka mukua dibhute katé mu kizuua kiê kia kufua; iú ua kexile kiá, mukonda dia kukala mukua dibhute, mu kanzu ku mbandu kuengi, kuma a mu tubhula mu kisangela kia inzu ia Jihova; anga monʼê Jotamu u kala ni kikalakalu kia inzu ia sobha, ni kufundisa o mundu mu ixi.

²² Kuambe dingi ima ia mukuá ia bhange Uziia, kixi ia dianga mba ia sukidila, polofeta Izaia, monʼa Amoji, muene ua i soneka.

²³ Uziia anga u zeka ni jitata jê, anga a mu funda ni jitata jê mu mukáu ua mbila ia jisobha; mukonda edile, exi: Mukua dibhute. O monʼê Jotamu anga u hinga ungana bhu kididi kiê.