II Malunda 24 - O Mikanda Ikola

O utuminu ua Jouaji

¹ Jouaji ua kexile ngó mu sambuadi dia mivu kioso kiandeka o kutumina, iú ua tumina makuinhi auana a mivu mu Jeluzaleme; o dijina dia mamʼâ Zíbia, mukua Beleseba.

² Jouaji anga u bhanga ima ia kuiuka bhu pholo ia Jihova, mu izuua ioso ia nganga Joiada.

³ Joiada anga u mu sotela ahatu kiiadi; hé u vuala anʼa mala ni anʼa ahatu.

⁴ Anga kibhita kuila, kia zubha kubhita imʼiii, ku muẋima ua Jouaji kua muʼiza o kutungulula inzo ia Jihova.

⁵ Hé u bhongolola o jinganga ni jilevita, uixi: Ndokuenu muie mu jimbonge ja Juda, mu bhongolole kitadi mu Izalaiele ioso, mbé o kuenda ni kutungulula o inzu ia Nzambi ienu, muvu ni muvu; enu-phe mu bhanga lusolo ni kima kienʼiki. Maji o jilevita ka bhange lusolo.

⁶ Anga sobha uixana Joiada, o muadiakime uâ, hé u mu tangela, kuila; Eie kuibhudixilaʼhi mu jilevita mba ihi kia fudisa o kuiza ni lubhaku lu tunda mua Juda ni Jeluzaleme, lua xindi Mozé, ngunza ia Jihova, ni kionge kioso kia Izalaiele, ku balaka ia umbangi?

⁷ Kuma Ataliia mukonda dia kukala muthu ua ibha, o anʼê a sengulula o inzu ia Nzambi, katé ni ima ikôla iaʼnzo ia Jihova a i kitula ia Bale.

⁸ Sobha anga u bhana ngonge, hé a iudika mbaúlu hé a i tula bhu kanga bhu muelu ua inzu ia Jihova.

⁹ Anga a ki kola mua Juda ni mu Jeluzaleme kuila, a bheke mubhaku ua Jihova, ua xindi Mozé, ngunza ia Nzambi, ku anʼa Izalaiele oso, mu ixi ia kisekele.

¹⁰ Kienhokio adiakimi oso ni mundu uoso a kala ni kusanguluka, eza ni mubhaku hé a u takuila jinga mu mbaúlu katé kia bhu o kikalakalu.

¹¹ Anga aia ni kuila, mu kithangana kia kuiza ni mbaúlu a i ambata bhu maku ma jilevita, kioso ki tumina sobha, kuila ua i mono muala kiá kitadi kiavulu, kuiza musoneki ua sobha ni kibese kia nganga ia dikota, anga a lundulula o mbaúlu, hé a i katula a i vutula bhu kididi kiê. Kiene kia bhanga jingʼiki kizuua ni kizuua; anga a bhongolola ndumba ia kitadi.

¹² Kia kexe mu kuila ni Joiada ni sobha, a ki bhana kua oso ala ku pholo ia kikalakalu kia inzu ia Jihova; anga a futila jipedelelu ni jikalupindelu phala kutungulula dingi onzo ia Jihova; a sota ue ni akua kusula ni ió a kalakala ku utadi mbebhu o kuiudika inzu ia Jihova.

¹³ Oso a kexile ku pholo ia kikalakalu, a kexi mu kubhangesa kuila o kikalakalu kia kutungulula o inzu ia Jihova kiia ni ku di bandekeza dingi ku maku mâ; anga inzu ia Nzambi a i bheka dingi bhu ditala diê diʼòkulu, ia kuata, ia kolo.

¹⁴ Kioso kia zubha o kukalakala, o kitadi kia subhuka-ku, eza na-kiu kua sobha ni kua Joiada, anga a ki bhanga itutu phala inzu ia Jihova, itutu phala ukunji ni ku bhela jisata, ni uasu ua dizumba, ni itutu muene ia ulu ni phalata. Izuua ioso anga a kala mu kubhana jisata ja kubhakula ni túbhia kua Jihova, mʼonzo ia Nzambi, mu izuua ioso ia Joiada kulu-dia-mundu.

¹⁵ Joiada anga u kuka muene kiavulu, ni izuua ia mu kumu, kioso kia fu; kulu-dia-Mundu ua bhange-ku hama ia mivu ni makuinhi a tatu, iú uafu-ke.

¹⁶ Anga a mu funda mu sanzala ia Davidi, mu jimbila ja jisobha, mukonda muene ua bhangele mbote, ni kua Izalaiele, ni kua Nzambi, ni ku dibhata diê.

Jouaji u bhikila iteka ni kububisa Zakadiia ni matadi

¹⁷ Maji kioso kia fu Joiada, o adiakimi a Juda eza anga a fukamena sobha, sobha anga ua evua.

¹⁸ Hé a xa inzu ia Jihova, Nzambi ia jitata jâ, aia mu kuxibhidila mahamba mu mikáu, ni kubhikila iteka. Kienhokio-phe, ku thandu dia Juda ni Jeluzaleme, anga kutuluka njinda ionéne, mukonda dia kikuma kiâ kienhiki.

¹⁹ Maji-phe, mu kaẋi kâ ua tumikisa-mu ni jipolofeta, phala kuenda ni ku a vutuila kua Jihova; ene anga aia ni ku a dimuna, maji ene nguâ-uâ kubhana mátui.

²⁰ O Nzumbi ia Nzambi anga uizalesa Zakadiia, monʼa nganga Joiada, muene anga uimana mu kaẋi ka mundu, hé u zuela kuila: Nzambi uambe kiki: Phalaʼhi mua mu tondala o ijila ia Jihova? Kuabhu-phe ki mua-nda kuzediua. Kuma enu mua xisa Jihova, o muene ue ua-nda ku mi xa.

²¹ Ene anga a mu ta kikutu kia ufe, hé a mu bûba ni matadi, mu lumbu lua inzu ia Jihova, kala kia ki tumina sobha.

²² Mu kubhanga kiki, sobha Jouaji ka lembalala dingi o mbote ia mu bhangele Joiada, tatʼa Zakadiia, maji ua mu jibhila monʼê, ua bhingi mu kufua iú tenda, uixi: Jihova ua-nda ku ki mona, hé ua kà ku ibhula na-kiu.

O difundisilu dia Nzambi kua Jouaji

²³ Anga ki bhita kiki: o kuila muvu ki ua tena luua, kifuẋi kia masoladi ma Sídia kia bande mu kúlua ni Jouaji; anga eza mua Juda ni mu Jeluzaleme; o mu kaẋi ka mundu, a jibha-mu ngoho o makota oso a kifuẋi; o ima iâ ioso ia a bhundu, o masoladi a i tumikisa kua sobha ia Damasku.

²⁴ Mukonda, sumbala o kifuẋi kia akua Sídia kieza ni athu ófele, maji-phe Jihova ua bhakula muene o kifuẋi kia mundu ua vulu bhu maku mâ kuma ene a xisa Jihova dia Nzambi ia jitata jâ. Kienhiki kia bhiti o mafundisilu ma Jihova kua Jouaji.

Jouaji a mu jibhila bhu hama kuala abhikʼê

²⁵ Kia mu xisa akua Sídia (kuma a mu xile ni mauhaxi mʼonène), abhikʼê a mu ta kikutu kia usuéia, anga a mu jibhila bhu hama, u fua, mukonda dia manhinga ua Zakadiia, monʼa nganga Joiada; hé a mu funda mu mbanza ia Davidi, maji ka mu fundu mu jimbila ja jisobha.

²⁶ A mu tele o kikutu kia ufe, eneʼá: Zabadi, monʼa Simiiate, mukua Amone, ni Jozabate, monʼa Silete, mukua Mouabhi.

²⁷ Ku mbandu ia anʼê ni unéne ua kikalakalu kia mu bhele, ni ukalelu ua inzu ia Nzambi, ima ioso a i soneka mu dilunda dia divulu dia jisobha. O monʼé Amaziia muene ua hingi ungana bhu kididi kiê.